Փաստ ինֆո

Սոցիալական փաթեթներով առաջարկվող հանգստի բաղադրիչի ժամանակավորապես կասեցման վերաբերյալ ՀՀ կառավարության հայտարարությունը փաստում է, որ ծրագիրը, ըստ էության, տապալված է և ներդրված միջոցները կա՛մ չեն ծառայել իրենց նպատակին, կա՛մ ծրագրի հետագա ընթացքը գտնվում է վտանգի տակ:

Նման կարծիք հայտնեց այսօր «Մեդիա Կենտրոնում տեղի ունեցած քննարկման ժամանակ փաստաբան Նորայր Նորիկյանը:

Փաստաբանը գտնում է, որ ծրագրի հնարավոր կասեցման դեպքում խախտվում է սահմանադրության առաջին հոդվածը, որով ամրագրված է, որ Հայաստանի Հանրապետությունը, ի թիվս այլ հատկանիշների, հանդիսանում է նաև սոցիալական պետություն, բացի այդ, ամրագրված է աշխատակիցների և հանրային ծառայության մեջ գտնվող սուբյեկտների իրավունքները:

Սակայն, այդ ամենից բացի, պետք է հասկանալ, որ գործ ունենք պետական քաղաքականության հետ. պետությունը հայտարարում է, որ իր կողմից ներդրված ջանքերը իր քաղաքացիների սոցիալական երաշխիքների և բարեկեցիկ կյանք ապահովվելու գործընթացում անզոր են և չունի համապատասխան նյութական միջոցներ, կամ այդ նյութական միջոցների ռացիոնալ օգտագործումը գտնվում է վտանգի տակ, և նա ի վիճակի չէ այս պահին ապահովվել այդ գումարների ռացիոնալ օգտագործումը, հետևաբար, հայտ է ներկայացնում ծրագրի ժամանակավոր կասեցման:

Ըստ փաստաբանի՝ հարցի իրավական ապահովման երաշխիքներն այս պահի դրությամբ ՀՀ օրենսդրությամբ ամբողջությամբ կարգավորված չեն, և սա ավելի շուտ պետական ծրագրային իշխանության խնդիր է, և հասարակությունը պետք է առավել շատ պահանջ ներկայացնի կառավարությանը, որպեսզի կառավարությունը շարունակական դարձնի գործընթացը և ոչ թե իրավական գործընթացով հնարավոր լինի հասնել այդ ծրագրի գործողության շարունակությանը:

«Կա՛մ սա մեծագույն բլեֆ է, բյուջեում փող չկա, և կառավարությունը այսպիսի պատրվակով փորձում է հրաժարվել ծրագրից, քանի որ խոսքը գնում է լրջագույն գումարների մասին, կա՛մ իսկապես այնպիսի աղետալի չափերի է հասել գումարների յուրացման գործընթացը, որ իրենք այլևս անկարող են և հայտարարում են ծրագրի տապալման մասին:

Փաստաբանի համար իսկապես անհասկանալի է նախընտրական տարվա շեմին կառավարությունը հանձնառում է իրականացնել մի այնպիսի հակասոցիալական գործընթաց, որից շուրջ 100 000 մարդ զրկվում է ծրագրից օգտվելու հնարավորությունից այն դեպքում, երբ այդ մարդիկ հանդիսանում են հանրային ծառայության մեջ գտնվողներ, որոնք, ինչպես տարիների փորձը ցույց է տվել, իրենք էլ ապահովում են իշխանության վերարտադրությունը:

Այստեղից հետևում է, որ եթե իշխանությունը գնում է այսպիսի քայլի, կա՛մ նա կամիկաձե է, կա՛մ իսկապես այնպիսի աղետալի չափերի է հասել գումարների յուրացման գործընթացը, որ իրենք այլևս անկարող են և հայտարարում են ծրագրի տապալման մասին:

Իսկ եթե կառավարությունն այսքան անկեղծ է, ապա պետք է կարճ ժամանակ հետո հանրությանը հաշվետվություն ներկայացնեն և պատասխանեն առնվազն հետևյալ հարցերին.

որքա՞ն է կազմել այս պահի դրությամբ չարաշահումների ծավալը, ո՞ր սուբյեկտներն են իրականացրել այդ ծավալը, արդյո՞ք այդ չարաշահումները կրել են համակարգված բնույթ՝ (վերևից ներքև, կամ ներքևից վերև), չե՞ն պարունակում իրենց մեջ կոռուպցիոն մեխանիզմներ, Ի՞նչն է պատճառ հանդիսացել այդ չարաշահումների համար և, վերջապես, ովքե՞ր են այդ «հերոսները», որ կանգնած են այդ չարաշահումների գլխավերևում:

Փաստաբանն անընդունել է համարում պատճառաբանությունները՝ որևէ նախարարի կամ վարչապետի վատ աշխատելու վերաբերյալ. եթե նրանցից որևէ մեկը վատ է աշխատում, ապա պետք է նրան փոխել կամ դատել, ոչ թե փակել կառավարության դռները:

Աղբյուր` Փաստինֆո