Փաստ ինֆո

Վերջին օրերը բավականին ակտիվ էին տարածաշրջանային զարգացումների առումով, այդ թվում նաև` որոշակի փոփոխությունների, որոնք չեն կարող իրենց նշանակությունը չունենալ տարածաշրջանային ընդհանուր զարգացումների ֆոնին:

Այս կարծիքը լրագրողների հետ այսօրվա հանդիպման ժամանակ հայտնեց ՀՀ ԱԺ պատգամավոր, «Եվրոպական ինտեգրացիա» ՀԿ նախագահ Կարեն Բեքարյանը:

Անդրադառնալով Իրանի, Ադրբեջանի և Ռուսաստանի նախագահների Բաքվում վերջերս կայացած եռակողմ հանդիպմանը, նա, մասնավորապես, նշեց, թե «նկատում ենք տարածաշրջանում ավելի լայն ընդգրկվածության հնարավոր նախերգանք, որը, իհարկե, նաև պետք է հասկանանք, որ դրանք կլինեն արդյունավետ, դրանք կյանքի կոչման հնարավորությունը և հավանականությունն էապես կավելանա, երբ որ տարածաշրջանի բոլոր դերակատարներն այդ քննարկումներում ունենան իրենց մասնակցությունը և մասնաբաժինը»: Կ.Բեքարյանի համոզմամբ` «այդ օրը հեռու չի»:

Բանախոսը նաև ընդգծեց, որ Ադրբեջանի նախաձեռնությամբ կայացած այս հանդիպման արդյունքներով ընդունված հռչակագրում չկա Լեռնային Ղարաբաղին անմիջականորեն վերաբերող որևէ հիշատակում` բացի ընդհանրապես տարածաշրջանի կայունության խնդիրներից:

«Վստահ եմ` բոլորդ պատկերացնում եք, թե որքան մեծ է եղել Ադրբեջանի ցանկությունը, որպեսզի դեկլարացիայում լինի փոխադարձ հարգանքը միմյանց տաածքային ամբողջականության նկատմամբ: Մենք չենք հանդիպում այդպիսի կետ դեկլարացիայում, և հետևաբար` այն ակնկալիքները, որոնք Ադրբեջանն ուներ ոչ թե տնտեսական, ոչ թե քաղաքական բալանսավորման, այլ հենց ղարաբաղյանի հետ կապված, կարելի է ասել` եռակողմը զերծ մնաց նրա ցանկություններին տուրք տալուց, բնականաբար` ի հաշիվ թե Ռուսաստանի և թե Իրանի»,-ընդգծեց Կարեն Բեքարյանը:

Նա բավականին ավելի հետաքրքրական համարեց Ռուսաստանում Թուրքիայի և Ռուսաստանի նախագահների հանդիպումը` թե քաղաքական և թե' տնտեսական առումով: Ըստ Կ.Բեքարյանի` այս երկու երկրների հարաբերությունների սրացման թուլացումը, իհարկե, Հայաստանի համար դրական միտումներ ունի` հաշվի առնելով, որ Հայաստանի արտաքին սահմանը պահպանվում է ռուս սահմանապահների կողմից, հաշվի առնելով Հայաստանում ռուսական բազայի առկայությունը, ինչպես նաև այն, որ Ռուսաստանը, որի հետ մենք ունենք դաշնակցային և ռազմավարական գործընկերային հարաբերություններ, էապես ավելացնում է իր ազդեցությունը տարածաշրջանում:

Անդրադառնալով նախօրեին Մոսկվայում Ռուսաստանի և Հայաստանի նախագահների երկկողմ հանդիպմանը, Կ.Բեքարյանը, մասնավորապես, նշեց, թե ի թիվս արծարծված հարցերի անդրադարձ կա նաև ղարաբաղյան խնդրին:

«Ղարաբաղյանին անդրադարձը կատարվում է այն համատեքստում, որը վերջին շրջանում` սկսած ապրիլյան սրացումից հետո, նույն բովանդակային գիծն ու ուղղությունն ունի: Այսինքն` ամեն ինչ անել, որպեսզի նոր սրացում հնարավոր չլինի, մարդկանց կյանքին վտանգ չսպառնա, միաժամանկ զարկ տալ քաղաքական գործընթացին և փորձել ունենալ լուծումների այնպիսի ուրվագիծ, որտեղ չեն լինի հաղթողներ, չեն լինի պարտվողներ»,-ասաց Կ.Բեքարյանը:

Լուսանկարը՝ Armenpress-ի

Աղբյուր` Փաստինֆո