Փաստ ինֆո

ՀՀ պաշտպանության նախկին փոխնախարար Վահան Շիրխանյանի՝ ի սկզբանե վատ առողջական վիճակը գնալով ավելի ու ավելի վատանում է: Այս մասին այսօրվա ասուլիսում հայտարարել է հանցավոր համագործակցությանը մասնակցելու մեջ մեղադրվող Վ.Շիրխանյանի պաշտպան, փաստաբան Հայկ Ալումյանը՝ ընդգծելով, որ նախքան անազատության մեջ հայտնվելն էլ իր պաշտպանյալն արդեն իսկ լուրջ խնդիրներ է ունեցել առողջության հետ, ինֆարկտ ու ինսուլտ է տարել: Իսկ կալանավորվելուց հետո հետզհետե նրա առողջական վիճակը էլ ավելի վատթարացել է և կալանքի տակ գտնվելու ժամանակ նրա մոտ առաջացել է նաև թոքի ինֆարկտ:

Հ.Ալումյանը տագնապի ազդանշան հնչեցնելով՝ նշել է, որ ամեն անգամ նրան այցելելիս ինքը նկատում է ինչ-որ բացասական փոփոխություն, բացասական տեղաշարժ նկատել է նաև մասնագետ բժիշկը:

Պաշտպանը նշել է, որ հիմա Վ.Շիրխանյանը դժվարությամբ է իր խցից կարողանում պաշտպանի հետ տեսակցության գնալ, արդեն երկրորդ անգամն է, որ ինքը պարզապես չի կարողանում մասնակցել քննչական գործողության, որին մասնակցելու ցանկություն ունի, սակայն ֆիզիկապես ի վիճակի չէ:

«Ինձ և Շիրխանյանի հարազատներին շատ մտահոգում է նրա առողջական վիճակը: Մենք հասկանում ենք, որ շուտ թե ուշ կպարզվի, որ ինքը կապ չունի այդ հանցագործության հետ, բայց երբ որ դա պարզվի ու նրան ազատ արձակեն, նա կարող է լինել այնպիսի առողջական վիճակում, որը հնարավոր չլինի ինչ-որ ձևով այն շտկել: Չի կարելի մարդուն ութ ամսից ավելի պահել փաստացի պատանդի կարգավիճակում»,- հայտարարել է Հայկ Ալումյանը:

Պաշտպանն ընդգծել է, որ նախորդ անգամ, երբ նրա կալանքի ժամկետը երկու ամսով երկարացվում էր, քննչական խումբը պատճառաբանում էր, որ անհրաժեշտ է կատարել բազմաթիվ գործողություններ և դրա համար երկու ամիս ժամանակ է պետք և անհրաժեշտ է, որ Վ.Շիրխանյանը գտնվի անազատության մեջ, որպեսզի չազդի գործողությունների վրա: Սակայն պաշտպանական կողմը պարզել է, որ նախորդ երկու ամսում տեղի է ունեցել հինգ անձի հարցաքննություն, քննչական խումբն ընդհանուր առմամբ աշխատել է 12-13 ժամ:

«Հասկանալով, որ այս ամենը կարող է վերջանալ ամենավատ ձևով՝ ի վերջո խոսքը 79 տարեկան մարդու մասին է, դա գիտակցաբար թույլ են տալիս, և մի օր, երբ պարզվի, որ նա անմեղ է, հնարավոր չլինի նրան նորմալ վիճակի վերադարձնել, ո՞վ է պատասխան տալու»,- հարց է ուղղել Հայկ Ալումյանը:

Վ.Շիրխանյանին առաջադրված՝ հանցավոր համագործակցությանն անդամակցելու մեղադրանքն, ըստ պաշտպանի, որևէ ձևով հիմնավորված չէ, կրում է վերացական բնույթ և գործի նյութերով ոչ միայն չի հիմնավորվում, այլև հերքվում է:

Հ.Ալումյանը նշել է նաև, որ մոտ շաբաթների խնդիր է, և անօրինական գործողությունների դեմ առաջին գանգատը պետք է գնա ՄԻԵԴ՝ գանգատի վրա աշխատել է ոչ միայն Հայկ Ալումյանը, այլև արտերկրից փաստաբաններ:

Աղբյուր` Փաստինֆո