Փաստ ինֆո

Հուլիսի 20-ին Խորենացի փողոցում տեղի ունեցած զանգվածային անկարգություններին մասնակցելու  մեղադրանքով կալանավորվել է ակտիվիստ Սոս Մարգարյանը:

Այդ մասին «Փաստինֆո»-ի թղթակիցը տեղեկացավ Ս. Մարգարյանի պաշտպան Տիգրան Սարգսյանից:

Պաշտպանը նաև տեղեկացրեց, որ Մարգարյանին մեղադրանք է առաջադրվել ՀՀ քրեական օրենսգրքի 225-րդ հոդվածի 2-րդ մասով:

Ավելի վաղ Քննչական կոմիտեն  տեղեկացրել է, որ հուլիսի 20-ին տեղի ունեցած անկարգությունների դեպքերի առթիվ հարուցվել է քրեական գործ։ «Հուլիսի 20-ին ` ժամը 22:15-ի սահմաններում, մի խումբ ցուցարարներ կատարել են անկարգություններ, որոնք ուղեկցվել են գույքի ոչնչացմամբ, իշխանության ներկայացուցիչ հանդիսացող, իրենց ծառայողական պարտականությունները կատարող ՀՀ ոստիկանության Երևան քաղաքի վարչության ուղեկցող գումարտակի 2-րդ վաշտի աշխատակիցների նկատմամբ բռնության գործադրմամբ, որի հետևանքով վտանգվել է հասարակական անվտանգությունը: Հարուցվել է քրեական գործ, ձեռնարկվում են անհրաժեշտ քննչական գործողություններ՝ անկարգություններին անմիջական մասնակցություն ունեցած, իրենց գործողություններով սադրած անձանց ինքնությունը պարզելու եւ նրանց գործողություններին համապատասխան քրեաիրավական գնահատական տալու ուղղությամբ»,- նշված էր ՔԿ-ի տարածած հաղորդագրության մեջ։

Հուլիսի 22-ի դրությամբ՝ անկարգություններին մասնակցելու համար մեղադրանք է առաջադրվել 3 անձի։ «Փաստինֆո»-ի տեղեկություններով՝  մի շարք ձերբակալված անձինք էլ ազատ են արձակվել:

Աղբյուր` Փաստինֆո