Փաստ ինֆո

Առանձնապես խոշոր չափերի ադամանդներ հափշտակելու համար Դուբայում Հնդկաստանի քաղաքացու սպանության աղմկահարույց գործի դատաքննության շրջանակում դատարանը դիմել է իրավասու պետական մարմնին՝ քրեական օրենսգրքի մաքսանենգության հոդվածում կատարված փոփոխության հետ կապված պարզաբանում ստանալու համար:

16.05.16 թ. իր ուժը կորցրել է ՀՀ քրեական օրենսգրքի 215-րդ հոդվածը՝ Մաքսանենգությունը, այսինքն՝ այն ապաքրեականացվել է: Այդ փոփոխության հետ կապված դատարանը հարցմամբ  խնդրում է պարզաբանել, թե  ՀՀ քրեական օրենսգրքի 205-րդ հոդվածի՝  Հարկերը, տուրքերը կամ պարտադիր այլ վճարումները վճարելուց չարամտորեն խուսափելը, նորմը որքանո՞վ կարող է կիրառելի լինել այս գործի շրջանակում՝ հաշվի առնելով, որ հիշյալ աղմկահարույց քրեական գործով բոլոր երեք ամբաստանյալները՝ Հովհաննես Մելքոնյանը, Սեմյոն Եդիգարյանը և Խոսրով Մելքոնյանը բացի սպանության ու ավազակության հոդվածներից մեղադրվում են նաև ապաքրեականացված մաքսանենգության հոդվածով: Այսինքն՝ դատարանը ցանկանում է պարզել դրա կիրառման ընթացակարգը զուտ մաքսանենգության գործերի վրա տարածելու առումով՝ արարքը վերաորակելու կամ ապաքրեականացնելու համար: 

205-րդ հոդվածը նախատեսում է քրեական պատասխանատվություն հարկերը, տուրքերը կամ պարտադիր այլ վճարումները վճարելուց չարամտորեն խուսափելը օրենսդրությամբ նախատեսված հաշվետվություններ, հաշվարկներ, հայտարարագրեր կամ հարկման հիմք հանդիսացող պարտադիր այլ փաստաթղթեր չներկայացնելու կամ նշված փաստաթղթերի մեջ ակնհայտ խեղաթյուրված տվյալներ մտցնելու միջոցով:

Ինչպես «Փաստինֆո»-ի լրագրողի հետ զրույցում նշեց Սեմյոն Եդիգարյանի պաշտպան, փաստաբան Կարեն Հակոբյանը, պաշտպանական կողմը չառարկեց դատարանի այդ որոշման դեմ, քանի որ օրենքի պարզաբանման խնդիր է բարձրացվել: «Կարծում եմ, այդ պատասխանը կստացվի և, ի վերջո, դատարանը կկարողանա 215-րդ հոդվածով քրեական հետապնդումը դադարեցնելու որոշում կայացնել»:

Պաշտպանը նշեց, որ տուժող՝ ադամանդների սեփականատեր ընկերության ներկայացուցիչն ու վկաները  ԱՄԷ-ից  հրաժարվել են ներկայանալ դատարան՝ առանց որևէ պատճառաբանության: Դրա հետևանքով գործով ամբաստանյալները զրկվել են իրենց դեմ ցուցմունքներ տված անձանց հարցաքննելու հնարավորությունից, այսինքն՝ խախտվել է ամբաստանյալների հակընդդեմ հարցման իրավունքը: Ըստ Կարեն Հակոբյանի, եթե դատարանը օբյեկտիվորեն մոտենա հարցին, կորոշի, այդ ցուցմունքները թույլատրելի՞ են, թե՞ ոչ:

Հիշեցնենք, որ, ըստ մեղադրական եզրակացության, Հայաստանի Հանրապետության քաղաքացի Հովհաննես Մելքոնյանը հանցանքներ կատարելու համար ստեղծել է կազմակերպված կայուն խումբ՝ դրանում  ընդգրկելով Հայաստանի Հանրապետության քաղաքացիներ, իր հորեղբոր որդի Խոսրով  Մելքոնյանին և նրա ընկերոջը` Սեմյոն  Եդիգարյանին, նրանք խմբով  կատարել են առանձնապես խոշոր չափերով գույք հափշտակելու նպատակով ավազակություն, շահադիտական դրդումներով ու ավազակությամբ զուգորդված սպանություն և  մաքսանենգություն:

Հովհաննես Մելքոնյանը և Սեմյոն Եդիգարյանը, ըստ մեղադրանքի, նախապես մշակված պլանի համաձայն,  ադամանդները հափշտակելու նպատակով հարձակում են գործել Վաիիհավ Դհոնդիբա Սալոնկիի վրա, նրա կյանքի ու առողջության համար վտանգավոր բռնություն գործադրելով` բռունցքներով հարվածներ են հասցրել վերջինիս մարմնի տարբեր մասերին, քարշ տվել լոգարան, կպչուն ժապավենով Հովհաննես Մելքոնյանը կապել է Վաիիհավ Դհոնդիբա Սալոնկիի ձեռքերը, իսկ Սեմյոն Եդիգարյանը`  ոտքերը, ապա ապօրինաբար Վաիիհավ Դհոնդիբա Սալոնկին կյանքից զրկելու դիտավորությամբ նրա գլխին անցկացրել են երկու պոլիէթիլենե փաթեթներ, դրանց եզրերը կպչուն ժապավենով ամուր սեղմելով, օդի հոսքը փակելով՝ մեխանիկական շնչահեղձության եղանակով ապօրինաբար, դիտավորությամբ կյանքից զրկել` սպանել են Վաիիհավ Դհոնդիբա Սալոնկիին և հափշտակել են «Color Source for Gold and Diamonds Company» ընկերության տնօրեն Ռահուլ Ռաջենդրա Կառնավարտին պատկանող առանձնապես խոշոր չափերի` 691.883.000 ՀՀ դրամին համարժեք 1.700.000 ԱՄՆ դոլար արժողությամբ, 6.800 կարատ տարբեր գույների ադամանդներ:   5.290.715 կարատ ադամանդները «Զվարթնոց» օդանավակայանում, մաքսանենգությամբ` մաքսային հսկողությունից թաքցնելով,  տեղափոխել են Երևան քաղաք, որտեղ էլ դրանք ՀՀ ոստիկանների կողմից հայտնաբերվել են Հովհաննես Մելքոնյանի ուղեբեռի զննությամբ, իսկ մնացած 1509.285 կարատ ադամանդները չեն հայտնաբերվել:

Աղբյուր` Փաստինֆո