Փաստ ինֆո

ՀՀ վերահսկիչ պալատը Սոցիալական փաթեթի հանգստի բաղադրիչի հետ կապված հայտնաբերել է շուրջ 300 մլն դրամի տարբեր տեսակի խախտումներ: Այդ մասին կառավարության նիստում հայտարարեց ՎՊ նախագահ Իշխան Զաքարյանը: Ուսումնասիրությունները կատարվել են ՀՀ խոշոր զբոսաշրջային համայնքներ համարվող Ծաղկաձորի, Դիլիջանի, Աղվերանի, Հանքավանի, Ջերմուկի, Արզնիի, Արտավազի ընտրանքային կարգով ընտրված հյուրանոցներում:

Զաքարյանի տեղեկացմամբ, իրենք Ծաղկաձորում ուսումնասիրել են 21 հանգստյան տուն ու հյուրանոց և հայտնաբերել 128 մլն 681 հազար դրամի խախտում, Ջերմուկում՝ 13 հանգստյան տուն ու հյուրանոց՝ հայտնաբերել 62 մլն 437 հազար դրամի խախտումներ, Դիլիջանում՝ 7 հանգստյան տուն ու հյուրանոց, 43 մլն 490 հազար դրամի խախտում, Արզաքանում՝ 4 հանգստյան տուն ու հյուրանոց՝ 27 մլն 146 հազար դրամի խախտում, Արզնիում՝ երեք առողջարան՝ 22 մլն 717 հազար դրամի խախտում, Արտավազում՝ երեք հանգստյան տուն ու հյուրանոց, հայտնաբերել 10 մլն 230 հազար դրամի խախտում, Հանքավանում՝ երկու հյուրանոց ու հանգստյան տուն՝ 4 մլն 314 հազար դրամի խախտում:

ՀՀ-ում և ԼՂՀ-ում սոցփաթեթի հանգստի ծառայության ապահովման համար ներառված է 69 զբոսաշրջային ընկերություն, յոթում կատարվել են ուսումնասիրություններ: Խոսելով խախտուﬓերի պատճառների մասին, Իշխան Զաքարյանը նշեց. «Որոշ զբոսաշրջային օպերատորներ լիարժեք չեն կատարել հյուրանոցների հանդեպ ունեցած իրենց պայմանագրային պարտավորությունները, ՀՀ պետական բյուջեից ստացված գումարները ծախսել են այլ նպատակով, ինչի պատճառով կուտակվել են պարտքեր: Ամրագրման հավաստագրերը տրված են եղել սոցիալական փաթեթի շահառուների անունով, սակայն, հաճախ սոցիալական փաթեթից փաստացի օգտվել են շահառու չհանդիսացող քաղաքացիներ: Մի խումբ զբոսաշրջային ընկերություններ առկա են սոցիալական փաթեթի ապօրինի կանխիկացումների գործընթացում, ինչը հակասում է ՀՀ սահմանադրությանն ու օրենքներին: Որոշ զբոսաշրջային ընկերություններ սոցփաթեթի ծառայություններ են մատուցում, սակայն, ընդգրկված չեն եղել սոցիալական փաթեթի հանգստի ապահովման մեջ, գործել են հաշվառված օպերատորների հետ կնքված ենթագործակալական պայմանագրերի հիման վրա, ինչը որևէ որոշմամբ հաշվառված չէ»,- «Արմենպրես»-ի հաղորդմամբ, ասաց Զաքարյանը՝ ավելացնելով, որ գումարները փոխանցվել են բանկերում բացված հաշիվներին, սակայն, մի շարք բանկերի կողﬕց զբոսաշրջային օպերատորներին փոխանցումներ չեն կատարվել: Միաժամանակ, բանկերի կողմից ՎՊ աշխատակիցներին տեղեկատվություն չի տրամադրվել՝ հղում անելով Բանկային գաղտնիքի մասին դրույթին:

Իշխան Զաքարյանը ՀՀ կառավարությանն առաջարկեց ոլորտը կարգավորող իրավական ակտերի պահանջները շրջանցելու ,ինչպես նաև սոցիալական փաթեթի գումարների անօրինական կանխիկացումների դեպքերը բացառելու համար լրամշակել սոցիալական փաթեթի հանգստի բաղադրիչի դրույթները:

Վարչապետ Հովիկ Աբրահամյանի հարցին, թե ուսումնասիրությունների արդյունքներն ինչ են լինելու ,Զաքարյանը պատասխանեց, որ պետք է ամբողջական ուսումնասիրություններ կատարեն և խնդրեց, որպեսզի իրենց միանա նաև վարչապետի Վերահսկողական ծառայությունը:

Հովիկ Աբրահամյանը հիշեցրեց, որ գործադիրի նախորդ նիստի ժամանակ 2017-2019 թթ. միջնաժամկետ ծախսային ծրագրերը քննարկելիս անդրադարձել են սոցիալական փաթեթի ֆինանսավորման հարցին և հայտարարել, որ նախարարությունների առաջարկով կասեցրել են այդ գործընթացը: Ըստ վարչապետի, հարցի շուրջ բազմաթիվ հարթակներում տեղի են ունեցել անհիմն քննարկումներ:

«Այդ կասեցումը նվիրված էր հենց այս ստուգումների արդյունքներին, կան յուրացումներ, խախտումներ: Դրա համար էլ շատ ճիշտ էր կասեցնել ծրագիրը 2017-2019 թթ. միջնաժամկետ ծրագրի նախագծում, իսկ 2016 թվականի բյուջեով նախատեսված ծախսերն իրականացնում ենք, որևէ խոչընդոտ կամ կասեցում չկա: Եվ ես համոզված եմ, որ արդյունքներն ունենալուց հետո 2017 թվականի պետական բյուջեի նախագիծը քննարկելիս՝ մենք սոցիալական փաթեթի այդ բաղադրիչն, անպայման, կընդգրկենք: Բայց կարևորն այն է, որ բոլոր պատկան մարմինները, ում նախորդ նիստին տրվել է հանձնարարական, ուսումնասիրեն, և այն բոլոր բացերը, ճանապարհները, որոնց միջոցով տեղի են ունենում խախտումները, փակվեն»,- ասաց ՀՀ վարչապետը՝ ավելացնելով, որ ցավ է, երբ քաղաքացիներն ուղղակի մտնում են գործարքի մեջ հանգստյան տների, առողջարանների համապատասխան աշխատողների հետ:

Աղբյուր` Փաստինֆո