Փաստ ինֆո

2015թ. հունվարի 15-ին բանակ զորակոչված և նույն թվականի նոյեմբերին հոգեկան հիվանդությամբ զորացրված զինծառայող 19-ամյա Արթուր Հակոբյանի գործով քրեական գործի վարույթը կարճվել է՝ հանցագործության դեպքի բացակայության հիմքով:

«Փաստինֆո»-ն ավելի վաղ տեղեկացրել էր, որ Արթուր Հակոբյանի հարազատներն ահազանգել էին ծառայության ընթացքում նրա նկատմամբ դրսեւորված անմարդկային վերաբերմունքի մասին` նշելով, որ նա ծեծի է ենթարկվել սպայական անձնակազմի կողմից, ինչի հետևանքով ծառայության ընթացքում ձեռք է բերել հոգեկան առողջության հետ կապված լուրջ խնդիր:

Միևնույն ժամանակ հարազատները նշել էին, որ Հակոբյանը ծառայության ընթացքում որևէ դժգոհություն չի հայտնել մինչև 2015թ. նոյեմբերի 6-ի դեպքը՝ նշված օրը, ըստ զինծառայողի, ինքը ծեծի է ենթարկվել Ջիվան անունով սպայի կողմից:

Սպայական անձնակազմի կողմից զինծառայողին ծեծի ենթարկելու հաղորդման հիման վրա ՀՀ քննչական կոմիտեն հայտարարեց քրեական գործ հարուցելու մասին եւ զինվորական քննչական գլխավոր վարչությունում հարուցվեց քրեական գործ՝ ՀՀ քրեական օրենսգրքի 358.1 հոդվածի 2-րդ մասով և Ա.Հակոբյանը ճանաչվեց տուժող:

Սակայն նախաքննության ընթացքում պարզվեց, որ զինծառայողը մի քանի ամսվա ընթացքում տարբեր ախտորոշումներով 5 անգամ բուժում է ստացել զորամասի բուժկետում. նրա մոտ, մասնավորապես, 2 անգամ բուժում է ստացվել` «Նեյրոցիլկուլյատոր ատոմիա», 1-ական անգամ` «Ռինոֆարինգիտ»,  «Թութք»,  և «Տոնզիլիտ» ախտորոշմամբ: Իսկ արդեն 2015թ. նոյեմբերի 6-ին Հակոբյանը հոգեկան շեղումների նշաններով ընդունվում է զորամասի բուժկետ, իսկ հաջորդ օրը` ուղեգրվում ՀՀ ՊՆ Զանգեզուրի կայազորային հոսպիտալ, որտեղից էլ Երևանի կայազորի հոսպիտալի՝ հոգեբուժական բաժանմունք:

Ինքը` Հակոբյանը հակասական ցուցմունքներ է տվել  մայոր Ջիվանի կողմից իր նկատմամբ ենթադրյալ բռնությունների վերաբերյալ: Նախ հայտնել է, որ մայորն իրենից պահանջել է  զորամասի ծառերը ջրել, և չջրելու պատճառով սպան քաշել է իր ականջն ու ձեռքի բաց ափով հարվածել պարանոցին:

Ըստ Հակոբյանի՝ սպան իրեն տեսնելիս  միշտ հարվածել է իր պարանոցին, իսկ 2015թ. նոյեմբերի 6-ին, երբ իր ընկերոջը՝ Ցոլակի հետ զորամասից դուրս են եկել և խանութ գնացել Ջիվանը նրան տեսնելով հայհոյել է, ապա ապտակել: Զինծառայողը հայհոյանքից վիրավորվել և ազդվել է, ցանկացել է սպային պատասխանել՝ հարվածել կամ իրեն վնասել, բայց չկարողանալով հեռացել է:

Զինծառայողը նաև նշել է, որ  Ջիվանը միակ սպան չի եղել, որ իրեն ծեծի է ենթարկել կամ նվաստացրել, այլ սպաներ ևս իրեն ծեծի են ենթարկել:

Զինծառայողը մի շարք սպաների մեղադրել է իրեն հարվածելու մեջ, սակայն  բոլոր դրվագները հերքվել են հենց նրա զինակից ընկերների կողմից: Փորձաքննությամբ հիմնավորվել է, որ տղայի մոտ առկա է սուր պոլիմորֆ փսիխոտիկ խանգարում շիզոֆրենային ախտանիշներով,  հոգեկան գործունեության փսիխոտիկ մակարդակի խանգարում:

Ինչի մասին վկայել են լսողական խանգարումները (հալյուցինացիաները) և դրանց առավելապես կեղծ բնույթը, անհեթեթ բազմաբովանդակ զառանցական մտքերը, դատողությունների պարալոգիզմը, անադեկվատ վարքը, կեղծ ճանաչողության էպիզոդները, կիրառված բուժման նկատելի արդյունավետությունը:

Արթուր Հակոբյանի հոգեկան առողջության հետ կապված խնդիրները հաստատվել են այն բանից հետո, երբ նրան տեղափոխել են Երևանի կայազորային հոսպիտալ, սակայն մինչ այդ նշենք, որ երբ Հակոբյանը զորակոչվել է ԶՈւ-եր նրա մոտ հոգեկան խնդիր չի արձանագրվել և պիտանի է ճանաչվել  շարային ծառայության համար:

Հիվանդության հոգեկան գործունեության խանգարման ստույգ ժամկետը նշել հնարավոր չէ եղել, սակայն այն դասվում է ժառանգական նախատրամադրվածություն ունեցող հոգեկան հիվանդությունների շարքին, որոնք կարող են դրսևորվել տվյալ անձի մոտ որոշակի պայմաններում:

Ա.Հակոբյանի մոտ հայտնաբերված պրոդուկտիվ հոգեախտաբանական ախտանիշների առկայությունը, առավելապես ընկալման, մտածողության խեղաթյուրումները զրկում են նրան ճիշտ ընկալել և վերարտադրել կարողությունից:

Ըստ մասնագետների` «Սուր պոլիմորֆ փսիխոտիկ խանգարում շիզոֆրենային ախտանիշներով»,  դա փսիխոտիկ մակարդակի հոգեկան խանգարում է, որն առաջացել է ծառայության ընթացքում, առավելապես պայմանավորված է ժառանգական գործոնների, անձնային առանձնահատկությունների և բանակային կյանքի սթրեսոգեն պայմանների անբարենպաստ փոխներազդեցությամբ, ուստիև զորակոչային հանձնաժողովն այն հայտնաբերել չէր կարող:

Մեր տեղեկություններով՝ Հակոբյանը դպրոցական հասակում, երբ գտնվել է ՌԴ-ում 5 տարի սովորել է մտավոր հետամնացություն ունեցող երեխաների համար նախատեսված ինտերնատ-դպրոցում:

Աղբյուր` Փաստինֆո