Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, գողության մեջ մեղադրվող երիտասարդին անպարտ է ճանաչել և արդարացրել:

Այդ մասին «Փաստինֆո»-ի թղթակիցը տեղեկացավ Վ.Գ.-ի պաշտպան Մարինե Ֆարմանյանից:

Նշենք նաև, որ մեղադրող դատախազը, ձեռք բերված ապացույցների համակցությամբ հիմնավորված համարելով ամբաստանյալին առաջադրված մեղադրանքը, միջնորդել էր նրան դատապարտել 1 մլն ՀՀ դրամի չափով տուգանքի:

Ըստ մեղադրանքի՝ Վ. Գ.-ն ուրիշի գույքի գաղտնի հափշտակություն կատարելու դիտավորությամբ, իրեն հատկացված բանալու միջոցով բացել է Երևանի Վարդանանց 28 հասցեում գործող` «Վիվառո Բեթինգ» ՍՊԸ-ին պատկանող բուքմեյքերական գրասենյակներից մեկի մուտքի դուռը, ապա` զրկված լինելով ոչ աշխատանքային ժամերին գրասենյակի տարածք մուտք գործելու իրավունքից, ապօրինի մուտք է գործել գրասենյակի տարածք և միասնական դիտավորությամբ դրամարկղից գաղտնի հափշտակել է զգալի չափի` ընդհանուրը 370.000 ՀՀ դրամ գումար:

Վ.Գ.-ին մեղադրանքի է առաջադրվել ՀՀ քրեական օրենսգրքի 177-րդ հոդվածի 2-րդ մասի 3-ին կետով, նրա նկատմամբ որպես խափանման միջոց է ընտրվել չհեռանալու մասին ստորագրությունը:

Աղբյուր` Փաստինֆո