Փաստ ինֆո

Առաջիկա 2-3 տարում առավել ակնհայտ կդառնան Հայաստանի էներգետիկ ու թյաննուանկախ ինքնաբավությանն ուղղված ծրագրերը: «Արմենպրես»-ի հաղորդմամբ` այս մասին Սյունիք
կատարած այցի ժամանակ հայտնեց ՀՀ էներգետիկայի և բնական պաշարների նախարարի տեղակալ Հայկ Հարությունյանը:

Հուլիսի 16-17-ին նախարարությունը լրագրողների համար երկօրյա այց էր կազմակերպել Սյունիքի մարզ: Լրագրողներն այցելեցին Որոտանի հիդրոէլեկտրակայանների համալիրի Սպանդարյան ջրամբար, եղան Տաթևի ՀԷԿ-ում, ծանոթացան Իրան-Հայաստան 400կվ հզորությամբ էլեկտրահաղորդման երրորդ գծի կառուցման աշխատանքներին «Նորավան» ենթակայանի շինարարության վայրում: Լրագրողներն այցելեցին նաև Քարքար երկրաջերմային տեղամաս, որտեղ տաք ջրային պաշարներ հայտնաբերելու նպատակով մեկնարկել է փորձարարական հորատման գործընթացը:

«Այս երկու օրը մենք այցելեցինք մեր էներգետիկ համակարգի լավագույն կայաններից մեկը` Որոտանի ՀԷԿ համալիր, որը մեր էներգետիկ համակարգի ադամանդն է: Այն շատ կարևոր դեր ունի մեզ համար թե որպես կարգավորիչ կայան, թե որպես մատչելի էներգիայի աղբյուր: Հրավիրեցինք նաև Տաթևի ՀԷԿ, որն արտադրում է Որոտանի ՀԷԿ կասկադի արտադրանքի 60 տոկոսը:

Ցույց տվեցինք ներկա վիճակը, որ մի քանի տարի հետո հրավիրենք ու ցույց տանք լրիվ արդիականացված համակարգերը: Նախատեսվում է փոխարինել ողջ տեխնիկան, վերազինել ու բարձրացնել պատվարների, ջրամբարների անվտանգության մակարդակը»,-նշեց փոխնախարարը:

Խոսելով «Նորավան» ենթակայանի շինարարության վայր այցելության և Իրանն ու Հայաստանը կապող էլեկտրահաղորդման երրորդ գծի կառուցման մասին` Հայկ Հարությունյանը նկատեց, որ աշխատանքների ավարտը նախատեսվում է 2017-ի վերջին, 2018-ի սկզբին:

«Մենք բավականին լուրջ իրավիճակ ենք ունենալու այն տեսանկյունից, որ կկարողանանք 1000 մեգավատ հզորություն արտահանել: Եթե վերցնենք միայն Իրանն ու Վրաստանի նոր գիծը, որը ևս կառուցվում է ու մոտավորապես նույն ժամանակահատվածում են ավարտվելու, կկարողանանք արտահանել մոտ 15 միլիարդ կիլովատ/ժամ էլեկտրաէներգիա: Որպեսզի պատկերացնեք, թե դա ինչ է նշանակում, պետք է ասեմ, որ մեր ներքին սպառումը 5.5 միլիարդ է, այսինքն` մոտ երեք անգամ ավելի կարողանալու ենք արտահանել: Այդ ժամանակ մեզ պետք է կլինեն նոր արտադրական հզորություններ»,-ասաց փոխնախարարը:

Պաշտոնյայի խոսքով` Հայաստանը կդառնա էլեկտրաէներգիայի ու գազի տարանցիկ երկիր, երբ բոլոր ենթակառուցվածքներն առկա լինեն:

«Երբ արդեն այս գծերը կառուցվեն, մենք հանգիստ կարող ենք աշխատել իրանական ու վրացական համակարգերի հետ: Միանալով ռուսական, վրացական, իրանական էներգահամակարգերին` կունենանք իրավիճակ, երբ Իրանը հանգիստ կարողանալու է Հայաստանի միջոցով Վրաստան ու Ռուսաստան էլեկտրաէներգիա արտահանել ու հակառակը»,-շեշտեց մեր զրուցակիցը:

Նրա խոսքով` այդ ամենի արդյունքում կստեղծվի իրավիճակ, երբ էներգետիկան իր հաստատուն ծախսերը կբաշխի շատ ավելի մեծ էլեկտրաէներգիայի քանակի վրա, այսինքն` մեկ միավորի արժեքը կնվազի, ու սպառողների համար բեռը կնվազի, ինչն էլ, հավանաբար, սակագների վրա կազդի:

Աղբյուր` Փաստինֆո