Փաստ ինֆո

30-ամյա տղամարդը ոստիկանների կողմից ծեծի է ենթարկվել, սակայն մեղադրանք է առաջադրվել հենց իրեն՝ ինշխանության ներկայացուցչի օրինական պահանջները չկատարելու հայհոյելու և ոստիկանի մատը կծելու համար:

«Փաստինֆո»-ի տեղեկություններով՝ օգոստոսի 12-ին Կարբի Ձոր հանգստյան վայրում ընտանեկան խնջույքի ժամանակ Վարդան Ենոքյանի և նրա կնոջ միջև վիճաբանություն է ծագել, որի ժամանակ տղամարդը հայհոյել է կնոջը:

Այս իրավիճակը կրկնվել է մի քանի անգամ, վիճաբանությանն ականատես են եղել տարածքում ծառայություն իրականացնող ոստիկանության աշխատակիցները: Ամեն անգամ, երբ Վարդանը հայհոյանքներ է հնչեցրել, մոտեցել է ոստիկաններին և ներողություն խնդրել՝ հասարակական վայրում իրեն այդ կերպ պահելու համար:

Սակայն երբ նորից կրկնվել է այդ պահվածքը, ոստիկաններից մեկը մոտեցել է նրան և փորձել է հանգստացնել: Ոստիկանը բռնել է Վարդանի ձեռքը, տեղի ունեցած քաշքշուկի ժամանակ ոստիկանը դիմելով Վարդանին՝ ասել է, «քեզ նորմալ պահի, արա», ի պատասխան դրա Վարդանն էլ ոստիկանին է ասել՝ «քեզանից էլ լավ, արա»:

Այստեղ ոստիկանի և Վարդանի միջև քաշքշուկը թեժացել է, ոստիկանը հարվածել է Վարդանի դեմքին, ինչի հետևանքով վերջին վայր է ընկել գետնին՝ ծնկների վրա, այդ ժամանակ Վարդանի թիկունքից մոտեցել է մյուս ոստիկանը և հարվածել նրա գլխին:

Մեր տեղեկություններով՝ ոստիկաններից մեկը՝ դիմելով գործընկերոջն, ասել է՝ «մի հարվածի, կանչել ենք, հեսա գալու են տանեն», ինչից հետո Վարդանին բերման են ենթարկել:

«Փաստինֆո»-ի թղթակիցը Վարդանի պաշտպան Հայկազ Գալստյանից տեղեկացավ, որ դեպքից երեք օր անց՝ օգոստոսի 15-ին իր պաշտպանյալին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով, այն է ոստիկանի նկատմամբ կյանքի կամ առողջության համար ոչ վտանգավոր բռնություն գործադրելը:

Ըստ պաշտպանի, Վարդանն իրեն մեղավոր չի ճանաչել:

Գործով նշանակվել է դատաբժշկական փորձաքննություն:

Վարդան Ենոքյանի նկատմամբ խափանման միջոց է ընտրվել կալանավորումը, առաջին ատյանի դատարանի այս որոշման դեմ պաշտպանը վերաքննիչ բողոք է ներկայացրել:

Միաժամանակ Ենոքյանի պաշտպանը դիմել է Գլխավոր դատախազի ժամանակավոր պաշտոնակատարին՝ գործը Հատուկ քննչական ծառայություն ուղարկելու և օբյեկտիվ քննություն ապահովելու խնդրանքով:

«Արմավիր» ՔԿՀ-ում կալանքի տակ գտնվող Վարդանն իր հերթին հանցագործության վերաբերյալ հաղորդում է ներկայացրել առ այն, որ ոստիկանները իրեն ծեծի են ենթարկվել:

Աղբյուր` Փաստինֆո