Փաստ ինֆո

Աջափնյակ և Դավթաշեն վարչական շրջանների դատարանը՝ դատավոր Վարդան Աբրահամյանի նախագահությամբ, սպանության գործով երեք ամբաստանյալներից երկուսին արդարացրել է ու ճանաչել անմեղ, իսկ մեկի՝ սպանությունը կատարելու մեջ մեղադրվողի, արարքը վերաորակվել է:

Ըստ մեղադրանքի, ամուսիններ Բախշի և Էլմիրա Երիցյանները նախնական համաձայնությամբ, խմբի կազմում ապօրինաբար դիտավորությամբ կյանքից զրկել են Արշավիր Բարսամյանին: Իսկ ըստ Ռաֆիկ Մկրտչյանին առաջադրված մեղադրանքի, նա ամուսիններին մատուցելով տաքսի ծառայություն, կատարված հանցագործության հետքերը թաքցնելու նպատակով օգնել է վերջիններիս, դիակը տեղափոխել են խոհանոց, սակայն իրենց կամքից անկախ հանգամանքներում հանցագործության հետքերը չեն կարողացել թաքցնել, քանի որ հանցանքի կատարման պահին բռնվել են ոստիկանության աշխատակիցների կողմից :

Դատարանը դատավճռով վերաորակել է Բախշի Երիցյանին մեղսագրվող արարքը ՀՀ քրեական օրենսգրքի 104-րդ հոդվածի  2-րդ մասի 7-րդ կետից՝ մի խումբ անձանց կողմից կատարված սպանություն, ՀՀ քրեական օրենսգրքի 105-րդ հոդվածի՝ հոգեկան խիստ հուզմունքի վիճակում կատարված սպանություն, և դատապարտել նրան երեք տարվա ազատազրկման, նրա կինն ու Ռ.Մկրտչյանն արդարացվել են:

Ի դեպ, մեղադրողը իր մեղադրական ճառում բոլոր երեք ամբաստանյալների մասով պնդել է  համապատասխանաբար՝ սպանությունը կատարելու, սպանությանը օժանդակելու և հանցագործությունը պարտակելու մեղադրանքները և միջնորդել տարեց ամուսիններին դատապարտել  տասնյակից ավելի  տարիների ազատազրկման, իսկ սպանությունը պարտակելու մեջ մեղադրվող Ռաֆիկ Մկրտչյանի մասով միջնորդել է նրան դատապարտել երկու տարվա ազատազրկման:

Ռ.Մկրտչյանի պաշտպան, փաստաբան Արմեն Ֆերոյանը «Փաստինֆո»-ի լրագրողի հետ զրույցում հայտնեց, որ դեռևս նախաքննության ընթացքում կատարված  դատահոգեբուժական և դատահոգեբանական համալիր հանձնաժողովային փորձաքննության եզրակացությամբ փորձագետները գտել էին, որ մեղսագրվող արարքը Բախշի Երիցյանը կատարել է աֆեկտի՝ հոգեկան խիստ հուզմունքի, վիճակում, իսկ մեկ փորձագետի մասնակցությամբ կատարված երկրորդ  եզրակացությամբ փորձագետը գտել էր, որ աֆեկտի վիճակ  չի եղել, այսինքն՝ գործում առկա էին իրար էապես հակասող երկու եզրակացություններ: Պաշտպանական կողմը միջնորդել է նշանակել նոր փորձաքննություն, և հանձնաժողովային նոր  փորձաքննության եզրակացությամբ  նորից  հաստատվել էր աֆեկտի վիճակի առկայությունը:

Պաշտպան Արմեն Ֆերոյանը պարզաբանեց, որ հանցագործության պարտակման հանցակազմն առնչվում է ծանր կամ առանձնապես ծանր հանցագործություններին, Բախշի Երիցյանի մեղադրանքը վերաորակելու պարագայում հանցագործությունը դառնում է միջին ծանրության և ինքնաբերաբար պարտակելու մեղադրանքն ի չիք է դառնում:

Աղբյուր` Փաստինֆո