Փաստ ինֆո

Սպանության գործի քննության շրջանակներում Սյունիքի մարզային պաշտոնատար անձանց կողմից պաշտոնեական լիազորություններն անցնելու վերաբերյալ աղմկահարույց քրեական գործով կայացվել է մեղադրական դատավճիռ:

Այսպես, արդեն նախկին պաշտոնյան՝ ՀՀ ոստիկանության Սյունիքի մարզային վարչության Կապանի բաժնի պետի օպերատիվ գծով տեղակալ Գագիկ Դանիելյանը, մեղավոր է ճանաչվել ՀՀ քրեական օրենսգրքի 308-րդ հոդվածի 1-ին մասով (2 դրվագով)՝ պաշտոնեական լիազորություններն անցնելը, և դատապարտվել 4 տարվա ազատազրկման՝ պատժի ժամկետին հաշվակցվել է արգելանքի տակ գտնվելու ժամկետը` 11 ամիսը: Միաժամանակ նա համաներման որոշման կիրառմամբ ազատվել է պատժից:

Մյուս նախկին պաշտոնյան՝ ՀՀ ոստիկանության քննչական գլխավոր վարչության Սյունիքի մարզի քննչական բաժնի քննիչ Արման Ենգոյանը, պաշտոնեական լիազորություններն անցնելու երկու դրվագներից մեկով ճանաչվել է անմեղ և արդարացվել` արարքի մեջ հանցակազմի բացակայության հիմքով: Իսկ պաշտոնեական լիազորություններն անցնելու մյուս դրվագով մեղավոր է ճանաչվել, սակայն համաներման որոշման կիրառմամբ ազատվել այդ հոդվածով նշանակված՝ երկու տարվա ազատազրկման պատժից:

Արման Ենգոյանը մեղավոր է ճանաչվել ՀՀ քրեական օրենսգրքի 349-րդ հոդվածի 3-րդ մասի 1-ին կետով՝ առանձնապես ծանր հանցագործության գործով ապացույցները կեղծելը, և 336-րդ հոդվածի 1-ին մասով՝ ակնհայտ անմեղ անձին քրեական պատասխանատության ենթարկելը, և դատապարտվել 4 տարվա ազատազրկման:

Երրորդ նախկին պաշտոնյան՝ Սյունիքի մարզի դատախազի տեղակալ Էդիկ Հովսեփյանը, մեղավոր է ճանաչվել ՀՀ քրեական օրենսգրքի 308-րդ հոդվածի 1-ին մասով (երեք դրվագով), 38-349-րդ հոդվածի 3-րդ մասի 1-ին կետով, 336-րդ հոդվածի 1-ին մասով:

ՀՀ քրեական օրենսգրքի 308-րդ հոդվածի 1-ին մասով մեկ դրվագով Էդիկ Հովսեփյանը դատապարտվել է ազատազրկման` 2 տարի ժամկետով, սակայն համաներման որոշման կիրառմամբ ազատվել նշանակված պատժից:

Իսկ մեղադրանքի մյուս հոդվածներով Է.Հովսեփյանը դատապարտվել է 4 տարվա ազատազրկման:

Գործի շրջանակում միակ ոչ պաշտոնյան՝ Հակոբ Թոսունյանը, մեղավոր է ճանաչվել ՀՀ քրեական օրենսգրքի 340-րդ հոդվածի 2-րդ մասով՝ սուտ ցուցմունք տալուն հարկադրելը, և 38-349-րդ հոդվածի 3-րդ մասի 1-ին կետով, և դատապարտվել 4 տարվա ազատազրկման:

