Փաստ ինֆո

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանն այսօր բավարարել է 2013թ. հուլիսի 31-ին զինծառայող Մանուչար Մանուչարյանին ինքնասպանության հասցնելու գործով ամբաստանյալ Արման Ստեփանյանի պաշտպան Նորայր Նորիկյանի կողմի ներկայացված լրացուցիչ դատահոգեբուժական և հոգեբանական փորձաքննություն նշանակելու մասին միջնորդությունը:

Պաշտպանը դատաքննությունը լրացնող միջնորդությամբ է հանդես եկել` մասնավորապես նշելով, որ քրեական գործի նախաքննության փուլում միջնորդություն է ներկայացվել վարույթն իրականացնող մարմնին` կրկնակի «Ամբուլատոր դատահոգեբանական-դատահոգեբուժական փորձաքննություն» նշանակելու մասին մեկ այլ փորձաքննական մարմնում, ինչը, ըստ պաշտպանի, անհնիմն կերպով մերժվել է:

Նորայր Նորիկյանը գտնում է, որ նախաքննության ընթացքում դատահոգեբանական-դատահոգեբուժական փորձաքննությունը կատարվել է թերի, մակերեսորեն, եզրակացությունը պատճառաբանված չէ և կառուցված է հայեցողական և, որ ամենակարևորն է, բացակայում է պատճառահետևանքային կապը, ինչն էլ դարձել է գործիք իր պաշտպանյալին քավության նոխազ դարձնելու և պատասխանատվության ենթարկելու համար:

Քրեական գործով նախաքննության ընթացքում` դեպքից շուրջ վեց ամից անց` միայն 17.02.2014թ., քննիչի կողմից նշանակվել է ամբուլատոր դատահոգեբանական-դատահոգեբուժական փորձաքննություն:

Եվ, ըստ այդ փորձաքննության եզրակացության, Մանուչար Մանուչարյանը կյանքի ընթացքում որևէ հոգեկան հիվանդությամբ չի տառապել, եղել է հոգեպես առողջ անձ, բնավորության փսիխասթենիկ գծերի առկայությամբ:

Ինչ վերաբերում է փորձաքննության հոգեբանական մասին, ապա փորձագետները եկել են հետևության, որ ինքնասպանություն կատարելու պահին Մ.Մանուչարյանը, ամենայն հավանականությամբ, չի գտնվել ֆիզիոլոգիական աֆեկտի վիճակում: Նրա մոտ գերակայել են հուսահատությունը, շփոթվածությունը, ստեղծված իրավիճակից անելանելիության զգացումը, սթրեսը, որպիսիք էապես ազդել են նրա գիտակցության ու վարքի վրա:

Մ. Մանուչարյանի կողմից ինքնասպանություն գործելը հիմնականում պայմանավորված է Ա.Ստեփանյանի և Բ.Գաբոյանի հակաօրինական գործողությունների հետ:

Պաշտպանը գտնում է, որ փորձագետները, հիմնվելով զինծառայողներ Լիբիկ Մկրտչյանի, Արման Սահակյանի և մասամբ նաև Կարինե Պետրոսյանի ցուցմունքների վրա, եկել են այն եզրակացության, որ ծառայության վերջին 40 օրերի ընթացքում գործով ամբաստանյալներ Բաբկեն Գաբոյանի և Արման Ստեփանյանի կողմից սիստեմատիկորեն ծեծի, ստորացումների, նվաստացումների, ծաղրի և շահագործման ենթարկվելու հետևանքով Մ.Մանուչարյանի մոտ վերջին ժամանակահատվածում զարգացել է սուր դեպրեսիվ հակազդում, որն արտահայտվել է տրամադրության դիսթիմիկ ֆոնով, ընկճվածությամբ, հուսահատվածությամբ, ստեղծված իրավիճակից որպես անելանելի ընկալման զգացողությամբ, ինչը և, ամենայն հավանականությամբ, բերել է նրա կողմից ինքնասպանության իրագործմանը: Ինքնասպանություն կատարելու պահին գտնվելով խիստ հուզված, ընկճված վիճակում, գիտակցության աֆեկտիվ նեղացման ֆոնի վրա՝ Մ.Մանուչարյանը չէր կարող լրիվ չափով իրեն հաշիվ տալ իր գործողությունների համար և ղեկավարել դրանք:

