Փաստ ինֆո

Հուլիսի 1-ին պաշտոնապես ազդարարվեց ամառային լողաշրջանի բացումը:

Ինչպես հայտնում են ՀՀ ԱԻՆ-ից, ՓԾ Գեղարքունիքի մարզային փրկարարական վարչության պետ, փ/ծ գնդապետ Էդիկ Գալստյանը Հատուկ ջրափրկարարական ջոկատի փրկարարներին հաջող և անփորձանք ծառայություն մաղթեց` նշելով ուժեղացված ծառայության անցնելու մասին.

«Առավոտյան ժամը 09:00-ից մինչև երեկոյան ժամը 21:00-ն հերթապահություն է սահմանված Սևանա լճի ամբողջ տարածքում: Ունենք անհրաժեշտ հանդերձանք և տեխնիկա՝ ջրափրկարարական աշխատանքներ իրականացնելու համար: Մեր հայրենակիցներին կոչ եմ անում ուշադրության կենտրոնում պահել երեխաներին և հետևել հերթապահություն իրականացնող փրկարարների խորհուրդներին»:

Է. Գալստյանը նաև նշեց, որ ծառայությունն իրականացվում է Սևանի թերակղզու հանգստյան գոտու տարածքում, Լճափ համայնքի ափամերձ հատվածում և Ծովինար համայնքի տարածքում, ինչպես նաև՝ երեք հանրային լողափերում: Սակայն անհրաժեշտության դեպքում ջրափրկարարներն արձագանքում են նաև մասնավոր և ՀՀ մյուս մարզերի ջրային տարածքներում տեղի ունեցող պատահարներին:

Հատուկ ջրափրկարարական ջոկատում ծառայություն է իրականացնում 33 փրկարար, որոնցից 9 ջրասուզակներ են: ՀՋՋ հրամանատար, փ/ծ կապիտան Ա. Ճզմաչյանը նշեց, որ Սևանա լճում համապատասխան խորությունների վրա արդեն տեղադրվել են զգուշացնող լողանշաններ:

Փրկարարական ծառայությունը հանրային լողափերում իրականացվում է դիտարկման եղանակով` բարձր աշտարակների վրայից, իսկ 4 մոտորանավակներով կատարվում են պրոֆիլակտիկ շրջայցեր, բարձրախոսի միջոցով հանգստացողներին տրվում են ցուցումներ և հրահանգներ:

Հատուկ ջրափրկարարական ջոկատն ունի ամենագնաց մեքենա, որը կահավորված է ջրափրկարարների տեղափոխման և հանգստի համար անհրաժեշտ պարագաներով ու ջեռուցման համակարգով։ Այն զինված է անհրաժեշտ ջրափրկարարական գույքով՝ փչովի մոտորանավակ, շարժական էլ. գեներատոր, ստորջրյա հետախուզության սարք, շնչառական ապարատներ, պահեստային օդամբարներ, ամառային և ձմեռային ջրափրկարարական հանդերձանք, լապտերներ, կարթաձողեր, հալոգենային լուսարձակներ` մթության պայմաններում աշխատելու համար, պատգարակներ, փրկարարական գործիքներ, առաջին բուժօգնության պարագաներ, ռադիոկապի միջոցներ։ Ջոկատն ունի նաև հեռակառավարվող «Գնոմ» սարք, որն օգտագործվում է ստորջրյա հետախուզության և նկարահանումների համար` մինչև 120 մ խորության վրա:

Տեղում կազմակերպվեց ցուցադրական ջրափրկարարական գործողություն, որի ժամանակ ներկայացվեցին ջրում տեղի ունեցող դժբախտ պատահարներից խուսափելու համար անհրաժեշտ անվտանգության ու լողամիջոցների շահագործման կանոնները, ինչպես նաև՝ ջրահեղձման ժամանակ ձեռնարկվող առաջին օգնության հմտությունները:

Աղբյուր` Փաստինֆո