Փաստ ինֆո

«Armsport.am»-ի հաղորդմամբ` Հայաստանի ազգային հավաքականի եւ անգլիական «Մանչեսթեր Յունայթեդի» կիսապաշտպան Հենրիխ Մխիթարյանը The Telegraph-ին տված հարցազրույցում խոսել է իր հոր՝ Համլետ Մխիթարյանի մասին:

«Հայրս է իմ շարժիչ ուժը: Երբ ես փոքր էի, նա պրոֆեսիոնալ ֆուտբոլ էր խաղում, ես միշտ երազում էի նրա հետ միասին մարզումների գնալ:

Երբ ընտանիքով վերադարձանք Հայաստան, իմ երազանքն էր շարունակել նրա աշխատանքը եւ դառնալ ֆուտբոլիստ: Նրա մահը մեծ ցավ էր, սակայն սա կյանք է, որը շարունակվում է:

Հուսով եմ, որ հայրս երկնքից տեսնում է, թե ես ինչպիսի աշխատանք եմ կատարում: Բազմիցս դիտել եմ նրա մասնակցությամբ հանդիպումները, սակայն հիմա ֆուտբոլում շատ բան է փոխվել: Հիմա ես դիտում եմ նրա հանդիպումները միայն այն բանի համար, որ հիշեմ, թե նա ինչպես է խաղացել:

Ցավալի է, սակայն հայրս կարող էր ինձ օգնել խոսքերով եւ խորհուրդներով: Մի կողմից նրա մահն ինձ ստիպեց ավելի արագ հասունանալ, մյուս կողմից՝ ոչ, քանի որ դժվար է մեծանալ առանց հոր, քանի որ ընտանիքում դու չունես իսկական տղամարդ, ով կկարողանար քեզ դաստիարակել:

Ամեն դեպքում, իմ մայրն ինձ համար դարձավ ե՛ւ մայր, ե՛ւ հայր, ու ես շնորհակալ եմ նրան եւ բոլոր այն մարդկանց, ովքեր դժվար պահերին իմ կողքին են եղել»,- ընդգծել է Մխիթարյանը:

Աղբյուր` Փաստինֆո