Փաստ ինֆո

Վարշավայում ընթացող ՆԱՏՕ-ի գագաթնաժողովում ՀՀ Նախագահ Սերժ Սարգսյանը շատ կարևոր ուղերձներ հղեց Լեռնային Ղարաբաղի հիմնախնդրի կարգավորման մասին. լրագրողների հետ հանդիպման ժամանակ, «Արցախպրես»-ի տեղեկացմամբ, ասաց ԱԺ փոխխոսնակ Էդուարդ Շարմազանովը:

Նա մատնանշեց, որ Սերժ Սարգսյանն իր ելույթումշեշտադրեց, որ Հայաստանի Հանրապետությունն ու Լեռնային Ղարաբաղը երկարաժամկետ խաղաղության կողմնակիցն են:

«Մենք մեր հասարակությանը պետք է պատրաստենք խաղաղության: Այդ խաղաղությունը պետք է լինի արժանապատիվ, ԼՂ-ն ոչ մի ձև, ոչ մի տարբերակով չի կարող լինել Ադրբեջանի կազմում»,- ասաց էդուարդ Շարմազանովը: Նա նշեց, որ բոլորն էլ պետք է հասկանան, որ պատերազմի սպառնալիքը Ադրբեջանի, նաև՝ Թուրքիայի կողմից է:

Նախագահ Սերժ Սարգսյանի մյուս կարևոր ուղերձը, ըստ Էդուարդ Շարմազանովի, այն էր, որ շեշտվեց, որ ՆԱՏՕ-ն այն հարթակը չէ, որտեղ պետք է քննարկվի ԼՂ հիմնախնդիրը, Ադրբեջանի փորձերը՝ քննարկումները տանել այլ՝ օրինակ՝ ԵԽԽՎ-ի, թե մեկ այլ հարթակ, ընդունելի չեն:

Էդուարդ Շարմազանովը Նախագահի մյուս կարևոր ուղերձը համարեց այն, որ շեշտվեց, որ ապրիլյան պատերազմից հետո ձեռք բերված Վիեննայի և Սանկտ Պետերբուրգի պայմանավորվածությունները պետք է ի կատար ածվեն. հետաքննության մեխանիզմներ պետք է դրվեն և ԵԱՀԿ պետք է ընդլայնվի Մինսկի խմբի դիտորդական առաքելության խմբի կազմը: Նկատեց, որ Ադրբեջանը փորձում է հետքայլ անել, չկատարել այդ պայմանավորվածությունները:

«Ադրբեջանական կողմը պնդում է, որ ստատուս քվոն անընդունելի է, որ պետք է տարածքների վերադարձնել: Մենք հայտարարում ենք, որ մեզ ձեռնտու չէ ստատուս քվոն, ստատուս քվոյի հիմնական խոչընդոտողն Ադրբեջանն է: Մենք բոլորս գտնում ենք, որ ստատուս քվոն պետք է փոխվի, ստատուս քվոյի փոփոխման համար պետք է մեկ քայլ՝ պետք է ճանաչել ԼՂ-ի ինքնորոշման իրավունքը: Վարշավայում Սերժ Սարգսյանը նշեց, որ թիվ մեկ խնդիրը Արցախի կարգավիճակի, Արցախի ժողովրդի ինքնորոշման իրավունքի ճանաչումն է: Արցախի ժողովուրդն ինքը պետք է լինի իր ճակատագրի դարբինը»,- նշեց ԱԺ փոխխոսնակը:

էդուարդ Շարմազանովն անդրադարձավ նաև Ռուսաստանի և ՆԱՏՕ-ի հարաբերություններին, հիշեցրեց, որ առաջիկայում նախատեսվում է հանդիպում, նշեց, որ մենք պետք է շահագրգռված լինենք, որ այդ երկու կառույցների միջև հարաբերությունները լավանան:

Անդրադառնալով ՆԱՏՕ-ին՝ Հայաստանի անդամակցությանն ասաց, որ անձամբ իր կարծիքով, Հայաստանը չպետք է դառնա ռազմական դաշնակիցն այն կառույցի, որտեղ կա Թուրքիան:

Աղբյուր` Փաստինֆո