Փաստ ինֆո

Ազգային ժողովի անկախ պատգամավոր, «Լուսավոր Հայաստան» կուսակցության նախագահ Էդմոն Մարուքյանը հայտնում է, թե քիչ առաջ իրեն է փոխանցվել ՀՀ ՏՄՊՊՀ նախագահ Արտակ Շաբոյանի պատասխան գրությունը, որով ինքը տեղեկացվում է, որ Լարսի անցակետի փակման հետևանքով ավիատոմսերի գները թանկացնող ընկերությունները ՌԴ ռեզիդենտ ընկերություններ են, և «Հանձնաժողովը դիմել է ՌԴ հակամենաշնորհային ծառայության ղեկավարին ու Եվրասիական տնտեսական հանձնաժողովի մրցակցության և հակամենաշնորհային կարգավորման հարցերով նախարարին՝ պարզաբանման նպատակով ուսումնասիրություններ սկսելու առաջարկությամբ»:

Պատգամավորն այս կապակցությամբ հաղորդագրություն է տարածել, որում, մասնավորապես, ասված է.

«Իրավական առումով նշեմ հետևյալը՝ Տնտեսական մրցակցության պաշտպանության մասին ՀՀ օրենքի 4-դ հոդվածի համաձայն՝ ապրանքային շուկայի սուբյեկտներն են տվյալ ապրանքի/ծառայության իրացնողը (վաճառողը, մատակարարը, օտարողը, մատուցողը, կատարողը) և ձեռքբերողը (գնորդը, ստացողը, ընդունողը, սպառողը): Այսինքն, օրենքը տարբերություն չի դնում տվյալ ապրանքային շուկայում գործող սուբյեկտի ՀՀ կամ օտարերկրյա ռեզիդենտ լինելու մասով:

Միակ պայմանը, ըստ օրենքի, ՀՀ-ում համապատասխան ապրանք/ծառայություն իրացնելն է: Հետևաբար, հանձնաժողովի լիազորությունների շրջանակում է ՀՀ-ում գործող այդ ընկերությունների գործունեության հետ կապված վարչական վարույթ հարուցելն ու նրանց պատասխանատվության ենթարկելը:

Այլապես ստացվում է, որ այլ երկրում հիմնադրված և Հայաստանում մասնաճյուղ ունեցող ցանկացած ընկերություն ՀՀ քաղաքացիների հետ գործարքներ կնքելիս կարող է իրեն թույլ տալ խախտել ՀՀ-ում գործող՝ տնտեսական մրցակցությանը վերաբերվող օրենսդրությունը և չենթարկվել պատասխանատվության, եթե իր հիմնադրման վայրի համապատասխան մարմինը (իհարկե՝ առկայության դեպքում) դա չցանկանա կամ երբ ցանկանա:

Նույն օրենքի 5-րդ հոդվածով՝ հակամրցակցային համաձայնություններ են համարվում տնտեսվարող սուբյեկտների միջև կնքված այն գործարքները, նրանց համաձայնությունները, ուղղակի կամ անուղղակի համաձայնեցված գործողությունները կամ վարքագիծը, տնտեսվարող սուբյեկտների միավորումների ընդունած որոշումները, որոնք ուղղակի կամ անուղղակի հանգեցնում են կամ կարող են հանգեցնել մրցակցության սահմանափակմանը, կանխմանը կամ արգելմանը..:

Ինչպես արդեն նշել եմ, առկա է հիմնավոր կասկած առ այն, որ այդ բոլոր ընկերությունները պայմանավորվել են գների միաժամանակյա բարձրացման վերաբերյալ, քանի որ Լարսի փակման ժամանակահատվածում վառելիքի էական թանկացում կամ այլ օբյեկտիվ պատճառներ չեն եղել, որոնք կարող էին լինել ավիատոմսերի գների 2-3 անգամ աճելու նախապայման:

Տվյալ դեպքում առնվազն ինձ համար ակնհայտ է, որ ՏՄՊՊ հանձնաժողովը որևէ գործուն քայլ կատարելու նպատակ չունի, իսկ նշված ավիաընկերությունները կարող են հանգիստ հաշվել օրենքի խախտմամբ ստացված իրենց գերշահույթը»:

Լուսանկարը՝ Էդմոն Մարուքյանի ֆեյսբուքյան էջից

Աղբյուր` Փաստինֆո