Փաստ ինֆո

Ազգային անվտանգության ծառայությունը զինված խմբի անդամներին դիմել հետևյալ կոչով.

«2016թ. հուլիսի 17-ից մինչև օրս զինված խմբի կողմից ՀՀ ոստիկանության պարեկապահակային ծառայության գնդի տարածքի զավթման ընթացքում, ըստ այս պահին առկա նախնական տվյալների, կատարվել են առնվազն հետևյալ հանցանքները.

- վերցվել են պատանդներ (ՀՀ քրեական օրենսգրքի 218 հոդված)

- զավթել են շենքեր, շինություններ, տրանսպորտի, հաղորդակցության միջոցներ (ՀՀ քրեական օրենսգրքի 219 հոդված)

- ապօրինի կերպով ձեռք է բերվել, պահվել, փոխադրվել և կրվել է հրազեն (ՀՀ քրեական օրենսգրքի 235 հոդված):

Այս հանցագործությունը կատարած անձանց սպառնում է մինչև 15 տարի ժամկետով ազատազրկում:

Արդեն իսկ կատարված հանցավոր գործողությունների համար անխուսափելիորեն վրա հասնելիք  քրեական պատժի տեսակի և խստության աստիճանի վրա էապես ազդելու են զինված խմբի յուրաքանչյուր անդամի կատարած գործողությունների բնույթը և առաջացրած հետևանքների ծանրությունը:

Միաժամանակ ՀՀ օրենսդրությամբ նախատեսված հիմքերի և պայմանների առկայության դեպքում

- իր պահանջներից հրաժարված և պատանդին կամովին ազատ արձակած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում,

- իր պահանջներից հրաժարված և զավթածը կամովին ազատած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում,

- ապօրինի հրազենը կամովին հանձնած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում:

Զինված խմբի բոլոր անդամներին մեկ անգամ ևս հորդորում ենք դրսևորել ողջամտություն և հաշվի առնելով վերոնշյալ հանգամանքները կամովի վայր դնել զենքն ու հանձնվել իշխանություններին: Դրա համար դուք դեռ ժամանակ ունենք:

Այս առաջարկն ընդունողները պետք է կատարեն հետևյալ գործողությունները.

1. դուրս գալ անցագրային կետից,

2. զենքը պահել գլխավերևում և թեքվելով աջ առաջանալ մոտ 50 մետր,

3. շինանյութի խանութի հարակից տարածքում տեղադրված հովհանոցների մոտ վայր դնել բոլոր զենքերը,

4. ճանապարհի կենտրոնական մասով առանձին-առանձին մոտենալ ոստիկանության ծառայողներին»:

Աղբյուր` Փաստինֆո