Փաստ ինֆո

Անմեղության կանխավարկածի սկզբունքի խախտման դեպքում բարոյական վնասի հատուցմանն առնչվող իրավակարգավորումները միայն պետության նկատմամբ են գործում: Այս մասին «Փաստինֆո»-ի լրագրողի հետ զրույցում նշեց փաստաբան Գևորգ Գյոզալյանը՝ պարզաբանելով, որ եթե, օրինակ՝ Գլխավոր դատախազը ասի՝ նա մեղավոր էր, այդ դեպքում անձը կարող է պետությունից բարոյական վնասի փոխհատուցում պահանջել: Իսկ եթե, ասենք, լրագրողը ասի՝ այս մարդը մեղավոր է, նա արդեն կընկնի ՀՀ քաղաքացիական օրենսգրքի 1087.1 հոդվածի՝Պատվին, արժանապատվությանը կամ գործարար համբավին պատճառված վնասի հատուցման կարգը և պայմանները, այսինքն՝ վիրավորանքին ու զրպարտությանն առնչվող հոդվածի ներքո:

Նոր իրավակարգավորումների մեջ մասնավոր հարաբերությունները չեն տեղավորվում, ուստի այդ իրավակարգավորումները դրան չեն օգնելու:

Փաստաբանն ընդգծեց, որ անմեղության կանխավարկածի պաշտպանության ոլորտում Հայաստանում խայտառակ իրավիճակ է տիրում: Ցանկացած հեռուստաալիք միացնելով՝ ամեն վայրկյան, ամեն րոպե կարելի է հանդիպել անմեղության կանխավարկածի սկզբունքի խախտումների:

«Այստեղ շատ լուրջ խնդիր կա, հարգելիներս, քանի դեռ օրինական ուժի մեջ մտած դատական ակտ չկա, մենք չենք կարող ասել, թե անձը հանցագործ է կամ հանցագործ չէ: Չի՛ կարելի»,- ասաց Գ.Գյոզալյանը՝ ընդգծելով, որ մարդուն հիմնահատակ խայտառակ են անում՝ ձևական առումով տողատակին տալով անմեղության կանխավարկածի ստանդարտ սահմանումը:

Որպես ասվածի թարմ օրինակ փաստաբանը հիշատակեց «Անալիտիկ» կայքէջի դեպքը, երբ հրապարակվեց հայտնի տեսաձայնագրությունը: Անձամբ շատ վատ վերաբերվելով նման երևույթների և գտնելով, որ խստագույն պատժի են ենթակա նման մարդիկ, որպես փաստաբան Գ.Գյոզալյանը գտնում է, որ քանի դեռ չկա օրինական ուժի մեջ մտած դատական ակտ, չի կարելի խոսել անձի մեղավորության մասին:

Աղբյուր` Փաստինֆո