Փաստ ինֆո

Ավետիսյանների ընտանիքի անդամների դաժան սպանության գործով այսօրվա դատական նիստում տուժողների իրավահաջորդների ներկայացուցիչները դատարանին ինքնաբացարկի միջնորդություն են ներկայացրել:

Տուժող կողմն, այսպիսով, իր անհամաձայնությունն է հայտնել Ավետիսյանների ընտանիքի անդամների կյանքի իրավունքի խախտման փաստով 450 հազար եվրոյի չափով բարոյական վնասի հատուցման պահանջով ընդդեմ Ռուսաստանի Դաշնության իրենց քաղհայցն ընդունելուց հրաժարվելու դատարանի որոշման կայացման ընթացակարգերի հետ կապված: Մասնավորապես, ըստ դատարանի, մայիսի 27-ին քննարկում է տեղի ունեցել ու որոշում ընդունվել, մինչդեռ քննարկում տեղի չի ունեցել:

Ինչպես «Փաստինֆո»-ի լրագրողի հետ զրույցում նշեց տուժողի իրավահաջորդի ներկայացուցիչ, փաստաբան Միհրան Պողոսյանը, սա ցույց է տալիս, որ դատարանն այլ վայրերից կաշկանդվածություն ունի, ուստիև չի կարող անաչառ լինել:

Միջնորդության դեմ մեղադրողը առարկել է, իսկ պաշտպանական կողմը՝ թողել է դատարանի հայեցողությանը:

Դատարանը նշել է, որ իրեն մեկ աշխատանքային օր է անհրաժեշտ որոշում կայացնելու համար՝ միջնորդության վերաբերյալ որոշումը կհրապարակվի հուլիսի 12-ին:

Մեզ հետ զրույցում տուժողի իրավահաջորդի ներկայացուցիչ Միհրան Պողոսյանը կարծիք հայտնեց, որ միջնորդությունը մերժվելու է զուտ այն պատճառով, որ դատարանը հայտնել է՝ որոշման հրապարակման նիստում որոշում կկայացվի հաջորդ նիստը նշանակելու մասին: Այսինքն՝ ըստ Մ.Պողոսյանի, դատարանը կանխակալ մոտեցում ունի, որ միջնորդությունը մերժելու է և դրանից հետո էլ դատական նիստ է տեղի ունենալու:

Ի պատասխան մեր հարցի՝ Միհրան Պողոսյանը նշեց, որ ինքնաբացարկի միջնորդությունը մերժելու դեպքում իրենց վստահորդների հետ խորհրդակցելուց հետո առանձին ընթացակարգով բողոք կներկայացվի դատարանի քաղհայցն ընդունելուց հրաժարվելու որոշման դեմ:

Աղբյուր` Փաստինֆո