Ըստ դատարանի եզրահանգման, Հակոբ Թոսունյանը, առանձնապես ծանր հանցագործության վերաբերյալ քրեական գործով կեղծ ապացույց ստեղծելուն օժանդակելու դիտավորությամբ, 2012 թվականի ձմռանը իրեն պատկանող՝ Քաջարան քաղաքում գործող առևտրի կենտրոնում կին վկայի ու նրա ժամկետային զինծառայող որդու առողջությանը վնաս պատճառելու սպառնալիքներով վկային հարկադրել է տալ սուտ ցուցմունք 2010 թվականի օգոստոսի 28-ին Քաջարան քաղաքի զբոսայգում տեղի ունեցած` Գրիգոր Պապյանի սպանության գործով մեկ այլ անձի գործողությունների վերաբերյալ, որից հետո վկայի կողմից սուտ ցուցմունք տալու պատրաստակամության մասին հայտնել է ՀՀ ոստիկանության Սյունիքի մարզային վարչության Կապանի բաժնի պետի օպերատիվ գծով տեղակալ Գագիկ Դանիելյանին և ՀՀ ոստիկանության քննչական գլխավոր վարչության Սյունիքի մարզի քննչական բաժնի քննիչ Արման Ենգոյանին:
Քննիչ Արման Ենգոյանն առանձնապես ծանր հանցագործության վերաբերյալ քրեական գործով կեղծել է ապացույց` որպես վկա է ներգրավել հիշյալ կնոջն, ով Գագիկ Դանիելյանի և Արման Ենգոյանի ուղղորդմամբ տվել է ակնհայտ սուտ ցուցմունք` այն մասին, թե իբր ականատես է եղել մեկ այլ անձի կողմից Քաջարան քաղաքի զբոսայգու հարակից տարածքում գործող սրճարանից խոհանոցային դանակը վերցնելուն, Գրիգոր Պապյանի հետ վիճաբանելուն, ինչպես նաև նույն դանակի բռնակով Գրիգոր Պապյանի գլխին հարվածելուն, մինչդեռ կինն ոչ միայն ականատես չի եղել նշված գործողություններին, այլ առհասարակ դեպքի վայրում չի գտնվել:

Դրանից հետո Սյունիքի մարզի դատախազի տեղակալ Էդիկ Հովսեփյանի միջնորդությամբ անձի վերաբերյալ քրեական գործի դատական քննության ընթացքում վկան հարցաքննվել է որպես վկա` տալով նշված սուտ ցուցմունքը:

Գագիկ Դանիելյանը, տեղեկանալով անձի վերաբերյալ քրեական գործի դատական քննության ընթացքում սուտ ցուցմունք տալուց հետո վկայի կողմից ընկերուհու հորդորով ցուցմունքների սուտ լինելու վերաբերյալ դատարանին դիմում ներկայացնելու մասին, կեղծ ապացույցի բացահայտումը կանխելու, կատարած հանցագործությունները թաքցնելու նպատակով, չարաշահելով պաշտոնեական լիազորությունները, ուղղորդել է վկային հաղորդում ներկայացնել, թե իբր նա ցուցմունքներից հրաժարվել է սպառնալիքների ազդեցության ներքո, ինչի հետևանքով քրեական պատասխանատվության է ենթարկվել ակնհայտ անմեղ անձը՝ վկայի ընկերուհին:

Դատարանի եզրահանգմամբ, հիշյալ գործողությունները կատարվել են աղմկահարույց սպանության դեպքով հանցագործությունը լիարժեք բացահայտված լինելու պատրանք ստեղծելու, քրեական վարույթ իրականացնող մարմինների գործունեությունը բարենպաստ լույսի ներքո ներկայացնելու մղումներով, չարաշահելով պաշտոնեական լիազորությունները: Դիտավորյալ գործողությունների հետևանքով խեղաթյուրվել է արդարադատության իրականացման գործընթացը, հեղինակազրկվել են ՀՀ ոստիկանության, դատախազության և արդարադատության համակարգերը՝ էական վնաս պատճառվելով պետության օրինական շահերին:

Պաշտպանական կողմն արդեն բողոքներ է ներկայացրել Վերաքննիչ քրեական դատարան, բողոքներում միջնորդություններ են ներկայացվել ամբաստանյալներին արդարացնող դատական ակտ կայացնելու մասին:

Աղբյուր` Փաստինֆո