Փաստ ինֆո

Ռուսաստանի նախագահ Վլադիմիր Պուտինը հրամանագիր է ստորագրել Թուրքիայի հանդեպ սահմանափակումները վերացնելու մասին: Ըստ РИА Новости-ի, այս մասին տեղեկացնում է Կրեմլի մամուլի ծառայությունը: Մասնավորապես, հանվել է դեպի Թուրքիա տուրիստական տուրերի վաճառքի արգելքը:

Պուտինը նաև հանձնարարել է կառավարությանը միջոցներ ձեռնարկել երկու երկրների միջև չարտերային փոխադրումների արգելքը վերացնելու ուղղությամբ և թուրք գործընկերների հետ քննարկել Անկարայի հանդեպ տնտեսական սահմանափակումները հանելու մեխանիզմները:

Նշվում է, որ հրամանագիրը ուժի մեջ է մտնում դրա պաշտոնական հրապարակման օրվանից:

Ավելի վաղ, ելույթ ունենալով Ռուսաստանի դեսպանների և մշտական ներկայացուցիչների հետ խորհրդակցությանը, Պուտինը ասել էր, որ մոտակա ժամանակներս Մոսկվան միջոցներ կձեռնարկի Անկարայի հետ երկկողմ համագործակցության վերականգնման համար:

Իր հերթին վարչապետ Դմիտրի Մեդվեդևը ընդգծել է, որ Թուրքիայի դեմ պատժամիջոցների վերացումը պետք է փուլ առ փուլ արվի, որպեսզի վնաս չպատճառվի ռուսաստանյան արտադրողներին:

Թուրքական ռազմաօդային ուժերի կողմից Սիրիայի երկնքում Су-24 ռմբակոծիչի կործանումից հետո Մոսկվան Անկարայի դեմ մի շարք սահմանափակումներ էր մտցրել:

Մասնավորապես, արգելքն առնչվում էր թուրքական բանջարեղենի, մրգերի և ծաղիկների ներմուծմանը: Բացի այդ, Մոսկվան դադարեցրել էր Թուրքիայի հետ առանց արտոնագրերի ռեժիմի գործողությունը և սահմանափակել Ռուսաստանում թուրքերի աշխատանքային գործունեությունը:

Սահմանափակումները հանելու գործընթացը սկսվել է այն բանից հետո, երբ Թուրքիայի նախագահ Թաիբ Էրդողանը իր ռուս գործընկերոջը հղած ուղերձում ներողություն է խնդրել ինքնաթիռը խփելու համար և ցավակցություն հայտնել օդաչուի զոհվելու առնչությամբ:

Աղբյուր` Փաստինֆո