Փաստ ինֆո

Օրերս ազատ արձակվելուց հետո լրագրողների հետ զրույցում ՀԽ անդամ, ԱՍԱԼԱ-ի նախկին անդամ Ալեք Ենիգոմշանը նշել էր, որ մեր երկիրն այսօր գտնվում է չափից ավելի խոր ճգնաժամի մեջ, և որ մենք, որպես ազգ, որպես պետություն, գտնվում ենք էքզիստենցիալ գոյութենական խնդրի առջև:

«Առաջին լրատվական»- ի հետ զրույցում Ա. Ենիգոմշյանը, անդրադառանալով իր այս դիտարկմանը, պարզաբանեց, որ այսօրվա էքզիստենցիալ վտանգը հետապրիլյան կամ հետհուլիսյան զարգացումների իրականությունը չէ, այլ այդ վիճակն առկա է վերջին տարիներին. «Չնայած տարեցտարի, օրեցօր ավելի է սրանում այդ վտանգը և այդ վիճակը: Այդ էքզիստենցիալ վտանգն առնչվում է Հայաստանի պետականությանը, որովհետև անկախ այն հարցից, թե 91-ին ՀՀ-ն ինչ չափով անկախ երկիր դարձավ, այդտեղ չէ հիմնական խնդիրը, գնալով մենք շերտ առ շերտ մեր երկրի գերիշխանությունը զիջում ենք օտար ուժերի, հիմնականում մեկ ուժի, և դրանով մեր պետականությունն արդեն հասնում է իր գոյութենական հարցադրման առջև:Այդ ուժը միակը չէ, բայց հիմնականում Ռուսաստանն է. սա փաստ է, գերիշխանությունը շերտ առ շերտ տրվում է Ռուսաստանին: Մենք հասել ենք այնպիսի մի փուլի, իհարկե, դա պաշտոնական բնույթ չի կրում, բայց բացահայտ խոսվում է Հայաստանը ռուսական ինչ-որ նահանգի կցորդ դարձնելու մասին: Մենք գիտենք, թե որտեղից են սկսվում գործընթացները:

Անկախ պետականությանը սպառնացող գոյութենական վտանգից, մենք, որպես Հայաստան երկիր, իբրև հայ ազգ՝ աշխարհով սփռված, այդ գոյութենական խնդրի առաջ ենք գտնվում, դա գալիս է Հայաստանի վարչախմբի կողմից երկրի գերիշխանությունը և ամեն ինչը արտաքին ուժերին հանձնելու հանգամանքից, դրան զուգահեռ նաև ներքին, ներսում տիրող համակարգից, դրա մեջ մտնում է նաև Արցախի խնդիրը, որը հատուկ նշանակություն ունի. Արցախին սպառնացող վտանգը մեծ պոտենցիալ ունի արագացնելու այդ ճգնաժամը»:

Ալեք Ենիգոմշյանը, անդրադառնալով դիտարկմանը, որ իրենց սկզբնական պահանջներում «Սասնա ծռեր»-ը չէին խոսում Ռուսաստանի դեմ ապագաղութացման մասին, սակայն որոշակի փուլից սկսած՝ Վ. Ավետիսյանը հայտարարեց, որ սա ապագաղութացման պայքար է, նշեց, որ կարող է շեշտադրումը չկար, բայց բովանդակային իմաստով այդ միտքը եղել է առաջին օրվանից. «Երբ խոսվում է վստահության կառավարության մասին, դա պետք է ունենա մի քանի գործառույթներ, որոնցից մեկը Հայաստանի ինքնիշխանությունը վերահաստատելը կամ հաստատելն է: Ինքնիշխանության արժեքային իմաստը պետք է հասկանալ միմիայն Հայաստանի ապագաղութացումով: Այսինքն՝ վստահության կառավարություն գաղափարն իր մեջ ներառում է մի շարք գաղափարներ ու սկզբունքներ: Թե ինչու վերջին օրերին դա ավելի շեշտադրվեց, դա կապված է նաև այն զարգացումների հետ, որոնք վերջին օրերին ավելի սուր բնույթ ստացան Մոսկվա- Անկարա-Բաքու շրջանակներում, և որոնք շատ ավելի սրեցին այդ վտանգը ևս մեկ անգամ՝ Հայաստանի ինքնիշխանության և նաև գոյութենական իմաստով վտանգը:

Մանրամասները՝ սկզբնաղբյուր-կայքում և տեսանյությում

Աղբյուր` Փաստինֆո