Ըստ պաշտպանի՝ իր պաշտպանյալին մեղսագրվող արարքը հիմնված է բացառապես մեկ վկայի` Լիբիկ Մկրտչյանի նախաքննական ցուցմունքի վրա, սակայն վերջինս դատաքննության ընթացքում հայտնել է, որ նախաքննության ընթացքում չի նշել, որ Արման Ստեփանյանը 5 րոպե տևողությամբ ոտքերով հարվածել է Մ.Մանուչարյանին, այլ հայտնել է, որ ընդամենը հրել է։ Ավելին՝ նշել է, որ երբեք չի տեսել Մ.Մանուչարյանին շոր լվանալուց, դեպքին նախորդող 40 օրերի ընթացքում երբեք չի տեսել Արման Ստեփանյանին հանգուցյալ Մ.Մանուչարյանին նվաստացնելուց, վիրավորելուց, ճնշելուց:

Տարակուսելի է, որ ինչպես նախաքննության, այնպես էլ դատաքննության ընթացքում վկաներից ընդամենը երկուսն են նշել, որ Մանուչարը եղել է տխուր, ընկճված, իսկ մնացած բոլոր վկաներն ընդգծել են, որ Մանուչարն ունեցել է նորմալ տրամադրություն, անգամ ցուցմունք կա, որ դեպքից շուրջ մեկ ժամ առաջ Մանուչարը պահակատանը անեկդոտ է պատմել:

Պաշտպանը, կասկածի տակ դնելով եզրակացության օբյեկտիվությունը, նշեց, որ փորձագետները խտրական վերաբերմունք են դրսևորել վկաների ցուցմունքների նկատմամբ. եզրակացությունը կազմելիս, ունենալով 6 վկայի և մեկ տուժողի իրավահաջորդի հարցաքննություն, հիմքում դրվել է ընդամենը 2 վկայի ցուցմունք՝ չանդրադառնալով մյուս վկաների ցուցմունքներում մատնանշված հանգամանքներին:

Նորայր նորիկյանը պնդեց, որ կատարված փորձաքննության համար հիմք հանդիսացած ելակետային տվյալներն առնվազն Արման Ստեփանյանի մասով սխալ է, որի հետևանքով սխալ, չպատճառաբանված և չհիմնավորված եզրակացություն է տրվել:

Ուստիև՝ պաշտպանը միջնորդել էր նշանակել կրկնակի ամբուլատոր դատահոգեբանական-դատահոգեբուժական փորձաքննություն, իսկ միջնորդությունը բավարարելու դեպքում՝ փորձաքննության կատարումը հանձնարարել ՀՀ գիտությունների ազգային ակադեմիայի Փորձաքննությունների ազգային բյուրո» ՊՈԱԿ-ին:

Գործով մյուս ամբաստանյալի՝ Բաբկեն Գաբոյանի պաշտպան Հրանտ Անանյանը և տուժողի իրավահաջորդի ներկայացուցիչներներ Մարտիրոսյանը և Շուշանյանը ևս միացել են Նորյար Նորիկյանի կողմից ներկայացված միջնորդությանը՝ փորձագետներին առաջադրելով նաև իրենց հարցերը:

Նշենք նաև, որ մեղադրող դատախազ Արամ Ամիրյանն առարկությամբ է հանդես եկել՝ գտնելով, որ պաշտպանի միջնորդությունն անհիմն է և ենթակա մերժման:

Դատարանը բավարարել է միջնորդությունը:

Աղբյուր` Փաստինֆո