Փաստ ինֆո

Քրոջ ծանոթ տղամարդուն սպանելու մեջ մեղադրվող Վաղինակն այսօրվա դատական նիստում մասնակի ընդունեց մեղադրանքը՝  հայտարարելով, որ միայնակ է կատարել  ենթադրյալ հանցագործությունը: Մինչդեռ, ըստ մեղադրանքի, սպանությունը կատարվել է մի խումբ անձանց կողմից:

Ամբաստանյալի պաշտպանն իր հերթին հայտարարեց, որ մեղադրական եզրակացության մեջ գործից մաս է անջատվել երկու այլ անձանց մասով, կատարվել է նախաքննություն և շատ կարճ ժամանակում նրանց նկատմամբ քրեական հետապնդումը դադարեցվել է՝ հանցակազմի բացակայության հիմքով: Պաշտպանը դատարանի ուշադրությունը հրավիրեց այն հանգամանքի վրա, որ հակառակ երկու անձի նկատմամբ քրեական հետապնումը դադարեցնելուն, մեղադրանքը փոփոխություն չի կրել: Մեղադրողն, ի դեպ, որևէ կերպ չարձագանքեց պաշտպանի այս հայտարարությանը:

Այսօրվա դատական նիստում հարցաքննվեց ամբաստանյալի քույրը, ով գործով կարևոր վկա է: Ըստ մեղադրական եզրակացության, վկայի ու նրա ծանոթ տղամարդու  միջև առկա փոխհարաբերությունների շուրջ վերջինիցս պարզաբանումներ պահանջելու նպատակով ամբաստանյալն իր երկու ընկերների հետ 2015 թվականի հունիսի 3-ին նախնական պայմանավորվածության համաձայն հանդիպել են տղամարդուն և նրան ծակած-կտրած բնույթի վնասվածքներ հասցրել, որի հետևանքով տղամարդը մահացել է:

Ամբաստանյալի քույրը սկայպով էր ծանոթացել տուժողի հետ, իր հարազատներին նրան ներկայացրել որպես ընկերուհու ամուսին: Ըստ վկայի, տուժողն իրեն խոստացել է, որ ամեն ինչով կապահովի և հոգ կտանի իր մասին: Նրա մոտ տեղափոխվելուց մի քանի օր անց վերաբերմունքն իր հանդեպ, ըստ վկայի, կտրուկ փոխվել է:

Տուժողն իրենից օրական պահանջում էր 50-60 հազար դրամ՝ մատուցողուհու իր աշխատանքով այդքան գումար չէր վաստակում: Ապա վկան հակասեց ինքնիրեն՝ հայտնելով, որ այդ ժամանակ չէր էլ աշխատում:

Տուժողն այնուհետև պահանջել է, որ վկան մարմնավաճառությամբ զբաղվի, անգամ տարել էր, որ մարմնավաճառությամբ զբաղվի, սակայն ինքը փախել է: Տուժողն, ըստ վկայի, սպառնում էր իրեն, որ եթե վկան չկատարի իր ասածները, նրա ընտանիքը կվերացնի՝  վկայի երկու երեխաները իր հետ համատեղ բնակվում էին նույն տանը:

Տուժողը հայտնել է իրեն, որ մենակ ինքը չէ, իր ձեռքի տակ ուրիշ աղջիկներ էլ կան: Տուժողն ասում էր, որ ինքն ամեն ինչի ընդունակ է և որ իրեն Թուրքիա կուղարկի:

Վկան տաքսի մեքենայով փախել էր իր հայրենի Վանաձոր քաղաք, որից հետո տուժողն իրեն զանգահարում ու sms-ներ էր ուղարկում՝ սպառնալով, որ եթե չկատարի իր ասածները, տարբեր դիրքերից արված մերկ լուսանկարները կհրապարակի ու կվարկաբեկի իրեն:

Ըստ վկայի, իր քունն անընդհատ տանում էր, սակայն իրեն քնաբեր, թե այլ հաբեր էր տալիս, չի կարող ասել, ենթարկվում էր բռնությունների՝ ամբողջ մարմնի վրա կապտուկներ էին:

Վկան հայտարարեց, որ ինքը երկու անգամ ինքնասպանության փորձ է կատարել:

Ըստ ամբաստանյալի քրոջ, ինքն իր եղբորն ասել է, որ տղամարդը հանցագործ է, զենք ունի և որ նրա զանգին չպատասխանի, ուրիշ ոչինչ չի ասել:

«Ինչո՞ւ ոստիկանություն չեք դիմել» հարցին ի պատասխան վկան հայտարարեց՝ «քանի որ գիտեի՝ նա ինչերի է ընդունակ»:

«Ինչո՞ւ այս ամենը քննիչին չեք ասել» հարցին վկան պատասխանեց, որ քննիչն ասում էր, որ Ազատը (գործով տուժողը) կողքի սենյակում է, հետագայում ինքը ցանկանում էր գրել, սակայն քննիչն ասաց, որ իմաստ չունի:

Աղբյուր` Փաստինֆո