Փաստ ինֆո

Զանգվածային անկարգությունները կազմակերպելու մեջ մեղադրվող Անդրեաս Ղուկասյանը 8-րդ օրն է, ինչ գտնվում է հացադուլի մեջ:

Այդ մասին «Փաստինֆո»-ն տեղեկացավ  ՀՀ ԱՆ քրեակատարողական վարչության հանրային կապերի բաժնից, որտեղից տեղեկացրեցին, որ Անդրեաս Ղուկասյանը հացադուլը սկսել է օգոստոսի 2-ին, նրա առողջական վիճակը գնահատվում է բավարար, և նա գտնվում է բժիշկների հսկողության ներքո:

Այսօր ավելի վաղ ՄԻՊ աշխատակազմի կողմից տարածված հաղորդագրության մեջ նշվում էր նաև, որ Պաշտպանի աշխատակազմի ներկայացուցիչները  այցելություններ են իրականացրել «Նուբարաշեն» ՔԿՀ, որտեղ առանձնազրույց է եղել Անդրիաս Ղուկասյանի հետ:

Ա. Ղուկասյանի հետ կապված, առանձին հանդիպում է տեղի ունեցել նաև քրեակատարողական հիմնարկ բժշկի հետ, ում գնահատմամբ՝ Ա.Ղուկասյանի ճնշումը կայուն է, առողջական վիճակը՝ բավարար:

Ա.Ղուկասյանի կողմից բարձրացվել են իր պահման պայմանների հետ կապված մի շարք հարցեր, որոնց լուծման ուղղությամբ քրեակատարողական հիմնարկի հետ տարվում է համապատասխան համատեղ աշխատանք:

Ավելի վաղ Քննչական կոմիտեն տեղեկացրել էր, որ հուլիսի 29-ին՝ ժամը 22։30-ի սահմաններում, Էրեբունի և Նուբարաշեն վարչական շրջանում մի խումբ անձինք կազմակերպել են  զանգվածային անկարգություններ, որի ընթացքում բռնություն է գործադրվել տվյալ տարածքում ծառայություն իրականացնող ոստիկանության ծառայողների նկատմամբ, ինչի հետևանքով վտանգվել է հասարակական անվտանգությունը։

Զանգվածային անկարգությունները կազմակերպելու և դրանց մասնակցելու կասկածանքով ձերբակալվել էր 23 անձ, որոնց թվում էին նաև Արմեն Մարտիրոսյանը և Անդրիաս Ղուկասյանը:

Իսկ ավելի ուշ Անդրիաս Ղուկասյանին մեղադրանք առաջադրվեց ՀՀ քրեական օրենսգրքի 225-րդ հոդվածի 1-ին և 2-րդ մասերով, նրա նկատմամբ որպես խափանման միջոց ընտրելով կալանավորումը:

Աղբյուր` Փաստինֆո