Փաստ ինֆո

ՊՊԾ գնդի տարածքը գրաված զինված` «Սասնա ծռեր» խմբի պահանջները չեն փոխվել: Այսօր գնդի տարածքում տեղի ունեցած ասուլիսի ժամանակ ասացին խմբի անդամներ Վարուժան Ավետիսյանըլ, Պավլիկ Մանուկյանը: Այն է` շարունակում են պահանջել «Սերժ Սարգսյանի հրաժարականը Ժիրայր Սեֆիլյանի և մնացած բոլոր «քաղբանտարկյալների» ազատ արձակումը»։

Վարուժան Ավետիսյանը նաև հայտարարեց, որ եթե իշխանությունը փորձի գրոհի գնալ ու ուժով վերցնել ՊՊԾ-ն, հարյուրավոր զոհեր կլինեն: «Եթե մեզնից մեկին սպանեն, իշխանությունը դրա տակից դուրս չի գա»,- ասաց նա: Նրա ներկայացմամբ` իրենք դիմել են զինված ապստամբության, քանի որ տարիներով համոզվել են, որ ՀՀ-ում հնարավոր չէ ուրիշ եղանակով հասնել փոփոխությունների: «Գրոհի ժամանակ կլինեն հարյուրավոր զոհեր, մեր անդամների մի մասը լավ զինված են և տիրապետում են այդ զենքերին»:

Խմբի անդամները պնդեցին, որ մտադիր չեն զենքը վայր դնել:

ՊՊԾ գնդի տարածքի չեզոք հատվածում կազմակերպված մամլո ասուլիսին միացավ նաև բանակցությունների ակտիվ մասնակից՝ ԼՂ խորհրդարանի պատգամավոր, գեներալ Վիտալի Բալասանյանը, ով կամովին է ստանձնել միջնորդի դերը: Ինչպես նշեց Վ.Բալասանյանը` խմբի անդամներից շատերը ղարաբաղյան պատերազմի ժամանակ իր զինակիցներն են եղել ու նրանց լավ է ճանաչում: Նրա խոսքերով` այսօր խոսել է նաև Ժիրայր Սեֆիլյանի հետ, և վերջինս պնդել է, թե այլևս չի պահանջում Սերժ Սարգսյանի հրաժարականը: Բալասանյանը նաև նշեց, թե իր տվյալներով, «Սասնա ծռեր»-ի անդամներից շատերը ևս արդեն չեն պահանջում Սարգսյանի հրաժարականը: Սակայն, «Սասնա ծռեր»-ի անդամներից մի քանիսը լսելով նրա խոսքերը հակադարձեցին՝ «պետք չէ լսել Վիտալի Բալասանյանին, շարունակում ենք պահանջել Սերժ Սարգսյանի հրաժարականը»,- ասացին նրանք:

Զինված խմբի եւ իշխանությունների միջեւ բանակցությունները Բալասանյանի միջոցով շարունակվում են, այդ թվում` Սեֆիլյանի առաջարկած «երրորդ տարբերակով»:

«Մենք չենք դադարեցնում երրորդ տարբերակի առումով բանակցությունները և շփումները, բայց տեսնում ենք ձևավորվող ժողովրդի կամք և պարտավոր ենք ենթարկվել այդ կամքին: Փոխադարձ պայմանավորվածությամբ երրորդ տարբերակը չի բացահայտվում: Իր ռազմավարական նշանակությամբ այն ի վերջո հանգեցնելու է նույն նպատակին»,- ասել է Վ.Ավետիսյանը։

Ավելի վաղ տեղեկացրել ենք, որ  զինված խումբն այսօր ազատել է վերջին 4 պատանդներին, այդ թվում ոստիկանության բարձրաստիճան պաշտոնյաներին: ԼՂ խորհրդարանի պատգամավոր Վիտալի Բալասանյանի միջնորդությամբ Հայաստանի ԱԱԾ ղեկավար Գեորգի Կուտոյանի և ՊՊԾ գնդի տարածքը գրաված զինված խմբի անդամներից Վարուժան Ավետիսյանի միջև տեղի ունեցած բանակցությունների արդյունքում ձեհամաձայնություն ձեռք բերվեց ՊՊԾ գնդի տարածքի չեզոք գոտում մամուլի կենտրոն ստեղծելու շուրջ:

Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:

ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: 6 անձ վիրավորվել է, որոնց թվում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Աղբյուր` Փաստինֆո