Փաստ ինֆո

Հանրությունն ու իրավակիրառողներն, իհարկե, պատրաստ չէին բարոյական վնասի իրավակարգավորումների ներդրմանը, բայց եթե դրանք չկիրառվեն, երբեք պատրաստ չեն էլ լինի: «Փաստինֆո»-ի լրագրողի հետ զրույցում այսպիսի տեսակետ հայտնեց «Կոնցեռն-Դիալոգ» փաստաբանական գրասենյակի փաստաբան Արամ Օրբելյանը:

Փաստաբանը նշեց, որ նույն բանը տեղի ունեցավ և մինչև հիմա էլ դեռևս շարունակվում է զրպարտության և վիրավորանքի գործերով: Ըստ Ա.Օրբելյանի՝ ԶԼՄ-ներն այդ գործերով իրավակարգավորումները գնահատեցին որպես ԶԼՄ-ներին լռեցնելու փորձ:

«Մինչև հիմա որոշ ԶԼՄ-ները շարունակում են այդպես կարծել, մի մասն էլ ընկալեց, որ ԶԼՄ-ն պետք է լինի պատասխանատու, չի կարող ամեն ինչ հրապարակել, իսկ հրապարակելուց էլ հղումների վրա պետք է ուշադրություն դարձնել»,- հավելեց Ա.Օրբելյանը:

Փաստաբանը նշեց, որ օրենսդրությամբ նշվում է, որ ոչ նյութական վնասի հատուցման չափը որոշում է դատարանը՝ ողջամտության, արդարացիության և համաչափության սկզբունքների հիման վրա: Փաստաբանը չի պատկերացնում, թե դատարանը ռեալ ինչպես է հաշվարկելու բարոյական վնասի ողջամիտ ու արդարացի հատուցման չափը:

Օրինակ՝ եթե մեկ անձ անազատության մեջ է պահվել հինգ ամիս քսան օր, իսկ մյուսը մեկ օրով ավելի, արդյո՞ք ավտոմատ վերջինիս ավելի շատ փոխհատուցում է նշանակվելու, թե՝ ոչ:

Ա.Օրբելյանը նշեց, որ համոզված չէ, որ իրավակիրառողները անհրաժեշտ ծավալով անցել են բարոյական վնասի ինստիտուտի ներդրմանն առնչվող դասընթացները, «բայց տպավորությունս այն է, որ դա երբեք չի կարող բավարար լինել»:

Ըստ նրա՝ հրապարակվող գիտական, գիտապրակտիկ նյութերում ինքը չի տեսել որևէ հրապարակում, հոդված, նյութ, որն ուղղված կլինի դրան:

Աղբյուր` Փաստինֆո