Փաստ ինֆո

Պետական դավաճանության վերաբերյալ գործով այսօր դատարանը երեք ամբաստանյալներից երկուսի վերաբերյալ կայացրեց մեղադրական և մեկի վերաբերյալ՝ արդարացման դատավճիռ:

Այսպես, Երևանի Կենտրոն և Նորք Մարաշ վարչական շրջանների առաջին ատյանի դատարանը՝ դատավոր Արշակ Վարդանյանի նախագահությամբ, ամբաստանյալներ Ռաֆիկ Պապոյանին և Կարինե Ղումաշյանին մեղավոր ճանաչեց ՀՀ քրեական օրենսգրքի 299-րդ հոդվածի 1-ին մասով՝ Պետական դավաճանությունը, և դատապարտեց համապատասխանաբար՝ 14 և 12 տարվա ազատազրկման՝ առանց գույքի բռնագրավման:

Դատարանը ճանաչեց ու հռչակեց Ռաֆիկ Պապոյանի որդու՝ Սերգեյ Պապոյանի, անմեղությունն ու արդարացրեց նրան ՀՀ քրեական օրենսգրքի 299-րդ հոդվածի 1-ին մասով առաջադրված մեղադրանքում՝ հանցակազմի բացակայության հիմքով: Նրա նկատմամբ ընտրված «չհեռանալու ստորագրություն» խափանման միջոցը կվերացվի դատավճռի օրինական ուժի մեջ մտնելուց հետո:

Դատարանը պարզաբանեց դատական սխալի հետևանքով խախտված իրավունքի վերականգնման, այդ թվում՝ վնասի փոխհատուցման պահանջով քաղաքացիաիրավական կարգով դատարան դիմելու արդարացվածի իրավունքը:

Հիշեցնենք, որ մեղադրող Արամ Արամյանը միջնորդել էր բոլոր երեք ամբաստանյալներին մեղավոր ճանաչել ՀՀ քրեական օրենսգրքի 299-րդ հոդվածի 1-ին մասով, ամբաստանյալ Ռաֆիկ Պապոյանին դատապարտել 15 տարվա, ամբաստանյալ Կարինե Ղումաշյանին՝ 14 տարվա 6 ամսվա և ամբաստանյալ Սերգեյ Պապոյանին՝ 14 տարվա ազատազրկման՝ գույքի բռնագրավմամբ:

Վերջինիս մասով մեղադրողը միջնորդել էր նաև «չհեռանալու ստորագրություն» խափանման միջոցը փոխել և ընտրել կալանավորումը:

Այսօր մինչ դատարանի խորհրդակցական սենյակ հեռանալը պաշտպանական ճառով հանդես եկավ ամբաստանյալ Կարինե Ղումաշյանի պաշտպան Աշոտ Ապրեսյանը, ով դատական վիճաբանությունների փուլում է ներգրավվել գործում: Ըստ նրա, իր պաշտպանյալին առաջադրված մեղադրանքն ակնհայտ անհիմն է, նախաքննությունը միակողմանի է կատարվել և ոչ օբյեկտիվ, իսկ դատաքննությամբ չի հաջողվել ապացուցել Կ.Ղումաշյանի մեղքը:

Մասնավորապես, ըստ պաշտպանի, Կարինե Ղումաշյանին առաջադրված մեղադրանքն իրականում մեղադրանք է որպես Արման ներկայացած՝ ադրբեջանական հետախուզության աշխատակցի դեմ: Պաշտպանը գտնում է, որ որևէ ապացույց չկա, որ Կարինե Ղումաշյանը կատարել է գործողություն կամ անգործություն է դրսևորել՝ ի վնաս Հայաստանի Հանրապետության ինքնիշխանության, տարածքային անձեռնմխելիության ու արտաքին անվտանգության: Պաշտպանը միջնորդեց իր պաշտպանյալին արդարացնել ու կալանքից ազատել:

Մեղադրողն իր ռեպլիկում հայտարարեց, որ պնդում է մեղադրանքը՝ այն հիմնավորված է հավաստի, փոխկապակցված ապացույցների համակցությամբ, իսկ պաշտպանի մեկնաբանությունները որակեց որպես կամայական:

Կարինե Ղումաշյանն իր հերթին նշեց, որ իրեն մեղավոր չի ճանաչում՝ մարդկանց հետ շփվելը չի կարող Հայրենիքի դավաճանություն համարվել: Ամբաստանյալն ընդգծեց, որ ինքը չէր կարող դավաճանել Աստծուն, որդիներին ու Հայրենիքին:

Նշենք, որ Ռաֆիկ Պապոյանի պաշտպանությունն իրականացրել է պաշտպան Սիրանուշ Հարությունյանը, իսկ դատարանի կողմից արդարացված Սերգեյ Պապոյանի պաշտպանությունը՝ պաշտպան Սուրեն Մնացականյանը:

Աղբյուր` Փաստինֆո