Փաստ ինֆո

Ազգային ժողովի Էթիկայի հարցերով ժամանակավոր հանձնաժողովը հուլիսի 14-ի դռնփակ նիստում որոշեց վարույթ ընդունել փաստաբան Սուսաննա Սարգսյանի՝ ընդդեմ ՀՀ ԱԺ պատգամավոր Տիգրան Ուրիխանյանի դիմումը:

Այս մասին նիստից հետո հայտնեց հանձնաժողովի նախագահ Խոսրով Հարությունյանը: Միաժամանակ, հանձնաժողովը, առաջնորդվելով ԱԺ կանոնակարգ-օրենքի պահանջով, կասեցրել է վարույթը՝ մինչև դատական ակտի կայացումը: Ի դեպ հանձնաժողովը որոշումն ընդունել է միաձայն: Նիստին հանձնաժողովի 6 անդամներից ներկա է եղել 4-ը:

Ս.Սարգսյանը, ով առանձնապես խոշոր չափերի շորթում կատարելու մեջ մեղադրվող Արտակ Գալստյանի պաշտպանն է, խնդրել է կարգապահական վարույթ հարուցել՝ Տիգրան Ուրիխանյանի վարքագիծը «Ազգային ժողովի կանոնակարգ» ՀՀ օրենքի 6–րդ հոդվածով սահմանված էթիկայի կանոններին համապատասխանության հարցը պարզելու և կարգապահական պատասխանատվության ենթարկելու համար:

Ինչպես «Փաստինֆո»-ն ավելի վաղ հայտնել էր, փաստաբանն իր դիմումի մեջ նշել է, որ պատգամավորն իր հայտարարություններով ոտնահարել է ՀՀ Սահմանադրության 3-րդ, 23-րդ, 31-րդ, 39-րդ, 61-րդ, 64-րդ, 66-րդ, 67-րդ, 71-րդ, 162-րդ հոդվածները, ՀՀ քրեական դատավարության օրենսգրքի 18-րդ հոդվածները, ՀՀ Փաստաբանության մասին օրենքի 21-րդ հոդվածը, Մարդու իրավունքների համընդհանուր հռչակագրով սահմանված նորմերը:

Դա, ըստ դիմողի, դրսևորվում է Տիգրան Ուրիխանյանի կողմից ընթացիկ տարվա մայիսի 17-ին արված մի շարք հայտարարություններում՝  «… պարզվեց, որ սրանց թիկունքում կենդանաբանական օրգանիզմներ կան…», «… բացահայտ տականքություններով, ապազգային մակարդակի անբարոյական ստով ու այլանդակությամբ են դրսևորվում, շորթողին զոհ են սարքել ու սեփական փտախտի հոտն են տարածում ինտերնետով մեկ…: Այդ կայքերի հետ կապված փաստաբան կոչվողների խունտան, որը թաթախված է բազմաթիվ պատմությունների մեջ ու փողի դիմաց մարդ վարկաբեկելու բիզնեսով է զբաղված… Իսկ օրենքի թակարդն ընկած հանցագործին փրկելու խնդիր ունեն նրանք, ովքեր վառվում են՝ հասկանալով, որ նրանց օրերը հաշված են…»:

Ս.Սարգսյանը նշել է նաև, որ հունիսի 22-ի հայտարարություններում «…Երբ ձերբակալվեց Անիի (խմբ.- «analitik.am» լրատվական կայքի գործադիր տնօրեն Անի Հովհաննիսյանի) հանցակից ու հովանավոր ՀՀ Ոստիկանության կարգապահական խորհրդի արդեն նախկին անդամ, «Արմքրայմնյուզ» կայքի սեփականատեր Արտակ Գալստյանը…» արտահայտություններն ակնհայտորեն խախտում են ՀՀ Սահմանադրության վերոնշյալ հոդվածները, մասնավորապես, պատգամավորի կողմից հասցվում են վիրավորանքներ՝ անձանց անբարոյական, տականք, այլանդակ, շորթող, հանցագործ անվանելով, և ակնհայտ անձնական հակակրանք արտահայտելով:

Ս.Սարգսյանն եզրահանգել է, որ Տիգրան Ուրիխանյանը, ոտնահարելով ՀՀ սահմանադրությամբ և ՀՀ քրեական դատավարության օրենսգրքով անձին տրված անօտարելի իրավունքները, անձի պաշտպանությունն իրականացնող փաստաբանին մեղադրել է հանցագործությունների կոծկման մեջ, փաստաբանին փաստացի նույնացնելով իր պաշտպանյալի հետ և, ինչո՞ւ չէ, դրանով իսկ փաստաբանին դարձնելով հետապնդման թիրախ:

Աղբյուր` Փաստինֆո