Փաստ ինֆո

Գյումրիում Ավետիսյանների ընտանիքի անդամների դաժան սպանության գործով այսօրվա դատական նիստում մեղադրող Գևորգ Գևորգյանը միջնորդել է ռուսական ռազմաբազայի զինծառայող Վալերի Պերմյակովին մեղավոր ճանաչել մեղադրանքի ողջ ծավալով ու դատապարտել ցմահ ազատազրկման:

Հիշեցնենք, որ Պերմյակովը մեղադրվում է ՀՀ քրեական օրենսգրքի 104-րդ հոդվածի 2-րդ մասի 1-ին, 5-րդ, 8-րդ կետերով՝ ավազակությամբ զուգորդված, առանձին դաժանությամբ, երկու կամ ավելի անձանց սպանությունը, ՀՀ քրեական օրենսգրքի 175-րդ  հոդվածի 2-րդ մասի 3-րդ, 4-րդ կետերով՝ բնակարան ապօրինի մուտք գործելով, զենքի գործադրմամբ, ավազակությունը, և ՀՀ քրեական օրենսգրքի 34-329-րդ հոդվածի 1-ին մասով՝ պետական սահմանն ապօրինի հատելու փորձ:

Մինչ այդ, ինչպես արդեն տեղեկացրել ենք, տուժող կողմի ներկայացուցիչ փաստաբանները միջնորդել են հետաձգել դատական նիստը՝ մինչև քաղհայցը չընդունելու դատարանի որոշման դեմ իրենց վճռաբեկ բողոքի վերաբերյալ որոշման կայացումը, միջնորդությունը մերժվել էր, և տուժողների իրավահաջորդների ներկայացուցիչները լքել էին դատական նիստի դահլիճը:

«Շանթ» հեռուստաընկերության փոխանցմամբ, մասնավորապես, տուժողի իրավահաջորդի ներկայացուցիչ, փաստաբան Լուսինե Սահակյանը հայտարարել է. «Նկատի ունենալով այն հանգամանքը, որ Դուք այն դատավորը չեք, որը կարող է նման գործողություններ անել, որ սրանից հետո դատական նիստերն ուղղակի ձևական բնույթ են կրելու, որպեսզի Դուք վերջապես Ձեր դատական ակտը կայացնեք, որը վերաբերվելու է միայն Պերմյակովին, ես վստահ եմ դրանում: Որևէ անդրադարձ չի լինելու այդ հանցագործությունը ծնող պատճառներին: Մենք գտնում ենք, որ մեր՝ այս դատական նիստին այլևս գտնվելն  անիմաստ է: Մենք լքում ենք այս դատարանի դահլիճը, որովհետև մեր ինքնաբացարկ հայտնելը լրիվ անիմաստ է, որովհետև արդեն հայտնել ենք ու հասկանում ենք, որ Դուք ինքներդ ինքնաբացարկ չեք ընդունելու»:

Աղբյուր` Փաստինֆո