Փաստ ինֆո

Քաղաքացի Լուսինե Հովսեփյանն ընդդեմ Հայաստանի Հանրապետության՝ ազատությունից ապօրինի զրկելու համար 200 հազար ՀՀ դրամի չափով ոչ նյութական վնասի փոխհատուցման պահանջի գործով այսօրվա դատական նիստն էլ չկայացավ՝ պատասխանողի ներկայացուցչի բացակայության պատճառով:

Պատասխանողի՝ ոստիկանության, ներկայացուցիչը հայտնել էր դատարանին, որ ինքը գտնվում է իր ամենամյա արձակուրդում, խնդրել էր հետաձգել դատական նիստը, որպեսզի կարողանա հաջորդ նիստում պատշաճ կերպով ներկայացնել պատասխանողին:

Հայցվորի ներկայացուցիչ, փաստաբան Արամազդ Կիվիրյանն ընդգծեց, որ պատասխանող կողմը բարեխիղճ չէ իր գործողություններում: Մասնավորապես, պատասխանող կողմը կարող էր ապահովել այլ ներկայացուցչի մասնակցությունը: Այդուհանդերձ, նշեց հայցվորի ներկայացուցիչը, անհրաժեշտ է հետաձգել դատական նիստը:

Ա.Կիվիրյանը նշեց, որ ինքը հարցեր ունի պատասխանողին, մասնավորապես, անհրաժեշտ է, որպեսզի պատասխանողը պարզաբանի, թե ինչո՞ւ է առարկությունները ներկայացրել ոստիկանությունը, եթե հայցադիմումը ներկայացվել է Հայաստանի Հանրապետության դեմ:

Դատարանն արձանագրեց, որ պատասխանողը դատական նիստի օրվա ու ժամի մասին պատշաճ ծանուցված է եղել,  խնդրել է հետաձգել դատական նիստը: Ըստ դատարանի,  նիստն անհրաժեշտ է հետաձգել՝ հավասարության ու մրցակցության սկզբունքի իրացումն ապահովելու համար: Առավել ևս, որ գործի քննության ընթացքում կարող են շատ այլ պարզաբանման ենթակա հարցեր ծագել:

Դատական նիստը հետաձգվեց:

Ի դեպ, նախորդ դատական նիստին էլ պատասխանող կողմը չէր ներկայացել, և նիստը հետաձգվել էր:

Ինչպես «Փաստինֆո»-ի լրագրողին ավելի վաղ հայտնել էր հայցվոր Լուսինե Հովսեփյանի ներկայացուցիչ, փաստաբան Արամազդ Կիվիրյանը, հայցվորը 2013թ. մասնակցել է Մաքսային միությանը Հայաստանի անդամակցության առնչությամբ նախագահական նստավայրի մոտ տեղի ունեցած բողոքի ակցիային և բերման ենթարկել ոստիկանություն, որտեղ պահվել է օրենքով նախատեսված երեք ժամից ավելի, այն է՝ երեք ժամ քսան րոպե:

Հայցվորն ու իր ներկայացուցիչն ավելի վաղ հակընդդեմ հայց էին ներկայացրել Վարչական դատարան, երբ ոստիկանությունը հայց էր ներկայացրել Լուսինե Հովսեփյանի դեմ: Հակընդդեմ հայցում իրենք պահանջում էին ամբողջությամբ ոչ իրավաչափ ճանաչել ոստիկանության գործողությունները՝ սկսած ձերբակալությունից, բերման ենթարկելուց և վերջացրած՝ թույլատրելի ժամկետից ավելի պահելով և այլն՝ հիմք ընդունելով նաև այն, որ տվյալ դեպքում անձը զրկվել էր խոսքի ազատ արտահայտման իրավունքից:

Վարչական դատարանում հակընդդեմ հայցը բավարարվել էր մասնակի, ոչ իրավաչափ էին ճանաչվել միայն Լուսինե Հովսեփյանին անօրինական կերպով՝ երեք ժամից ավելի ոստիկանությունում պահվելու հետ կապված ոստիկանության գործողությունները՝ թեև իրենք ակնկալում էին, որ Վարչական դատարանն ոչ իրավաչափ կճանաչեր այդ օրն  ոստիկանության գործողություններն ընդհանրապես, ինչը տեղի չի ունեցել:

Աղբյուր` Փաստինֆո