Փաստ ինֆո

Ոստիկանության պարեկապահակային ծառայության (ՊՊԾ) գնդի տարածքը գրաված զինված խմբի անդամների հետ կապի բոլոր միջոցներն անջատված են։ Այս մասին այսօր հայտարարել է «Հիմնադիր խորհրդարանի» անդամ Ալեք Ենիգոմշյանը։

Ըստ նրա՝ զինված խմբի անդամները զրկված են հոսանքից, սննդից, նրանց բժշկական օգնություն չի ցուցաբերվում, անջատվել են կապի բոլոր միջոցները, ինչը, ըստ նրա, տանում է դեպի իրավիճակի սրացման։ 

«Այս առավոտ նույնպես մթնոլորտի սրացման քայլ է արվել, ռազմական օղակները տարածքի վրայից են թռել, տասը րոպե առաջ դիպուկահարներն անցել են իրենց սև գործին: Այս ամենը ցույց է տալիս, որ իշխանությունները հակված չեն հանգիստ մթնոլորտում շարունակել բանակցությունները»։

«Վտանգավոր սրացման ենք գնում։ Ամեն վայրկյան կարող են լուրջ զարգացումներ տեղի ունենալ», - ասել էԱլեք Ենիգոմշյանը՝ նշելով, որ, իրավիճակից ելնելով, համակարգող խումբը հանդես կգա հայտարարությամբ։

Ավելի վաղ տեղեկացրել ենք, որ հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:

ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: 6 անձ վիրավորվել է, որոնց թվում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը: Պատանդ էին վերցվել մի շարք անձինք, նրանց թվում՝ բարձրաստիճան պաշտոնյաներ, որոնք ազգային հերոս Վիտալի Բալասանյանի միջնորդությամբ իրականացված բանակցությունների արդյունքում հուլիսի 24-ին ազատ արձակվեցին։

Ըստ տեղեկությունների՝ զինված խումբը ականապատել է տարածքը եւ սպառնում է դիմել զինված գործողությունների, ինչը կարող է մեծ վտանգ ներկայացնել  հարեւանությամբ ապրող բնակիչների համար, եթե պետական մարմինները իրեն զինաթափելու ուղղությամբ քայլեր ձեռնարկեն։

Լուսանկարը՝ «Ֆոտոլուր»-ի

Աղբյուր` Փաստինֆո