Փաստ ինֆո

Թուրքիայի «Ժողովուրդների դեմոկրատական» կուսակցության հայազգի պատգամավոր Գարո Փայլանի հետ Tert.am-ը զրուցել է հուլիսի 15-ին Թուրքիայում հեղաշրջման փորձի տապալումից հետո տիրող իրավիճակի, դրան հաջորդող բազմաթիվ ձերբակալությունների հետևանքով առաջացած հասարակական տրամադրությունների և այլ հարցերի մասին:

Ըստ Գարո Փայլանի՝ հիմա Թուրքիայում ապրող ազգային փոքրամասնությունները, ընդդիմադիր համարվող մարդիկ վախի մեջ են ապրում, քանի որ հալածվում են թուրքական իշխանությունների կողմից: Նա հիշատակեց նաև Ստամբուլի քաղաքապետարանի արվեստի ու մասնագիտական կրթության կենտրոնում դասավանդող հայազգի Արի Հերգելին, որին աշխատանքից հեռացրել էին Էրդողանի «հակառակորդ» Ֆեթուլլահ Գյուլենի կառույցի հետ կապ ունենալու պատճառով:

«Այստեղի հայերն իհարկե վախի մեջ են ապրում»,-ասաց Գարո Փայլանը:

Հարցին, թե ինչ մտավախություններ ունի, որպես ընդդիմադիր կուսակցության անդամ՝ նրանց նկատմամբ հալածանքներ կլինե՞ն, Գարո Փայլանը պատասխանեց. «Մենք փորձել ենք մի քանի անգամ կապ հաստատել Էրդողանի և այլ կուսակցությունների հետ, բայց Էրդողանը հանդիպեց միայն երեք՝ «Արդարություն և զարգացում», «Ազգային շարժում» և «Հանրապետաժողովրդական» կուսակցությունների հետ։ «Ժողովուրդների դեմոկրատական» կուսակցության հետ, որի անդամն եմ ես, չհանդիպեց: Սա նշանակում է, որ նրանք դասեր չեն քաղել այս հեղաշրջման փորձից»:

Ըստ նրա՝ հիմա Թուրքիայի նախագահն իր շուրջն է հավաքել ազգայնական կուսակցություններին, որոնք ոչ մի հարաբերություն չեն ցանկանում ունենալ իր՝ «Ժողովուրդների դեմոկրատական» կուսակցության հետ:

«Դա ինձ հույս չի տալիս ապագայի համար, որովհետև թուրքերը լավ հարաբերությունների մեջ չեն հայերի, քրդերի և այլ ազգային փոքրամասնությունների հետ. սա նշանակում է, որ միշտ լինելու է թուրքական ազգայնական, Էրդողանի բռնատիրական պետականություն»,-ասաց Գարո Փայլանը:

Ստամբուլահայ պատգամավորից Tert.am-ը հետաքրքրվեց, թե ինչ փուլում է նրա՝ թուրք ազգայնականների դեմ հարուցած դատական գործը:

Հիշեցնենք, որ Թուրքիայի «Իդեալիստների օջախների» անդամները Բունդեսթագի կողմից Հայոց ցեղասպանությունը ճանաչող բանաձևի ընդունումից անմիջապես հետո նույն օրը ցույց էին կազմակերպել Ստամբուլում Գերմանիայի հյուպատոսարանի դիմաց: Ազգայնականները ձեռքում պահել էին Թուրքիայի և Ադրբեջանի դրոշները և բղավել. «Լավագույն հայը մեռած հայն է»:

«Ես դիմել եմ դատարան, բայց պատասխան չեմ ստացել։ Հեղաշրջման փորձի պատճառով հետաձգվել են դատի հետ կապված գործընթացները, բայց ես նորից հետևողական կլինեմ և այդ գործը ավարտին կհասցնեմ»,-ասաց Գարո Փայլանը:

Ըստ Գարո Փայլանի՝ Թուրքիան Ռուսաստանի հետ իր հարաբերությունները բարելավվում է, որպեսզի Արևմուտքին և ԱՄՆ-ին ցույց տա, որ ինքն ունի այլընտրանքի հնարավորություն: «Էրդողանը դրա համար ունի իր պատճառները. հիմա նա Արևմուտքում համարվում է persona non-grata»,- ասաց նա:

Մանրամասները՝ սկզբնաղբյուր-կայքում

Աղբյուր` Փաստինֆո