Փաստ ինֆո

2016թ. օգոստոսի 12-ին կալանավորումն որպես խափանման միջոց ընտրելու նախաքննական մարմնի միջնորդության քննարկման դատական նիստին «Սասնա Ծռեր» խմբի անդամ Սեդրակ Նազարյանին տեղափոխելուց հետո նրա ինքնազգացողությունն ավելի է վատացել:

Այս մասին ՖԲ-ում իրենց գրառման մեջ նշում են Ս.Նազարյանի պաշտպաններ, փաստաբաններ Լուսինե Սահակյանն ու Երվանդ Վարոսյանը: Ըստ նրանց, իրենց պաշտպանյալին ինքնաձիգներով զինված ոստիկանների պահանջով դատական նիստերի դահլիճ են բերել քայլելով, ապա միայն ուղեկցող բժշկի վճռական պահանջից հետո դատարանի դահլիճ է բերվել պատգարակ, Ս.Նազարյանին է միացվել թթվածին:

Դատական նիստի գրեթե ողջ ընթացքում վատ ինքնազգացողության պատճառով Ս.Նազարյանը եղել է քնած:

Պաշտպանները նշում են, որ դատական նիստը հետաձգելու, հիվանդանոցում արտագնա դատական նիստ անցկացնելու մասին պաշտպանական կողմի միջնորդությունները դատարանը մերժել է:

«Զուտ անձի ֆիզիկական ներկայությունը դատական նիստին ապահովելու համար նման առողջական վիճակում գտնվող անձի նկատմամբ նման վերաբերմունքն ակնհայտ անմարդկային է:

Գիշերային ժամին անցկացնելով դատական նիստը՝ արդեն 13.08.2016թ. ժամը 3.30 սահմաններում դատարանը հրապարակեց որոշումը քննիչի միջնորդությունը բավարարելու և Սեդրակ Նազարյանի նկատմամբ որպես խափանման միջոց կալանավորումը երկու ամիս ժամկետով կիրառելու մասին:

Ս.Նազարյանին գրավով կալանքից ազատելը ճանաչվեց անթույլատրելի: Դատարանի դահլիճից Ս.Նազարյանը ժամը 4.00-ի սահմաններում տեղափոխվել է «Դատապարտյալների հիվանդանոց» ՔԿՀ»,- նշում են պաշտպանները՝ հավելելով, որ համաձայն «Էրեբունի» բժշկական կենտրոնի տեղեկանքի, Ս.Նազարյանի մոտ ախտորոշված է «կրծքավանդակի աջ կեսի միջանցիկ, թափանցող հրազենային վիրավորում, աջ թոքի վերին բլթի և ներքին քնային զարկերակի և երակի վնասումով: Սուբտոտալ հեմաթորաքս, պնևմոթորաքս: Արտաքին և ներքին արյունահոսություն: Հեմոռագիկ շոկ 2-3-րդ աստիճանի: Ձախակողմյան ստորբլթային թոքաբորբ»:

Թեև ակնհայտ է, որ նման ախտորոշմամբ անձն ունի հատուկ մասնագիտացված բժշկական հաստատությունում բուժման կարիք, այնուամենայնիվ Ս.Նազարյանը շարունակում է պահվել «Դատապարտյալների հիվանդանոց» քրեակատարողական հիմնարկում:

«Անգամ նման առողջական վիճակում գտնվող Ս.Նազարյանը խնդրել է բոլորին տեղեկացնել, որ շնորհակալ է ուշադրության ու անհանգստության համար, անպայման ապաքինվելու է, վճռական է ցանկացած պայմաններում շարունակել պայքարը հանուն մեր բոլորի երազած Հայաստանի Հանրապետության»,- նշվում է պաշտպաններ Լուսինե Սահակյանի և Երվանդ Վարոսյանի գրառման մեջ:

Աղբյուր` Փաստինֆո