Փաստ ինֆո

Աշխատանքային այցով Արցախ ժամանած ՀՀ խորհրդարանական պատվիրակության ղեկավար, ՀՀ Ազգային ժողովի փոխնախագահ Էդուարդ Շարմազանովն, ում ուղեկցում էր ԼՂՀ ԱԺ «Հայրենիք» խմբակցության նախագահ Արթուր Թովմասյանը, այսօր Հադրութի շրջանի Տող գյուղում տեղակայված ռազմական բանակումի մասնակիցների հետ:

«Արցախպրես»-ի հաղորդմամբ՝ Էդուարդ Շարմազանով հանդես է եկել թեմատիկ դասախոսությամբ՝ հայոց ազգային գաղափարախոսության և նժդեհյան հայրենասիրական դասերի վերաբերյալ:

ՀՀ ԱԺ փոխխոսնակն իր խոսքում կարևորել է հայապահպանության և ազգային ինքնագիտակցության պահպանման գործում Հայկական երկու պետականությունների շուրջ համախմբման գործոնն ու հայրենակերտումը, որը յուրաքանչյուր հայորդուց պահանջում է այդ առաքելության հարցում սեփական դերի և անձնվիրության անհրաժեշտության գիտակցում:

Թեմատիկ դասախոսությունից հետո ճամբարականները հնարավորություն են ունեցել հասարակական-քաղաքական, տնտեսական բնագավառներում և Սփյուռքում հայապահպանության ուղղությամբ տարվող պետական քաղաքականության վերաբերյալ հարցեր ուղղելու ՀՀ Ազգային ժողովի նախագահին:

Պատասխանելով ճամբարականի այն հարցին, որ ՀՀ նախագահ Սերժ Սարգսյանի հայտարարությունը՝ ապրիլյան քառօրյա պատերազմի ընթացքում հայկական կողմի կորցրած 800 հեկտար տարածքը ռազմավարական նշանակություն չունի, հակասում է ազգային շահերին, Էդուարդ Շարմազանովն ընդգծել է, որ ՀՀ նախագահի հայտարարությունը հասարակության մեջ շրջանառության մեջ է դրվել կոնտեքստից դուրս, քանի որ Սարգսյանի հայտարարության թիրախը ադրբեջանական լսարանն է եղել:

«Ադրբեջանական կողմն իրականությանը չհամապատասխանող տեղեկություններ էր տարածում, թե իբր հայկական բնակավայրեր է գրավել: Նախագահ Սերժ Սարգսյանի հայտարարությունը պատասխան էր հենց այդ կեղծ տեղեկատվությանը, որ մենք անբնակ տարածքներ ենք կորցրել ոչ թե բնակավայրեր»,-պարզաբանել է ՀՀ ԱԺ փոխխոսնակը: Հարցերի շրջանակում անդադառնալով Թալիշի տարհանված բնակչության վերադարձի և նրանց սոցիալական վիճակի կարգավորման հարցերում վարվող պետական քաղաքականությանը ԼՂՀ ԱԺ «Հայրենիք» խմբակցության նախագահ Արթուր Թովմասյանը նշել է, որ ներկայումս արվում է հնարավորը ԼՂՀ ղեկավարության կողմից հնարավորը թալիշցիների սոցիալական խնդիրների լուծման և նրանց վերադարձի ուղղությամբ:

«Ցավոք, թալիշցիներն արդեն երկրորդ անգամ ադրբեջանական ագրեսիայի հետևանքով ստիպված եղան հեռանալ հայրենի օջախներից: Նրանցից շատերը ծանր զրկանքներ կրեցին և նույնիսկ հարազատներ կորցրին Ադրբեջանի սանձազերծած ապրիլյան ագրեսիայի ընթացքում և այդ ամենը միջազգային կառույցների անտարբերության պայմաններում»,- նշել է Ա. Թովմասյանը՝ հավելելով, որ հետևողական աշխատանքներ են տարվում  Ադրբեջանի կողմից ապրիլյան ագրեսիայի ընթացքում իրականացրած ռազմական հանցագործությունները նաև միջազգային կառույցներին ներկայացնելու համար:

Նշենք, որ Երևանի պետական համալսարանի ուսանողական 3-րդ ռազմական բանակումը՝ Հայաստանի տարբեր մարզերի, Արցախի և Ջավախքի շուրջ 120 երիտասարդների ընդգրկմամբ մեկնարկել է ընթացիկ տարվա հուլիսի 12-ից և կշարունակվի մինչև հուլիսի 18-ը: Բանակումի ընթացքում նախատեսվումկ է մասնակիցներից կազմված՝ ԼՂՀ ՊԲ պաշտպանական շրջանները խորհրդանշող 9 ջոկատների միջև մրցակցային սկզբունքով անցկացնել ռազմագիտական գործնական պարապմունքներ՝ կրակային, մարտավարական, ֆիզիկական, և այլ պատրաստության, ինչպես նաև ինտելեկտուալ, մարզական, մշակութային մրցումներ, թեմատիկ դասախոսություններ, թիմային աշխատանքներ, սեմինար-քննարկումներ և ուխտագնացություններ դեպի Արցախի պատմամշակութային վայրեր:

Աղբյուր` Փաստինֆո