Փաստ ինֆո

Ընդդիմադիր քաղաքական գործիչ Հովսեփ Խուրշուդյանի ձերբակալության և կալանավորման որոշումները բողոքարկվել են Վերաքննիչ դատարան: «Փաստինֆո»-ի լրագրողի հետ զրույցում Հ.Խուրշուդյանի պաշտպան, փաստաբան Սեդա Սաֆարյանը նշեց, որ ինքն ակնկալիքներ չունի վերադաս դատարանից: «Եթե պայմանականորեն կան մի քանի դատավորներ, որոնց հավատում ես, ես վստահ եմ, որ այդ մի քանի դատավորին էլ թույլ չեն տալու, որ լավը մնան»,- ասաց նա:

Ս.Սաֆարյանը հայտնեց, որ տեղի է ունեցել հեռախոսազանգերի ու տեսակցությունների հետ կապված Խուրշուդյանի իրավունքների սահմանափակում:

Ըստ պաշտպանի, Սարի թաղից բերման ենթարկված Հ.Խուրշուդյանի հարցով չկա կոնկրետացված վիճակ: Այդ պատճառով կոնկրետացման համար պաշտպանը դիմել է վարույթ իրականացնող մարմնին, որպեսզի  Հովսեփ Խուրշուդյանի մասնակցությամբ կատարվի դեպքի վայրի զննություն, նա ցույց տա, թե  ինքն որտե՞ղ է եղել, որտեղի՞ց են իրեն տարել, «հարկադրենք կատարել այնպիսի գործողություններ, որոնց շնորհիվ տեղի ունեցածի իրական պատկերը գոնե մոտ լինի ճշմարտությանը»:

Ինքը՝ Խուրշուդյանը, նկարագրում է, որ քաղաքացիական հագուստով մարդիկ և ոստիկանները երկու կողմից փակել էին դուրս գալու ճանապարհները, և իրենք հարկադրված էին սեփական տների միջով դուրս գալ: Բայց սեփական տների միջով էլ գնալով իրենք հայտնվել են փակուղու մեջ,  տներից ու բակերից սկսվել է մարդկանց որսը: Ըստ պաշտպանի, նպատակը միայն հանրահավաքը ցրելը չի եղել, նպատակն եղել են ձերբակալություններն ու կալանավորումները: 

Արդյունքում Հովսեփ Խուրշուդյանին և մի խումբ տղաների  ոստիկանության աշխատակիցները  բերել, շարել են, այնուհետև Երևանի ոստիկանապետ Աշոտ Կարապետյանը (նա նախօրեին ազատվել է պաշտոնից),  մատնացույց է արել մեկին, մյուսին, մյուսին, անվանական, ում ճանաչել են: «Այստեղ գործողություններ կատարելու խնդիր չի եղել, դրա հարկը չի էլ եղել՝  հինգ րոպե ժամանակ են տրամադրել հանրահավաքը ցրելու համար և սկսվել են բուն գործողությունները: Այդ անհամաչափ ուժի գործադրումը փողոցից սկսած հայտնի է մեզ: Այս պայմաններում ես չեմ ուզում իրավաչափության մասին խոսել, որովհետև իրավաչափության մասին խոսք չի կարող լինել»,- ասաց Սեդա Սաֆարյանը: 

Փաստաբանն ընդգծեց, որ երեք փաստաթղթերում՝ ոստիկանի զեկուցագրում, բերման ենթարկելու ու ձերբակալության արձանագրություններում  սխալ ձևակերպումներում էլ արտահայտվում է «իրենց անխոցելի լինելը, որ, այո՛,  կարող են երեք փաստաթղթերն էլ սխալ լինել, բայց այդ երեք սխալ փաստաթղթով էլ կարող ենք մեր դատարանում հասնել նրան, որ կալանավորում ընտրվի»: Իսկ  փոխկապակցված համագործակցությունը՝ ոստիկանություն- սև համազգեստով մարդիկ- անհամազգեստ ոստիկանության հետ համագործակցող անձինք, դրանց  գումարվում է նաև դատարանը, հանգեցնում է այն եզրակացության, որ դեռևս դեպքերից առաջ բոլորին հավաքել են, ցուցումներ  տվել, բոլորն ունեցել են իրենց դերն այս քաղաքականությունն իրականացնելու գործում:

«Եվ պատկերացրեք, որ բարեհաջող իրագործել են, որևէ մարդ դուրս չի մնացել պատժից »,- ասաց փաստաբանը՝ պարզաբանելով, որ բոլոր քրեական գործերով բոլոր կալանքների որոշումները իրենց մեջ ակնհայտորեն կրում են պատժի տարր:

Ըստ Սեդա Սաֆարյանի, այստեղ խոսել իրավաբանությունից,  հիմնավոր կասկածից ծիծաղելի կլինի, որովհետև ինքը դատարանն էլ դրան ուշադրություն չի դարձրել, գուցե այդ առումով ամաչել են հիմնավոր կասկածին անդրադառնալ:

Փաստաբանը գտնում է, որ դատարանների նկատմամբ հավատի խնդիրը չէ միայն, խոսքը լուրջ հիասթափության մասին է: «Ափսոսում ես  իրավունքի զարգացման գործում քո ներդրումների, քո չարչարանքի, քո տառապանքի համար: Մենք իրավունքը տարիներ հետ շպրտեցինք, այն, ինչ որ ձեռք էինք բերել և կարող էինք զարգացնել, նորից մի թափով, մի ուժով, մի բռնությամբ հետ շպրտվեց: Մենք բռնություն կիրառեցինք նաև իրավունքի հանդեպ»,- ասաց Ս.Սաֆարյանը՝ արձանագրելով, որ իրավունքի բռնության  հետ կապված այսօր կա հուսալքված ժողովուրդ:

Աղբյուր` Փաստինֆո