Փաստ ինֆո

Ինչո՞ւ եք փոխզիջման տակ անպայման հասկանում հողերի հանձնում: Tert.am-ի հետ զրույցում ասաց ԼՂՀ Նախագահի մամուլի խոսնակ Դավիթ Բաբայանը՝ անդրադառնալով Բակո Սահակյանի հայտարարությանը, թե ԼՂՀ հակամարտության կարգավորման գործում ողջամիտ ու համարժեք փոխզիջումներն անհրաժեշտ են: Բաբայանն ասաց, որ այդ զրույցները տարածում են ավանտյուրիստները: Ըստ նրա՝ հողերի մասին խոսելով պետք է հասկանալ սահմանների հարցը, որը միակողմանի չէ:

- Այսօր Ֆրանսիայի խորհրդարանի էլեկտրոնային թերթին տված հարցազրույցում ԼՂ նախագահ Բակո Սահակյանը, պատասխանելով փոխզիջումների մասին հարցին, ասել է. «Ողջամիտ, իրավացի և համարժեք փոխզիջումներն անհրաժեշտ են: Մենք պատրաստ ենք անել փոխզիջումներ, եթե դրանք չեն խաթարում մեր երկրի անվտանգությունը, եթե դրանք չեն հանդիսանում պատեհ առիթներ մեր հակառակորդի համար՝ մեզ վրա նոր հարձակումներ գործելու»։ Ի՞նչ նկատի ունի Բակո Սահակյանը փոխզիջումներ ասելով:

- Այսպես կոչված համաձայնեցված, բոլոր կողմերի համար ընդունելի տարբերակը չպետք է հանգեցնի Արցախի անվտանգության  համակարգի փոքր-ինչ թուլացմանը: Չի կարող խոսք լինել մեր ինքնիշխանության մասին: Իսկ սա արդեն լայն խնդիր է, շատ համապարփակ: Հասկացողը կհասկանա՝ ինչի մասին է խոսքը:

- Շատ են հարցադրումները՝ արդյոք փոխզիջումային տարբերակը տարածքների հանձման գնով է ձեռք բերվելու: 

- Ինչո՞ւ եք դուք փոխզիջման տակ անպայման հասկանում հողերի հանձնում: Ինչո՞ւ եք լսում ինչ-որ ավանտյուրիստների, որոնք անընդհատ խոսում են այդ հարցի մասին՝ չհասկանով ինչի մասին է խոսքը, շահարկելով այս ամենը: Երբ խոսում են հողերի մասին, պետք է հասկանալ, որ խնդիրը հողերի մեջ չէ, սահմանների մեջ է: Հիմա մենք չենք կարող չէ՞ Ադրբեջանին ասել՝ հրաժարվի՛ր հողային պահանջներից: Ստիպված համանախագահները պետք է Ադրբեջանի կողմից առաջ քաշված թեզերը քննարկման դնեն: Որովհետև դա իրենց ցանկությունը չէ, պարտականությունն է, հետևաբար, ստիպված, ուզած-չուզած այդ հարցը պետք է քննարկվի: Բայց դա միակողմանի չէ: Մենք էլ ունենք բազմաթիվ խնդիրներ սահմանների հետ կապված. Շահումյանի շրջանի խնդիրը, Գետաշենի, Հյուսիսային Արցախը, Չարդախլուն, մնացած գյուղերը, Մարտակերտի հատվածը… Ինչո՞ւ եք այդ սահմանների հարցը նայում լոկ Արցախի պարագայում ու ավանտյուրիստներին լսում:

- Ուզում եք ասել, որ իրականում մենք ստանալիք ունե՞նք:

- Իհարկե, բա այդ մասին է խոսքը, որ սա միակողմանի չէ, որ պետք է դիտարկել հարցն ավելի լայն: Որոշ մարդիկ, որպեսզի իրենց մասին հիշեն, հայրենասեր երևան, հողերի հանձման մասին են խոսում: Բայց խոսելով չեն այդ հարցը լուծում: Եթե որևէ մեկը մտածում է, որ այստեղ մարդիկ կան, ովքեր հող են հանձնում, չարաչար սխալվում են: Սովորաբար նա, ով գոռում է, բղավում է, երբևիցե չի պաշտպանում իր հողը: 

Հարցազրույցն ամբողջությամբ՝ սկզբնաղբյուր կայքում

Աղբյուր` Փաստինֆո