Փաստ ինֆո

Չեմպիոնների լիգայի որակավորման 2-րդ փուլի 1-ին խաղում Հայաստանի չեմպիոն «Ալաշկերտը» 0:2 հաշվով պարտվեց Թբիլիսիի «Դինամոյին»: «Armsport.am»-ը գրում է, թե պարտությունը պարտություն, սակայն այն կարող էր ավելի բարվոք լինել...

Հանդիպման մեկնարկից տանտերերը բավականին մեծ առավելություն ունեին և միտված էին գրոհների: «Ալաշկերտցիները» մինչև 20-25-րդ րոպեն մեծ ուժերով պաշտպանվելուց հետո որոշակիորեն բեկեցին խաղի ընթացքն ու ապացուցեցին, որ մրցակցի համար այդքան էլ հեշտ չի լինելու: 

Առաջին խաղակեսում ընդամենը 1, այն էլ մոտ 35 մետր հեռավորությունից և բավականին բարձր հարվածով ալաշկերտցիները գնացին ընդմիջման:

Խաշմանյանը փոխեց մարտավարությունը՝ Տասիչի փոխարեն խաղադաշտ դուրս բերելոց Բարեղամյանին. այդպիսով երևանյան թիմը սկսեց գործել 4 պաշտպաններով: 

53-րդ րոպեին խաղադաշտ մտած Օտար Կիտեիշվիլին ընդամենը 2 րոպե անց հաջող անցում կատարեց և գնդակն ուղարկեց Կասպարովի պաշտպանած դարպասի հեռավոր անկյունը: Գոլը ոգևորեց «դինամոյականներին», ովքեր շարունակեցին մեծ ուժերով գրոհներ կազմակերպել: Հերթական արագացումից հետո ավագ Վահագն Մինասյանը ստիպված էր սեփական տուգանայինում խախտել կանոնները Ջամբալ Ջիգաուրիի նկատմամբ: 11 մետրանով հարված, որը հստակ իրացրեց Գիորգի Կվիտաիյան: 

2:0 և կորցնելու ոչինչ չունեցող «Ալաշկերտը» նետվեց առաջ: 75-րդ րոպեին Արտակ Գրիգորյանը հարմար դիրքում ստացավ գնդակը, հարված կատարեց, իսկ գնդակը շատ վտանգավոր անդրադարձից հետո դիպավ դարպասաձողին: 90-րդ րոպեին Արտակ Եդիգարյանի իրացրաց տուգանայինից Արտակ Գրիգորյանը գլխով շատ լավ հարված կատարեց. գնդակը մի փոքր շեղությամբ անցավ դարպասաձողի կողքով:

«Դինամոյի» խաղացողները 3-րդ գոլը խփելու լավ հնարավորություններ ունեին, սակայն դա չստացվեց հատկապես Գևորգ Կասպարովի շնորհիվ: Հատկանշական են խաղավարտից 10 րոպե առաջ Կասպարովի 2 հիասքանչ սեյվերը:

Այսպիսով, «Ալաշկերտը» պարտվեց 0:2 հաշվով և մեկ շաբաթ անց կհյուրընկալի «Դինամոյին» Երևանում:

Աղբյուր` Փաստինֆո