Փաստ ինֆո

Շորթման մեջ մեղադրվող Արտակ Գալստյանն ծանոթացել է իր կողմից հարգված կայքերից մեկի «Զրպարտե՞լ են» հրապարակմանը և շնորհավորական ուղերձ հղել Երևանի նախկին ոստիկանապետ Ներսես Նազարյանին:

«Սույն տեքստը՝ շնորհավորական ուղերձը, գրված է իմ՝ Արտակ Գալստյանիս, ձեռքով, գրված է մաքուր սրտով, իր մեջ չի պարունակում շորթման հանցակազմ, զրպարտություն, տրվում է իմ փաստաբաններին, իմ հանձնարարությամբ հրապարակելու համար»,- նշվում է այսօրվա ուղերձում:

Ինչպես նշում է Արտակ Գալստյանը, hraparak.am-ի հրապարակման մեջ նշված է, որ այժմ ընթացող նախաքննության ընթացքում պարզվել է, որ ինքը՝ Արտակ Գալստյանը զրպարտել է Ն.Նազարյանին իսկ ՀՀ ոստիկանապետը իր աշխատակցին պաշտպանելու փոխարեն  «կրակի վրա յուղ է լցրել»: Սակայն այժմ քննվող քրեական գործի նյութերը  Ն.Նազարյանը ներկայացրել է ՀՀ նախագահին, ով ծանոթացել է այդ նյութերի հետ, համոզվել, որ Ն.Նազարյանը զրպարտված է, հաշտվել է նրա հետ և նշանակել նոր պաշտոնի՝ Երևանի հրշեջների պետ:

«Ի  դեպ, նշվում է նաև, որ Ն.Նազարյանը այն աստիճան է հաշտվել իշխանության հետ, որ շուտով կնշանակվի բարձր պաշտոնի ՀՀ ոստիկանությունում»,- նշում է շնորհավորական ուղերձի հեղինակը:

Ըստ Արտակ Գալստյանի, հաշվի առնելով հրապարակման մեջ նշված մանրամասները, միանշանակ կարելի է կարծիք կազմել, որ կայքի տեղեկատվության աղբյուրը  Ներսես Նազարյանն է, քանի որ դժվար է պատկերացնել, որ Ն.Նազարյան-Ս.Սարգսյան հանդիպմանը այլ մարդ է ներկա եղել:

«Ի դեպ, կայքի աղբյուրը նշում է, որ Ն.Նազարյանը կարողացել է հաշտվել ՀՀ նախագահի հետ  միայն իմ կալանավորվելուց հետո՝ քննության ընթացքում ձեռք բերված նյութերը որոնք ապացուցում են, որ ինքը զրպարտված է ՀՀ նախագահին ներկայացնելով:

Բուն իմաստով, այս հրապարակումը ապացուցում է այն փաստը, որ այժմ քննվող քրեական գործը ունի մեկ նպատակ, վերանայել հայտնի «ֆինանսական բուրգ»-ի գործով օրինական ուժ ստացած դատական ակտի արդյունքները: Այդ արդյունքներով Ա.Անդրեասյանի կողմից ինձանից հափշտակված գույքերը, որոնք որ գտնվում են Կարեն Բաբակեխյանի կնոջ և Ներսես Նազարյանի քրոջ՝ Դ.Նազարյանի  տիրապետման տակ, պետք է վերադարձվեն իրենց: Ի դեպ, այս մասին մենք հայտարարել ենք և նախաքննությանը և դատարանում:

Ն.Նազարյանի զրպարտված լինելու մասով ցանկանում եմ փաստել հետևյալը՝ «ֆինանսական բուրգ»-ի գործով նախաքննությունը ավարտվել է 2013թ-ին: Կայացվել է քրեական հետապնդումը դադարեցնելու մասին որոշում՝ իմ մասով՝ սուտ մատնության, Ն.Նազարյանի մասով՝ վաշխառության և խարդախության հանցակազմերի բացակայության հիմքով:

Այսինքն՝ դեռևս 2013թ-ին ակնհայտ է եղել և ապացուցվել, որ ես Ն.Նազարյանին չեմ զրպարտել, իսկ վերջինս էլ խարդախ և վաշխառու չէ, զրպարտված չէ:

Ն.Նազարյանի պաշտոնանկությունը ՀՀ ոստիկանապետը հիմնավորեց ծառայության և բիզնեսի սերտաճման անթույլատրելիությամբ: Այն, որ ոստիկանապետը չէր սխալվել լավագույնս ապացուցվեց Ն.Նազարյանի պաշտոնանկությունից հետո տեղի ունեցող զարգացումներով:

Ն.Նազարյանի ընտանիքին պատկանող «Մոսկվիչկա» սուպերմարկետները փակվեցին, մատակարարների գումարները, որը կազմում է մի քանի հարյուր միլիոն դրամ՝ չտրվեցին և Նազարյանների բիզնեսը  հայտարարվեց սնանկ: 

