Փաստ ինֆո

Ծննդկան Մերի Մարգարյանի և նրա փոքրիկի մահվան գործով ամբաստանվող «Շենգավիթ բժշկական կենտրոն»-ի բժշկուհիներ Շուշանիկ Բախշյանը և Անի Բաբելյանն իրենց առաջադրված մեղադրանքը չեն ընդունում:

Շենգավիթ վարչական շրջանի ընդհանուր իրավասության դատարանում կայացած այսօրվա դատական նիստին ամբաստանյալ Շուշանիկ Բախշյանը մեղադրանքի վերաբերյալ դիրքորոշում հայտնելու՝ նիստը նախագահող դատավորի հարցին ի պատասխան ասաց, որ առաջադրված մեղադրանքի էությունն իրեն պարզ չէ, ապա նաև նշեց, որ մեղադրանքը չի ընդունում:

Այսօր դատարանում հարցաքննվեց տուժողի իրավահաջորդ, մահացած Մերի Մարգարյանի հայրը՝ Վաղինակ Մարգարյանը: Տուժողի իրավահաջորդը նշեց, որ աղջիկը 2015թ. փետրվարի 11-ից հաշվառման է վերցված եղել «Շենգավիթ» ԲԿ-ում և հղիության ընթացքում որևէ խնդիր չի ունեցել:

Ըստ տուժողի իրավահաջորդի՝ դուստրը վստահել է բժշկուհի Շուշանիկ Բախշյանին և չի ցանկացել այլ հիվանդանոց գնալ: 2015թ. հուլիսի 23-ին Մերին ջերմել է, նրա ջերմությունը եղել է 37,8, զանգահարել է բժշկուհուն՝ այդ մասին տեղեկացնելու և հարցնելու, թե ի՞նչ կարող է անել: Ի վերջո, բազմաթիվ անգամներ զանգելուց հետո Շուշանիկ Բախշյանը պատասխանել է Մերիի զանգերին ու ասել, որ քաղաքում վիրուս է տարածված և պարացետամոլ տեսակի դեղահաբ խմի, 4-րդ օրը կանցնի: Բժշկուհին նաև ասել է, որ հիվանդանոց գալ պետք չի:

Մերիի ջերմությունը դեղահաբը խմելուց հետո մի փոքր իջել է, սակայն կարճ ժամանակ անց կրկին բարձրացել է և հաջորդ օրն էլ ավելի վատ է եղել: Կրկին զանգահարել է բժշկուհուն, վերջինս կրկին չի պատասխանել զանգերին, Մերիի հայրը պնդել է, որ նրան այլ հիվանդանոց տեղափոխեն, ինչին Մերին դեմ է եղել:

Բժշկուհու հետ կապ հաստատելու բազմաթիվ փորձեր են եղել, ի վերջո Մերին հարազատների հետ գնացել է հիվանդանոց. հղիին ստուգելուց հետո Շուշանիկ Բախշյանը վստահեցրել է, որ ոչ մի պաթոլոգիա չկա, «անունը ինչ դնեմ, որ պառկեցնեմ հիվանդանոցում»,- այսպես ասելով՝ հղիին տուն է ճանապարհել՝ միևնույն ժամանակ խորհուրդ տալով ջերմությունը բարձրանալու դեպքում անալգին-դիմեդրոլ ներարկեն:

Հունիսի 25-ին Մերիին ջերմությամբ հիվանդանոց են տեղափոխում, իսկ նշված օրը հերթապահել է բժշկուհի Անի Բաբելյանը, սակայն Մերիին ընդունարանում բուժքույրը ուղեկցել է անալիզներ հանձնելու՝ մեզի և արյան, ապա լսել են նաև երեխայի սրտի բաբախը, որից հետո տուժողի իրավահաջորդի խնդրանքին, որ արդյոք կարո՞ղ են հերթապահ բժշկուհուն տեսնել, բուժքույրն ասել է, որ նա զբաղված է և չի կարող մոտենալ:

