Փաստ ինֆո

Ermenihaber.am-ի հաղորդմամբ՝ Սևծովյան տնտեսական համագործակցության կազմակերպության ժողովին մասնակցելու նպատակով Ռուսաստանի Դաշնության (ՌԴ) Սոչի քաղաք մեկնած Թուրքիայի արտգործնախարար Մևլութ Չավուշօղլուն հանդիպել է արտգործնախարար Սերգեյ Լավրովի հետ: Ինչպես փոխանցում է թուրքական «Haberler» լրատվամիջոցը, կողմերը քննարկել են երկկողմ հարաբերություններին, Սիրիայի ճգնաժամին և միասնական ուժերով ահաբեկչության դեմ պայքարին վերաբերող հարցերի լայն շրջանակ:

Չավուշօղլուն, հանդիպումից հետո զրուցելով լրագրողների հետ, ասել է, որ Թուրքիայի և Ռուսաստանի նախագահների հանդիպումը կարող է տեղի ունենալ նախատեսվածից ավելի շուտ` օգոստոս ամսին:

«Հաստատվել էր, որ երկու նախագահները հանդիպելու էին Չինաստանում` Մեծ քսանյակի գագաթնաժողովի շրջանակներում: Սակայն նախագահ Էրդողանը ցանկություն է հայտնել հանդիպել Չինաստան գնալուց առաջ: Հանդիպման կազմակերպման ուղղությամբ բանակցություններ են տեղի կունենան»,-ասել է Չավուշօղլուն:

Անդրադառնալով Սիրիայի խնդրին` Թուրքիայի ԱԳՆ-ի ղեկավարը ասել է, որ երկու կողմերն էլ ճգնաժամի լուծման համար պետք է միասին աշխատեն: Չավուշօղլուն կարևորել է Ռուսաստանի և Թուրքիայի երկխոսության վերականգնումը, ինչը նրա պնդմամբ` ուղղված է հենց Սիրիայի ապագայի համար: Թուրքիայի ԱԳՆ ղեկավարը, կարևորելով Սիրիայում ձեռք բերված զինադադարի պահպանումը, շեշտել է, որ սիրիական ճգնաժամի ամենալավ լուծումը`քաղաքական լուծումն է:

Չավուշօղլուն, անդրադառնալով Սիրիայի նախագահ Բաշար Ասադի`իշխանությունից հեռանալու խնդրին, ընդգծել է, որ այդ հարցում երկու երկրների մոտեցումները տարբեր էին և մինչև հիմա էլ տարբեր են, սակայն ըստ նրա` նույնիսկ այդ հարցերը կարող են ստանալ իրենց լուծումները բանակցությունների միջոցով, քանի երկու երկրների հարաբերությունների կայունացման գործում նոր ընթացք է սկսվել:

Աղբյուր` Փաստինֆո