Փաստ ինֆո

Հուլիսի 17-ից հետո կատարված բոլոր իրավախախտումների արձանագրումը, փաստերի հավաքագրումը և դրանց վերացման նպատակով ստեղծվել է Փաստահավաք մասնագիտական խումբ, որին կարող են միանալ փաստաբաններ, իրավաբաններ և ԶԼՄ ներկայացուցիչներ: Այդ մասին ֆեյսբուքյան իր էջում գրառում է կատարել Նորայր Նորիկյանը:

«Հաշվի առնելով ս.թ. հուլիսի 17-ից հետո Հայաստանի Հանրապետությունում ստեղծված իրավիճակը ելնելով այն համոզմունքից, որ անկախ երկրում առկա քաղաքական համակարգի և այն ներկայացնող ուժերի դասավորությունից, Հայաստանի Հանրապետությունում մարդը բարձրագույն արժեք է և նրա անօտարելի արժանապատվությունն իր իրավունքների և ազատությունների անքակտելի հիմքն է,

Հավատարիմ մնալով ՀՀ սահմանադրությամբ ամրագրված այն դրույթի բովանդակությանն ու փիլիսոփայությանը, որ Մարդու և քաղաքացու հիմնական իրավունքների և ազատությունների հարգումն ու պաշտպանությունը հանրային իշխանության պարտականություններն են, իսկ Հանրային իշխանությունը սահմանափակված է մարդու և քաղաքացու հիմնական իրավունքներով և ազատություններով` որպես անմիջականորեն գործող իրավունք,

Նկատի ունենալով Երևան քաղաքում ՀՀ քաղաքացիների կողմից կազմակերպվող ցույցերի և երթերի ընթացքում նրանց իրավունքների զանգվածային խախտումների, բերման ենթարկելու, ծեծի, խոշտանգումների, ազատությունից ապօրինի զրկելու, նրանց տեղաշարժը հանիրավի սահմանափակելու մտահոգիչ և անընդունելի դրսևորումները,

Գիտակցելով, որ անհրաժեշտություն է առաջացել օրինական և թույլատրելի բոլոր միջոցներով կասեցնելու կամ դիմագրավելու հիշատակված հակաօրինական գործողությունների հետագա շարունակությունը,

Մենք՝ սույն հայտարարությունը ստորագրած անձինք արձանագրում ենք,

1.Վերջին օրերի ընթացքում իրավապահ մարմինների գործողություններն ոչ իրավաչափ են, առերևույթ առկա են ՀՀ սահմանադրության և օրենսդրության կոպտագույն խախտումներ, մասնավորապես՝ խախտվում է ՀՀ սահմանադրության 3-րդ, 6-րդ, 23-րդ, 26-րդ, 27-րդ, 39-րդ, 40-րդ, 44-րդ հոդվածների, «Հավաքների ազատության մասին», «Ոստիկանության մասին» ՀՀ օրենքների, ինչպես նաև ՀՀ քրեական դատավարության օրենսգրքի բազմաթիվ հոդվածների պահանջներ:

2.Ապօրինի կերպով խոչընդոտվում է լրագրողների և փաստաբանների մասնագիտական աշխատանքը:

Հաշվի առնելով վերը նշվածը՝

-Դատապարտում ենք ՀՀ քաղաքացիների՝ ՀՀ սահմանադրությամբ ամրագրված իրավունքների սահմանափակման ցանկացած դրսևորում, ում կողմից էլ որ այն կատարվել կամ շարունակվում է կատարվել:
-Իրավասու մարմիններից պահանջում ենք իրենց գործունեությունն իրականացնելիս դուրս չգալ ՀՀ սահմանադրության և օրենսդրության սահմաններից, չխոշտանգել որևէ անձի, չցուցաբերել անմարդկային և նվաստացնող վերաբերմունք որևէ մեկի նկատմամբ, ինչպես նաև ցուցաբերել մարդասիրական վերաբերմունք ազատությունից զրկված բոլոր անձանց նկատմամբ:
-Պատժել լրագրողների և փաստաբանների մասնագիտական գործունեությունը խոչընդոտած բոլոր անձանց և ՀՀ օրենսդրությամբ սահմանված կարգով իրականացնել քրեական հետապնդում նրանց նկատմամբ,
-Ձեռնպահ մնալ ՀՀ քաղաքացիների ազատ տեղաշարժի որևէ չհիմնավորված սահմանափակման, նրանց ապօրինի բերման ենթարկելու դատապարտելի քայլերից, ինչպես նաև ազատել խաղաղ պայմաններում ցույցերին և երթերին մասնակցած և բերման ենթարկված անձանց,
-Չխոչընդոտել իրավաբանական օգնություն ստանալու նպատակով այդպիսի ցանկություն հայտնած որևէ անձի:
Ելնելով ստեղծված իրավիճակի առանձնահատկություններից, մտահոգվելով իրավակարգի խաթարման այսպիսի դրսևորումներից, կարևորելով օրինականության պահպանման ու հարգման սկբունքները, սույն հայտարարության հեղինակները անհրաժեշտ են համարում ստեղծել Փաստահավաք մասնագիտական խումբ՝ որի հիմնական առաքելությունը լինելու է ս.թ. հուլիսի 17-ից հետո կատարված բոլոր իրավախախտումների արձանագրումը, փաստերի հավաքագրումը և դրանց վերացման նպատակով համապատասխան մասնագիտական քայլերի ձեռնարկումը:

Փաստահավաք մասնագիտական խումբը պատրաստակամ է համագործակցելու շահագրգիռ իրավապաշտպան կազմակերպությունների և անհատների հետ:

Հայտարարությունը բաց է ստորագրման համար բոլոր փաստաբանների, իրավաբանների և ԶԼՄ ներկայացուցիչների համար:

Առաջիկա օրերի ընթացքում կձևավորվի աշխատանքային խումբ, որը պարբերաբար կտեղեկացնի հանրությանը կատարված աշխատանքների մասին:

Հ.Գ. Հայտարարությանը միանալ ցանկացող անձինք կարող են արձագանքել՝ նշելով՝ «Միանում եմ» բառակապակցությունը:

Աղբյուր` Փաստինֆո