Փաստ ինֆո

Թուրքիայի արդարադատության նախարարությունը, ընդդիմադիր իսլամական քարոզիչ Ֆեթհուլլա Գյուլենի էքստրադիցիայի համար, անհրաժեշտ լրացուցիչ փաստաթղթեր է ուղարկել ԱՄՆ: Անկարայում համարում են, որ Գյուլենը ոգեշնչել է հեղաշրջման փորձի իրականացումը:

Ինչպես հաղորդում է BBC-ի ռուսական ծառայությունը, Թուրքիայի վարչապետ Բինալի Յըլդըրըմը՝ ելույթ ունենալով խորհրդարանում, ասել է. «Մենք ԱՄՆ ենք ուղարկել չորս փաթեթ «ահաբեկիչների ղեկավարի» էքստրադիցիայի համար: Մենք նրանց կտրամադրենք էլ ավելի շատ ապացույցներ, քան նրանք ուզում են»:

Ավելի վաղ Թուրքիայի նախագահ Ռեջեփ Թաիբ Էրդողանը կոչ է արել ԱՄՆ նախագահ Բարաք Օբամային հանձնել Ֆեթհուլլա Գյուլենին, ով շատ տարիներ բնակվում է ամերիկյան Փենսիլվանիա նահանգում:

Ինքը՝ Գյուլենն, ով համարվում է Էրդողանի գլխավոր քաղաքական ընդդիմախոսը, բազմիցս հայտարարել է, որ առնչություն չունի հեղաշրջմանը և դատապարտել է հեղաշրջման փորձը: Նա նաև նշել է, որ պատրաստ է հայրենիք էքստրադիցիայի ենթարկվելու:

Զինված խռովությունը Թուրքիայում սկսվել է հուլիսի 15-ի ուշ երեկոյան: Մի խումբ զինվորականներ հայտարարել էին, որ իրենց ձեռքն են վերցնում երկրի կառավարումը, որպեսզի ապահովվեն քաղաքացիների սահմանադրական իրավունքների պահպանումը:

Մինչև առավոտ թուրքական կառավարությանը հաջողվել է լրիվ վերականգնել երկրում իրավիճակի նկատմամբ վերահսկողությունը:

Թուրքիայում բախումների զոհերի թիվը չհաջողված ռազմական հեղաշրջման ընթացքում, վերջին տվյալներով, կազմել է 200-ից ավելի մարդ: Հեղաշրջման փորձին մասնակցելու կասկածանքով ձերբակալվել ու ժամանակավորապես պաշտոններից հեռացվել է մոտ 20 հազար մարդ, որոնց թվում են՝ զինվորականներ, չինովնիկներ, դատավորներ և ոստիկանության ներկայացուցիչներ:

Աղբյուր` Փաստինֆո