Փաստ ինֆո

Մոսկվայի Տվերյան դատարանը թույլատրել է կալանավորել Զախարի Կալաշովին, ով հայտնի է որպես «օրենքով գող» Շաքրո Մոլոդոյ՝ շորթման մեղադրանքով: Այս մասին տեղեկացնում է РИА Новости-ի թղթակիցը դատարանի դահլիճից:

Նախօրեին ձերբակալված Կալաշովն անցնում է Մոսկվայի Ռոչդելյան փողոցի ռեստորանի տիրոջից խոշոր գումարի շորթման գործով:

2015թ. դեկտեմբերի կեսերին Մոսկվայի կենտրոնում գտնվող ռեստորաններից  մեկի մոտ տասը հոգուց բաղկացած խմբի միջև տեղի էր ունեցել փոխհրաձգություն, որի հետևանքով տարբեր աստիճանի ծանրության վնասվածքներով հիվանդանոց էր հասցվել հինգ տղամարդ, նրանցից երկուսը հետագայում մահացել էին:

«Քննիչի միջնորդությունը բավարարել, Կալաշովի նկատմամբ ընտրել կալանավորումը՝ որպես խափանման միջոց»,-  ասել է դատավոր Մարիա Սիզինցևան:

Այսպիսով, դատարանը կալանավորել է քրեական հեղինակությանը մինչև օգոստոսի 15-ը:

Քննիչը՝ հիմնավորելով Կալաշովին կալանավորելու իր խնդրանքը, հայտարարել է, որ մեղադրյալը՝ հայտնվելով ազատության մեջ, կարող է թաքնվել: «Նա մեղադրվում է կազմակերպված խմբի կողմից կատարված ծանր հանցագործության մեջ: Կալաշովը կարող է թաքնվել, նրա հանցակցուհին արդեն թաքնվել է արտասահմանում, նա հեռակա կալանավորվել է և նրա նկատմամբ միջազգային հետախուզում է հայտարարվել»,- ասել է քննիչը:

Կալաշովի պաշտպան Ալեքսանդր Գոֆշտեյնը հայտարարել է մեղադրանքի անհիմն լինելու և կալանավորման հիմքերի բացակայության մասին: Միաժամանակ նա չի առաջարկել գրավ կիրառել կամ էլ չի խնդրել տնային կալանքի մասին:

«Միակ ապացույցը, որ Կալաշովը կարող է թաքնվել քննությունից, Անվտանգության դաշնային ծառայության օպերատիվ աշխատողի տեղեկանքն է: Ծառայությունը երեք ամիս առաջ օպերատիվ տեղեկություններ է մշակել և պարզել, որ նա երկու երեխա ունի: Իսկ Դուք, հարգելի դատարան, հիմա հաստատեցիք, որ նրանք երեքն են: Նրա անձնագրում, որը Դուք տեսել եք, նշված է, որ Կալաշովը հաշվառված է Մոսկվայում, իսկ Անվտանգության դաշնային ծառայության տեղեկանքից հետևում է՝ Մոսկվայի շրջանում: Փաստաթղթերում ասվում է, որ Կալաշովը միջազգային հետախուզման մեջ է: Դե, այդ դեպքում նա որտե՞ղ կթաքնվի»,- ասել է Գոֆշտեյնը՝ խնդրելով բաց թողնել Կալաշովին՝ նրա նկատմամբ չընտրելով որևէ խափանման միջոց:

Պաշտպանական կողմը նշում է, որ ռեստորանում կոնֆլիկտի ու փոխհրաձգության մասնակից անձանց վկայությունները հակասական են: Մեղադրյալի փաստաբան Տատյանա Միրոնովան նշել է, որ ինչ-որ մեկի հղումները Կալաշովին հիմք չեն վերջինիս կալանավորման համար: «Ցանկացած բոմժ կարող է ասել, որ նրան Շաքրոն է ուղարկել: Սակայն դա առիթ չէ մարդուն աբսուրդային մեղադրանքով կալանավորելու համար»,- պարզաբանել է նա:

Ինքը՝ Կալաշովը, դատարանում չի խոսել՝ ընդամենը պաշտպանել է փաստաբանների դիրքորոշումը:

Աղբյուր` Փաստինֆո