Տուժողի իրավահաջորդը նշեց, որ, ըստ իր տեղեկությունների, հերթապահ բժիշկը ցանկացել է իրենց տեսնել, սակայն վերջինիս արգելել են:

Հաջորդ օրը Մերիին ընդունել են հիվանդանոց, տուժողի իրավահաջորդը նաև նշեց, որ հիվանդանոցում գտնվելու ժամանակ Մերիի ջերմությունը կտրուկ իջել է, իսկ բժիշկներին դիմելու և օգնություն խնդրելու փորձերին նրանց պատասխանել են, որ մրսած է, թեյ տվեք, իսկ Շուշանիկ Բախշյանը վստահեցրել է, որ հղիի վիճակը բավարար է:

Այդ ամբողջ ժամանակ հղիին կեսարյան հատում չեն կատարել, այնինչ, ըստ տուժողի իրավահաջորդի տեղեկությունների, բժիշկ Աշոտ Սիրունյանը 3 անգամ առաջարկել է Մերիին կեսարյան հատում կատարել, սակայն Շուշանիկ Բախշյանը դեմ է եղել:

Մերիին շտապօգնության ավտոմեքենայով տեղափոխել են «Էրեբունի» ԲԿ:

Տուժողի իրավահաջորդը նշեց, որ դստերը վերջին անգամ «Էրեբունի» ԲԿ-ում վերելակի մոտ է տեսել, հուսով են եղել, որ կեսարյան հատմամբ կծննդալուծվի և ամեն բան լավ կլինի, սակայն հուլիսի 29-ի առավոտյան ժամը 08.00-ի սահմաններում Մերին մահացել է, իսկ նրա դուստրը մահացել է հաջորդը օրը՝ կեսօրին:

Իսկ թե ինչո՞վ են պատճառաբանել, որ կեսարյան հատում չեն կատարել մեղադրող դատախազի հարցին տուժողի իրավահաջորդը պատասխանեց, որ համապատասխան սարքավորումներ ու հմուտ բժիշկներ չունեն:

«Նա իր հանցավոր ինքնավստահության շնորհիվ իմ աղջան սպանեց»,- ասաց տուժողի իրավահաջորդը:

Դատարանը նկատեց, որ տուժողի իրավահաջորդի դատաքննական և նախաքննական ցուցմունքներում էական հակասություններ չկան, ուղղակի դատաքննական ցուցմունքը փոքր-ինչ ծավալուն էր քան նախաքննականը:

Հաջորդիվ հարցաքննվեց մահացած Մերի Մարգարյանի ամուսինը՝ Արթուր Հարությունյանը, ով ևս նշեց, որ Մերին ջերմել է, ջերմությունը եղել է 39.1, սակայն ջերմիջեցնող խմելուց հետո էլ անգամ 37,8-ից չի իջել:

Մերիի ամուսնու և մյուս տուժողի իրավահաջորդի ցուցմունքները նույնաբովանդակ էին:

Դատարանն անցավ գրավոր ապացույցների հետազոտմանը, հետազոտվեցին հեռախոսազանգերի վերծանումները, որոնցից պարզ դարձավ, որ մի քանի անգամ Շուշանիկ Բախշյանն է զանգահարել Մերիին, իսկ sms հաղորդագրությունների հրապարակումից էլ պարզ դարձավ, որ Մերին Շուշանիկ Բախշյանին տեղեկացրել է, որ ջերմություն ունի նշել է, որ 37-ից ավել է և հարցրել, թե ինչ կարող է անել:

Հուլիսի 24-ին գրված նամակում ևս Մերին կրկին հայտնել է բժշկուհուն, որ ջերմությունը բարձ է, ի՞նչ կարող է անել, իսկ հուլիսի 25-ին գրված նամակում Մերին հայտնել է, որ ջերմությունը 39,5 է, պարացետամոլ է խմել, և հարցրել է՝ «կարո՞ղ է մի հատ էլ սրսկվել»:

Հաջորդ դատական նիստում գործում գրավոր ապացույցների հետազոտությունը կշարունակվի:

Աղբյուր` Փաստինֆո