Փաստ ինֆո

Խորենացու փողոցում անկարգություններից հետո, հուլիսի 21-ի առավոտյան 09:00-ի դրությամբ, բուժհաստատություններ դիմած 51 քաղաքացիներին, որից 29-ը ոստիկաններ, ցուցաբերվել է պատշաճ բուժօգնություն: «Արմենպրես»-ի հաղորդմամբ` այս մասին լրագրողներին տեղեկացրեց ՀՀ առողջապահության նախարար Արմեն Մուրադյանը:

«Այս պահին ծայրահեղ ծանր կամ կյանքին վտանգ սպառնացող դեպքեր չունենք»,- ասաց Արմեն Մուրադյանը:

Ինչ վերաբերում է Պարեկապահակային գնդի տարածքում վիրավորում ստացած Գագիկ Մկրտչյանի առողջական վիճակին, ապա նախարարը տեղեկացրեց, որ նրա մոտ դրական միտում կա, հնարավոր է օրվա ընթացքում հանեն արհեստական շնչառության ապարատը:

«Որևէ այլ տեղեկություն կարող եք ստանալ պաշտոնական լրահոսից»,-հավելեց նա:

Անդրադառնալով զինված խմբի անդամներից մեկի հայտարարությանը, ըստ որի` իրենք զրկվել են շտապօգնության ծառայությունից օգտվելու հնարավորությունից` Արմեն Մուրադյանը վստահեցրեց, որ անհրաժեշտության դեպքում շտապօգնություն կցուցաբերվի ցանկացածին:

«Կարող եմ միանշանակ ասել հետևյալը` բուժօգնություն որևէ մեկին անհասանելի չի լինի անհրաժեշտության դեպքում»:

Լրագրողի այն հարցին ի պատասխան, թե ինչ վիճակում է գտնվում զինված խմբի անդամներից մեկի հղի կինը, նախարարն ասաց. «Առանձնահատուկ տեղեկություն, կապված որևէ մեկի կնոջ հետ, չունեմ, բայց կարող եմ վստահեցնել, որ բոլոր հղիները գտնվում են խիստ ուշադրության ներքո` անկախ նրանից, թե ում կինն են»:

Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակայինծ ծառայության գնդի տարածք և բռնության սպառնալիքով պահել այնտեղ գտնվող անձանց` պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռ բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին:

ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանությ անգնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Խորենացի փողոցում հուլիսի 20-ի երեկոյան հավաքված ցուցարարների և ոստիկանության միջև բախում է տեղի ունեցել: Ցուցարարները քարեր և տարբեր իրեր են նետել ոստիկանների ուղղությամբ:

Աղբյուր` Փաստինֆո