Փաստ ինֆո

Զինավարժությունների ժամանակ զինտեխնիկայից հարված ստանալու հետևանքով առողջական լուրջ խնդիրներ ձեռք բերած և փետրվարի 11-ին մահացած զինծառայող Աշոտ Այվազյանի հայրը՝ Հովհաննես Այվազյանը, դիմել է դատարան՝ որդու կյանքի իրավունքի խախտման համար ոչ նյութական վնասի հատուցման պահանջով: 

«Փաստինֆո»-ի թղթակցի հետ զրույցում Հովհաննես Այվազյանի ներկայացուցիչ Մարինե Գրիգորյանը հույս հայտնեց, որ դատարանը կբավարարի իրենց պահանջը, իսկ եթե՝ ոչ, ապա սպառելով ներպետական դատական ատյանները՝ իրենք գանգատ կներկայացնեն Մարդու իրավունքների եվրոպական դատարան:

2012թ. Աշոտ Այվազյանը ծառայել է Վարդենիսի զորամասում, մեկ ու կես տարի ծառայությունից հետո հարվածի հետևանքով ստացած վնասվածքի պատճառով նա զորացրվել է:

Կատարված հետազոտություններով՝ Այվազյանի մոտ հայտնաբերվել է չարորակ ուռուցք, Առողջապահության նախարարությունից զինծառայողի հարազատներին հայտնել են, որ նրա բուժումը պետք է իրականացվի արտեկրում: Աշոտ Այվազյանի հայրը դիմել է Գերմանիայի Դաշնային Հանրապետության Քյոլնի համալսարանական կլինիկա, որտեղ ձեռք է բերվել պայմանավորվածություն հետազոտությունների համար և վճարել մի քանի հազար եվրո, սակայն բուժման կուրսն սկսելու համար անհրաժեշտ է եղել զգալի չափերի հասնող՝ շուրջ 25 000 եվրո գումար, ինչի համար էլ զինծառայողի հարազատները դիմել են Պաշտպանության նախարարություն: Սակայն ՊՆ-ից նրանց հայտնել են, որ իրենք զինծառայողի բուժումն արտերկրում կազմակերպելու գործընթաց չունեն:

Այսքանից հետո ծառայության ընթացքում առողջական խնդիրներ ձեռքբերած Աշոտ Այվազյանը 2015թ. հուլիսի 9-ին հայցադիմում է ներկայացրել Վարչական դատարան՝ ընդդեմ ՀՀ պաշտպանության նախարարության՝ խնդրելով պարտավորեցնել ՀՀ պաշտպանության նախարարությանը վճարել միանվագ դրամական օգնություն:

15.07.2015 թվականին հայցադիմումն ընդունվել է վարույթ, սակայն 2016թ. փետրվարի 11-ին Աշոտ Այվազյանը մահացել է, և 23.02.2016 թվականին հայցվորի ներկայացուցիչն այդ մասին դիմում է ներկայացրել ՀՀ վարչական դատարան:

Այվազյանի մահվան հիմքով գործի վարույթը կարճվել է:

Աղբյուր` Փաստինֆո