Փաստացի ապացուցվեց, որ Նազարյանի բիզնեսը ծաղկում էր՝ քանի դեռ նա Երևան քաղաքի վարչության պետն էր, բավական էր, որ նա պաշտոնանկ արվեր և նրա ծաղկուն բիզնեսը սնանկացավ և ահռելի նյութական վնաս հասցրեց մեր քաղաքացիներին: Այսինքն՝ ոստիկանապետը ճիշտ էր, Ն.Նազարյանը ծառայությունը համատեղել էր, արդյունքում այդ երկուսը սերտաճել էին, որն անթույլատրելի էր: Այս պարագայում ոստիկանապետի կողմից օրենքի տառի պահպանումը նյութի աղբյուրի կողմից, որպես կրակի վրա յուղ լցնել անվանելն, իմ կարծիքով, ուղղակի ցինիզմ է:

ՀՔԾ-ում այսօր քննվող գործով Ն.Նազարյանի մասով քննություն չի իրականացվում, գոնե թե ես այդ մասին տեղյակ չեմ, չեմ հարցաքննվել: Սակայն եթե հավատանք կայքի աղբյուրին, այնուամենայնիվ Ն.Նազարյանը ՀՀ նախագահին, իր զրպարտված լինելը հիմնավորող նյութեր ներկայացրել է:

Փաստացի ստացվում է, որ ըստ նյութի աղբյուրի, ՀՔԾ-ումընթանում է մի թաքնված քննություն, իմ գործի շրջանակներում, որի նպատակը Ն.Նազարյանի զրպարտված լինելը ապացուցելն է:

Քրեական գործի ավարտ դեռ չի հայտարարվել, թե որտեղից են նախաքննության գաղտնիք հանդիսացող նյութերը հայտնվել Ն.Նազարյանի ձեռքում, մնում է միայն կռահել: Եթե այս տեղեկատվությունը ճիշտ է, ապա նախաքննության մարմինը թույլ է տվել օրենքի կոպիտ խախտում:

Կա ևս մեկ հանգամանք. ես համոզված եմ, որ ՀՀ ոստիկանապետը առանց փաստերի ստուգման միայն «զրպարտության» հիման վրա Երևան քաղաքի վարչության պետին պաշտոնանկ չէր անի: Նյութի աղբյուրի այդ պնդումը համարում եմ ուղղակի վիրավորանք ՀՀ նախագահի և ՀՀ ոստիկանապետի հանդեպ, որովհետև երկրի բարձրագույն իշխանության որոշումների կայացման հիմքում փորձ է արվում դնել սովորական փողոցային բամբասանքը:

Անդրադառնալով շնորհավորանքիս, ցանկանում եմ նշել, որ այն իրոք անկեղծ է, առանց հեգնանքի և հետին մտքի:

Ն.Նազարյանի պաշտոնանկությունից հետո, նրա ընտանիքի բիզնեսը սնանկացավ, փոխաբերական իմաստով այնտեղ հրդեհ բռնկվեց, որին կարելի է նորից փոխաբերական իմաստով շնորհել 7-րդ աստիճանի բարդության հրդեհի կարգավիճակ, որովհետև այդ հրդեհի արդյունքում բազմաթիվ մատակարարներ կորցրեցին ահռելի գումարներ:

Իմ կարծիքով, իշխանությունը Ն.Նազարյանին Երևան քաղաքի հրշեջների պետ նշանակելով հույս է ունեցել, որ վերջինս կօգտագործի իր նոր պաշտոնի հնարավորությունները, արագ կհանգցնի իր բիզնսներում բռնկված հրդեհը և վերջապես կվերադարձնի իր ահռելի պարտքերը մեր քաղաքացիներին: Խոսքը վերաբերվում է Ն.Նազարյանի ընտանիքին պատկանող բիզնես կառույցների ՀՀ քաղաքացիներին և տնտեսվարող սուբյեկտներին ունեցած պարտքերին:

Այդ իսկ պատճառով սրտանց շնորհավորում եմ Ն.Նազարյանին նոր պաշտոնի հետ կապված, ցանկանում եմ աշխատանքային հաջողություններ, ինքս մոմ կվառեմ, որ մի օր առաջ Ն.Նազարյանը հանգցնի, մարի իր ընտանիքին պատկանող բիզնեսներում բռնկված հրդեհը և վերջապես վերադարձվեն մատակարարների գումարները՝ հայրերը միշտ պատասխանատու են որդիների համար:

Որպես իմ բարի կամքի ապացույց ցանկանում եմ նաև նշել, որ պետք չէ հանգցնել կրակը, որի վրա յուղ է լցրել ՀՀ ոստիկանապետը, այդպիսի բան չկա և նյութի աղբյուրի կողմից արտահայտված այդ միտքը, դա հիվանդ մարդու երևակայության արդյունք է: Այս ուղղությամբ շեղվել պետք չէ»,- նշել է շնորհավորող Արտակ Գալստյանն իր ուղերձում:

«Փաստինֆո»-ին ուղերձի տեքստը տրամադրել է Արտակ Գալստյանի պաշտպան, փաստաբան Սուսաննա Սարգսյանը:

Աղբյուր` Փաստինֆո