Փաստ ինֆո

Պետական դավաճանության վերաբերյալ արդեն իսկ դատական վիճաբանությունների փուլում գտնվող գործով այսօրվա դատական նիստում որպես ամբաստանյալ Կարինե Ղումաշյանի պաշտպան ներգրավվեց փաստաբան Աշոտ Ապրեսյանը: Նա դատարանից 20 օրացուցային օր ժամանակ խնդրեց գործի նյութերին ծանոթանալու համար:  

Դատարանը բավարարեց պաշտպանի միջնորդությունը և դատական նիստը հետաձգեց մինչև օգոստոսի 10-ը:

Անցյալ դատական նիստում Կ.Ղումաշյանը հրաժարվել էր իր պաշտպան Դավիթ Մնացականյանի ծառայություններից՝ հայտարարելով, որ իր պաշտպանությունը կիրականացնի ինքնուրույն: Դատարանն ամբաստանյալին լրացուցիչ ժամանակ էր տրամադրել պաշտպանական ճառին նախապատրաստվելու համար:

Սակայն այսօրվա դատական նիստում դատարան  ներկայացավ Ա.Ապրեսյանը, ում հետ ամբաստանյալի որդին պայմանագիր էր կնքել իր մոր պաշտպանությունն իրականացնելու համար: Ամբաստանյալը հայտնեց, որ համաձայն է, որ իր պաշտպանությունն իրականացնի հիշյալ փաստաբանը: 

Նախորդ դատական նիստում գործով մյուս երկու ամբաստանյալների՝ հայր ու որդի Ռաֆիկ և Սերգեյ Պապոյանների պաշտպաններ Սիրանուշ Հարությունյանն ու Սուրեն Մնացականյանն արդեն իսկ հանդես են եկել պաշտպանական ճառերով:

Երկու պաշտպաններն էլ միջնորդել արդարացնել իրենց պաշտպանյալներին: Ամբաստանյալ Ռաֆիկ Պապոյանի պաշտպան Սիրանուշ Հարությունյանը միջնորդել է նաև մեղմ պատիժ նշանակել, եթե դատարանը կորոշի, որ ամբաստանյալը մեղավոր է: Իսկ Ռաֆիկ Պապոյանի որդու՝ ամբաստանյալ Սերգեյ Պապոյանի, պաշտպան Սուրեն Մնացականյանն էլ նշել է, որ եթե կան չփարատված կասկածներ, դրանք պետք է մեկնաբանվեն հօգուտ ամբաստանյալի:

Ս.Հարությունյանը նշել է, որ  Ռաֆիկ Պապոյանը չի հասկացել, որ անձը լրտես է և ոչ թե բարեգործ, և վերջինս Ռ.Պապոյանին թակարդի մեջ է գցել:

Իսկ Ս.Մնացականյանն ընդգծել է, որ Ս.Պապոյանի մեղադրանքի հիմքում դրվել են նրա իսկ ցուցմունքները, որոնցով հերքվում է նրա մեղավորությունը:

Ավելի վաղ մեղադրական ճառով հանդես էր եկել մեղադրող Արամ Արամյանը, ով միջնորդել էր բոլոր երեք ամբաստանյալներին մեղավոր ճանաչել ՀՀ քրեական օրենսգրքի 299-րդ հոդվածի 1-ին մասով՝ Պետական դավաճանությունը, առաջադրված մեղադրանքում և  ամբաստանյալներ Ռաֆիկ Պապոյանին, Կարինե Ղումաշյանին ու Սերգեյ Պապոյանին համապատասխանաբար  դատապարտել 15 տարվա, 14 տարվա 6 ամսվա և 14 տարվա ազատազրկման՝ գույքի բռնագրավմամբ:

Ըստ մեղադրանքի, Ռաֆիկ Պապոյանը՝ բնակվելով Թուրքիայում, հավաքագրվել է այդ երկրի տարածքում գործունեություն ծավալած, Ադրբեջանի հետախուզական ծառայությունների աշխատակիցը հանդիսացող, Սեյրան ավունով ներկայացած անձի կողմից և կատարել է այդ հետախուզական ծառայության առաջադրանքները` Հայաստանից Թուրքիա ժամանած ՀՀ քաղաքացիների միջից ընտրել Ադրբեջանի հետախուզական ծառայությունների համար հետաքննություն ներկայացնող անձանց ու հավաքագրման նպատակով ծանոթացնել նրա հետ:

Ըստ ամբաստանյալ Կարինե Ղումաշյանին առաջադրված մեղադրանքի, նա ևս բնակվելով Թուրքիայում՝ ընկել է այդ երկրի տարածքում գործունեություն ծավալած Ադրբեջանի հետախուզական ծառայությունների տեսադաշտը և 2013թ. հավաքագրվել այդ ծառայությունների աշխատակիցը հանդիսացող Արման անունով ներկայացած անձնավորության կողմից: Ստանալով վարձատրություն` մոտ 1500 ԱՄՆ դոլար գումարի չափով, ստացել է առաջադրանք` կիրառելով գաղտնապահության կանոնների պահպանման մեթոդները` Հայաստանի տարածքից չզանգահարել Արման անունով ներկայացած անձին և այդ ծանոթության մասին ոչ մեկին չհայտնել:

Ըստ ամբաստանյալ Սերգեյ Պապոյանին առաջադրված մեղադրանքի, նա Թուրքիայում բնակվող հոր` Ռաֆիկ Պապոյանի ուղղորդմամբ, Վրաստանի Թբիլիսի քաղաքում հանդիպել է Ադրբեջանի հետախուզական ծառայությունների աշխատակիցը հանդիսացող, Սեյրան անունով ներկայացած անձի հետ և հավաքագրվել վերջինիս կողմից` տրամադրելով տեղեկություն ԼՂՀ Մարտունու շրջանում որպես հետախույզ ժամկետային զինծառայության ընթացքում տիրապետած տեղեկությունների վերաբերյալ:

Վճարելով 750 ԱՄՆ դոլլար գումար` վերոհիշյալ Սեյրանը տվել է առաջադրանք` ընդունվել պայմանագրային ծառայության Մատաղիսի զորամասերից մեկում և տեղեկություններ հայտնել այդ զորամասի մասին համացանցի «սկայպ» ծրագրի կամ «օդնոկլասնիկի» սոցիալական ցանցի միջոցով:

Աղբյուր` Փաստինֆո