Փաստ ինֆո

Պարեկապահակային ծառայության գնդի տարածքում տեղի ունեցած փոխհրաձգության հետևանքով հրազենային վիրավորում ստացած զինված խմբի անդամներ Պավել Մանուկյանի և նրա որդի Արամ Մանուկյանի վիճակը գնահատվում է ծանր: Փոխհրաձգությունից հետո նրանք տեղափոխվել են «Էրեբունի» բժշկական կենտրոն, որտեղ վիրահատվել են:

«Ժամը 1-ին «Էրեբունի» բժշկական կենտրոն ընդունվել է երեք վիրավոր, որից մեկը ոստիկանության աշխատող է եղել, ունի սրունքի հրազենային վնասվածք: Կատարվել են համապատասխան միջամտություններ, իր վիճակը գնահատում ենք կայուն: Ընդունվել են նաեւ Պավել Մանուկյանը և Արամ Մանուկյանը, որոնք անմիջապես տեղափոխվել են վիրահատարան և կատարվել են վիրահատություններ», - լրագրողներին ասել է «Էրեբունի» բժշկական կենտրոնի գործադիր տնօրեն Միքայել Մանուկյանը:

Փոխհրաձգության արդյունքում վիրավորվել է իրավապահներից մեկը, ինչպես նաև՝ Պավել Մանուկյանն ու նրա որդին

Պավել Մանուկյանը հրազենային վնասվածքն ստացել է զույգ ազդրերի շրջանում, բացի այդ նրա մոտ ախտորոշվել է աջ ազդրի բազմաբեկոր կոտրվածքով, իսկ Արամ Մանուկյանն ընդունվել է ձախ ազդրի վերին երրորդականի հրազենային վնասվածքով: Մանուկյանները գտնվում են վերակենդանացման բաժանմունքում:

«Այս պահին երկու տուժածի վիճակն էլ գնահատում եմ իբրև ծանր, սակայն կայուն և վերահսկելի: Երկուսն էլ գտնվում են արհեստական շնչառության պայմաններում», - ասել է Ռեանիմացիայի և վերակենդանացման բաժանմունքի ղեկավար Հարություն Մանգոյանը:

Ավելի վաղ Ոստիկանության հասարակայնության և տեղեկատվության հետ կապերի վարչության պետ Աշոտ Ահարոնյանը տեղեկացրել է, որ ՊՊԾ գնդի տարածքում իրավապահներին են հանձնվել զինված խմբի անդամներ Գագիկ Եղիազարյանն ու Արամ Հակոբյանը:

Տեղի է ունեցել փոխհրաձգություն, որի հետևանքով վիրավորվել է իրավապահներից մեկը, ինչպես և Պավել Մանուկյանն ու նրա որդի Արամը:

Երեքն էլ անմիջապես տեղափոխվել են հիվանդանոց:

Ընթանում են բանակցություններ՝ զինված անձանց հանձնվելու գործընթացը ավարտին հասցնելու համար:

Ֆոտոլուրի Լուսանկարներում` էրեբունի բժշկական կենտրոնը

Աղբյուր` Փաստինֆո