Փաստ ինֆո

«Ադրբեջանը պետք է կարողանա հրաժարվել ղարաբաղցիների և հայերի հանդեպ իր ազգատյաց քաղաքականությունից». այս նախադասությունը հատված է Ֆրանսիայի խորհրդարանի էլեկտրոնային թերթին ԼՂՀ նախագահ Բակո Սահակյանի տված հարցազրույցից:

Ղարաբաղցիներին հայերից տարանջատելու մասին այդ նախադասությունը երեկվանից համացանցում ակտիվ քննարկվում է: Այսօր, երբ armtimes.com-ը ԼՂՀ նախագահի մամուլի խոսնակ Դավիթ Բաբայանին խնդրել է պարզաբանել, թե որն է ԼՂՀ նախագահի կողմից թույլ տրված այդ արտահայտության պատճառը՝ նա պնդեց, որ Բակո Սահակյանի հարցազրույցն աղավաղվել է:

Ստորեւ ներկայացնում ենք Դավիթ Բաբայանի հետ զրույցը.

- Պարոն Բաբայան, տարիներ շարունակ Ղարաբաղի բնակիչները սրերով են ընդունել, երբ խոսք է գնացել ղարաբաղցիների ու հայերի միջեւ որեւէ տարանջատման մասին: Հիմա Ղարաբաղի նախագահն է այդպիսի արտահայտություն անում: Ի՞նչ է սա նշանակում, ինչ-որ բա՞ն է փոխվել:

- Մի այսպիսի տհաճ երեւույթ է նկատվում: Խնդիրը նրանում է, որ այդ հարցազրույցը միտումնավոր որոշ մարդիկ աղավաղել են: Այդ նախադասությունը, մի շարք էդպիսի նախադասություններ...չգիտես ինչու բերել են ինչ-որ հայ եւ ղարաբաղցի բառերով մի աննորմալ նախադասություն: Ընդհանրապես, այդպիսի տերմինաբանություն չի օգտագործվել: Դուք հասկանում եք, որ չի կարող նման բան լինել, ի՞նչ է նշանակում հայեր եւ ղարաբաղցիներ: Էդպիսի բան ընդհանրապես չի եղել: Կարող է եղած լինի՝ հայությունը Արցախում, Հայաստանի Հանրապետությունում, Սփյուռքում, հայ ժողովուրդը, եւ այլն եւ այլն: Բայց չի եղել նման նախադասություն: Ո՞վ է թարգմանել դա, ես չգիտեմ:

- Պնդում եք, որ Ղարաբաղի նախագահը չի՞ կարող նման արտահայտություն թույլ տված լինել:

- Էդպիսի հայտարարություն չի կարող թույլ տալ ցանկացած նորմալ հայ մարդ: Էդպիսի հայտարարություններով Ադրբեջանը 70 տարի շարունակ փորձում է հայ ժողովրդին բաժանել երկու հատվածի, ղարաբաղյան հատվածը կտրել Հայաստանից: Էդպիսի բան մենք ո՞նց կարող ենք ասել: Ախր ինձ համար վիրավորական է, որ հարցնում են՝ կարո՞ղ է նման բան լինել: Բայց ո՞նց կարող է: Ես պաշտոնապես հերքում եմ դա, այդպիսի բան չի եղել նախագահի խոսքում. չգիտեմ ով է թարգմանել՝ նման աննորմալ տերմինաբանություն օգտագործելով եւ նրանք սխալ են թույլ տվել, թե ինչ-որ մեկը միտումնավոր էդպես է թարգմանում, թե դա արտաքին թշնամիների քաղաքականությունն է, ես չգիտեմ՝ բայց այդպիսի բան չկա: Չի կարող լինել էդպիսի բան:

- Ի՞նչ թարգմանության մասին եք խոսում. ֆրանսերեն տարբերակում, որը հարցազրույցի բնօրինակն է, նշված է հայեր եւ ղարաբաղցիներ արտահայտությունը: Դուք Ֆրանսիայի Ազգային ժողովի կայքում կարդացե՞լ եք հարցազրույցը:

- Ուրեմն այնտեղ է սխալ թարգմանված, Էդպիսի բան չկա ընդհանրապես, հարցազրույցի մեջ նման բան չկա: ԼՂՀ նախագահը հայերեն է խոսել: Միգուցե թարգմանիչը խնդրին չի տիրապետում:

- Դիմե՞լ եք լրագրողին, որպեսզի բնօրինակում փոխի այդ արտահայտությունը:

- Դիմելու ենք, բա իհարկե դիմելու ենք:

- Իսկ ինչպե՞ս կմեկնաբանեք «Ողջամիտ, իրավացի փոխզիջումներն անհրաժեշտ են», «Մենք պատրաստ ենք անել փոխզիջումներ, եթե դրանք չեն խաթարում մեր երկրի անվտանգությունը, եթե դրանք չեն հանդիսանում պատեհ առիթներ մեր հակառակորդի համար՝ մեզ վրա նոր հարձակումներ գործելու» նախադասությունները։ Ի՞նչ նկատի ունի ԼՂՀ նախագահը՝ողջամիտ փոխզիջումներ ասելով:

- Որոշ մարդիկ իրենց նեղ անձնական շահերից ելնելով փոխզիջում բառը փոխել են զիջման: Որոշ կայքէջերում էդպիսի ձեւով է հրապարակվել, որը պարզապես չի կարող ասված լինել: Ավելին՝ նախագահն իր այս նույն հարցազրույցի մեջ ասել է զիջում բառը՝ բայց այս կոնտեքստով. «Ցանկացած հակամարտության կարգավորում, հատկապես ղարաբաղա-ադրբեջանական հիմնախնդրի պես բարդ հարցը, չի կարող համապարփակ ձեւով լուծում ունենալ զիջումների միջոցով»: Նա ասել է ՝ անհրաժեշտ են փոխզիջումներ. սա ուրիշ բան է: Իսկ մարդիկ, չգիտեմ ինչ մաղձով...եթե դա անում է հայը, սա պարզապես կեղտոտ խաղ է, եթե անում է Ադրբեջանն ու Թուրքիան, պետք է ծափահարենք, որ նուրբ ձեւով այսպիսի պրովակացիա են անում: Խնդիրն այն է, որ երբեւէ չի կարող ասվել, որ մենք պատրաստ ենք զիջումների: Իսկ փոխզիջում բառը մենք պետք է հասկանանք հետեւյալ ձեւով՝ ընդունելի տարբերակ: Օրինակ, մեր կողմից փոխզիջում չի՞ լինի, եթե մենք ճանաչենք Ադրբեջանը որպես անկախ պետություն, իրենք էլ մեզ: Փոխզիջո՞ւմ է դա: Համարժեք փոխզիջում է: Այսպիսի բաների մասին պետք է խոսել: Իսկ որոշ մարդիկ փորձում են ավելի բարձր բղավելով ցույց տալ, թե իրենք ավելի հայրենասեր են: Բայց դրանով չի չէ՞ որոշվում: Ի՞նչ է մեր հերոսները, որոնք կանգնած են սահմանին՝ բղավո՞ւմ են ամեն օր՝ ցույց տալու իրենց հայրենասիրությունը: Էդքան լավ բղավող եք, ցույցեր եք կազմակերպում Վաշինգտոնում, եկեք այստեղ ապրեք, պահեք տարածքը, սահմանները, ոչ թե փախեք այնտեղ ու այնտեղից բղավեք: Մի քիչ էլ տղամարդկային չի ստացվում, չէ՞:

Լուսանկարը՝ «Արցախպրես»-ի

Աղբյուր` Փաստինֆո