Փաստ ինֆո

Գեղարքունիքի մարզի ընդհանուր իրավասության դատարանի դատավճռով՝ ՀՀ քրեական օրենսգրքի 315-րդ հոդվածի 1-ին մասով մեղադրվող Ճամբարակի առողջության կենտրոնի քիթ-կոկորդ ականջաբան անպարտ է ճանաչվել և արդարացվել՝ արարքում հանցակազմի բացակայության հիմքով:

Ինչպես ավելի վաղ տեղեկացրել էինք՝ ըստ մեղադրանքի՝ Ճամբարակի առողջության կենտրոնի քիթ-կոկորդ ականջաբան Ռոզա Ավալյանը ընդգրկված է եղել Ճամբարակի զինկոմիսարիատի զորակոչային հանձնաժողովի կազմում, և օժտված լինելով ժամկետային պարտադիր զինվորական ծառայության զորակոչի ընթացքում զորակոչային տարիքի արական սեռի ՀՀ քաղաքացիների անվճար ատամնաբուժական հետազոտություն կատարելու իրավասությամբ, Գեղարքունիքի մարզի Այգուտ գյուղի բնակիչ Նվեր Հովհաննիսյանի ատամնաշարի հետազոտություն կատարելիս, ծառայության նկատմամբ անփույթ վերաբերմունք է դրսևորել, որի հետևանքով պատշաճ կերպով չի կատարել իր պարտականությունները:

Մասնավորապես, չի հայտնաբերել Ն. Հովհաննիսյանի մոտ առկա զինվորական ծառայության համար ոչ պիտանի ճանաչվելու համար հիմք հանդիսացող «Վերին և ստորին ծնոտների մասնակի երկրորդային ադենտիա» 7 ծամիչ՝ ստորին, 3 ծամիչ՝ վերին ծնոտների վրա, ծամողական ֆունկցիայի չափավոր խանգարումով» հիվանդությունը:

Քիթ-կոկորդ ականջաբանը, ով ատամնաբույժի պարտականություններ է ստանձնել՝ Նվեր Հովհաննիսյանի անձնական գործում կատարել է նրա ատամնաշարի որևէ պաթոլոգիա չունենալու վերաբերյալ, իրավաբանական փաստի ուժ ունեցող գրառում, ինչի հիման վրա Ճամբարակի զինկոմիսարիատում հաստատվել է, որ նա զինծառայության համար պիտանի է 14-07-2015թ. զորակոչվել է ՀՀ զինված ուժեր:

Սակայն ՀՀ ՊՆ կենտրոնական ռազմաբժշկական հանձնաժողովի որոշմամբ Նվեր Հովհաննիսյանը վաղաժամկետ զորացրվել է ՀՀ ԶՈՒ պահեստազոր, իսկ մինչ այդ նա շուրջ 2 ամիս տևողությամբ ծառայել է ՀՀ զինված ուժերում, որով անզգուշությամբ ոտնահարվել են նրա սահմանադրական իրավունքները, իսկ պետության և հասարակության շահերին պատճառվել է էական վնաս:

Ծառայության համար ոչ պիտանի, Գեղարքունիքի մարզի Այգուտ գյուղի բնակչին տրվել է սխալ ախտորոշում, որի հետևանքով վերջինս զորակոչվել է բանակ և շուրջ 2 ամիս ծառայել Զինված ուժերում:

Ըստ դատարանի իրավական վերլուծությունների՝ Ռոզա Ավալյանը որևէ իրավական ակտով օժտված չի եղել ժամկետային պարտադիր զինվորական ծառայության զորակոչի ընթացքում զորակոչային տարիքի արական սեռի ՀՀ քաղաքացիների անվճար «Ատամնաբուժական» հետազոտություն կատարելու իրավասությամբ:
Ավալյանը օժտված է եղել ժամկետային պարտադիր զինվորական ծառայության զորակոչի ընթացքում զորակոչային տարիքի արական սեռի ՀՀ քաղաքացիների անվճար «Քիթ-կոկորդ-ականջի» հետազոտություն կատարելու իրավասությամբ:

Դատարանն արձանագրել է, որ Ավալյանի կողմից կատարված ախտորոշումները և ընդհանրապես նրա կողմից կատարված հետազոտությունների վերաբերյալ համապատասխան հետևությունները պարունակող փաստաթղթերում բացակայում է նրա կողմից կատարված որևէ նշում, որը կվկայեր տուժողի ատամներին վերաբերվող որևէ հիվանդության մասով ամբաստանյալը հանգել է համապատասխան հետևության և նշել է «Պիտանի է» նշումը:

Դատարանն ուշադրություն է հրավիրել այն հանգամանքի վրա, որ համապատասխան փաստաթղթերում Ավալյանի կողմից նշվել է «Պիտանի է» նշումը միայն «Քիթ-կոկորդի» վերաբերվող մասում:

Հետևաբար, նրա կողմից տված ախտորոշումները չէր կարող նպաստել և ուղղորդել զինկոմիսարիատի զորակոչային հանձնաժողովի անդամների կողմից տուժողի ատամներին վերաբերվող մասով որոշումների կայացմանը, չէր կարող առաջացնել, փոփոխել, դադարեցնել իրավական հարաբերություններ, այսինքն Ավալյանի արարքը չէր կարող ունենալ իրավաբանական փաստի ուժ:

Այսպիսով, Ավալյանը ատամնաբուժական հետազոտություն կատարելու մասով, չի ունեցել իր վրա դրված կոնկրետ պարտականություններ և հետևաբար չի իրականացրել իշխանության ներկայացուցչի կամ կազմակերպական-տնօրինչական կամ վարչատնտեսական գործառույթներ:

Բացի այդ դատարանը արձանագրել է, որ դատաքննությամբ հետազոտված ապացույցների համաձայն՝ տուժողի մոտ համապատասխան առողջական խնդիրները հայտնաբերվել է համապատասխան կենտրոնական հավաքակայանում բուժզննության արդյունքում և տուժողը զորակոչվելով ՀՀ զինված ուժեր չի տարվել համապատասխան զորամաս և նրա վրա չի դրվել համապատասխան զինծառայողի պարտականություններ, այլ անմիջապես տեղափոխվել է համապատասխան զինվորական հոսպիտալ, որտեղ կատարված հետազոտությունների արդյունքում, վերը նշված որոշման հիման վրա զորացրվել է ՀՀ ԶՈՒ պահեստազոր:

Հետևաբար անհիմն է այն հետևությունը, որ տուժողը պաշտոնատար անձի սխալի պատճառով ներգրավվել է ռազմաիրավական հարաբերությունների մեջ և շուրջ 2 ամիս տևողությամբ ծառայել է ՀՀ զինված ուժերում: Ըստ դատարանի՝ տուժողը, թեև իրավական առումով հանդիսացել է զինծառայող, սակայն փաստացի, ոչ թե անցել է ծառայության, այլ անցել է բուժզննություն:

Աղբյուր` Փաստինֆո