Փաստ ինֆո

ՀՀ կառավարության նիստի ժամանակ վարչապետ Հովիկ Աբրահամյանն անդրադարձել է հուլիսի 17-ին զինված խմբի կողմից ձեռնարկած գործողություններին: «Արմենպրես»-ի հաղորդմամբ` նա անթույլատրելի ու դատապարտելի համարեց այն:

«Հարգելի գործընկերներ, հուլիսի 17-ին մի խումբ անձինք զինված հարձակում են գործել Երևանի Էրեբունի վարչական շրջանում ոստիկանության պարեկապահակային գնդի տարածքի վրա ու վերցրել են պատանդներ, սպանվել է ոստիկանության գնդապետ: Մեր բոլորի անունից ցավակցում եմ գնդապետ Արթուր Վանոյանի ընտանիքի անդամներին, հարազատներին, զինակից ընկերներին: Այն, ինչ տեղի ունեցավ, անթույլատրելի է ու դատապարտելի, քանի որ բռնությամբ անհնար է հասցնել փոփոխությունների»,-ասաց վարչապետը: Նա հավելեց, որ իշխանությունն ամեն ինչ անում է ու անելու է`հասնելու խնդրի խաղաղ հանգուցալուծմանը:

Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:

ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Լուսանկարը՝ Armenpress-ի

Աղբյուր` Փաստինֆո